Ua Tatalaina e le Faatuatua o Tagata o le Ekalesia ma Faifeautalai le Faitotoa mo le Tuputupu Ae o le Ekalesia i Atumotu o Solomona

I le aso 3 o Novema, 2024, na faavaeina aloaia ai le Paranesi a Ulawa o Le Ekalesia a Iesu Keriso o le Au Paia o Aso e Gata Ai, ma faailogaina ai se tulaga taua i le tuputupu ae o le Ekalesia i Atumotu o Solomona.

Sa pulefaamalumalu le taitai o le Ekalesia, o Corey Lindley, i le fonotaga lea na faatulagaina ai lenei paranesi fou i le Itu o Honiara Solomon Islands.

Ina ua taunuu atu, sa faafeiloaia ma le fiafia taitai o le Ekalesia e le autalavou i le lotoifale, o e na laei o ni toa, o e na fesiligia i se ala faaleaganuu le faamoemoega o la latou asiasiga.

O Peter Awao, o se tagata o le Ekalesia na papatisoina i Honiara ma toe siitia atu ai i Ulawa i le 2022, na saunoa i le gagana fesootai faalotoifale e fai ma sui o le au malaga, ma faamatala atu, “Matou te lei omai iinei e tau, ae ia aumai le tala fiafia i le motu o Ulawa. Matou te le‘i omai ua faaauupegaina i ni pelu, to‘i, poo ni mea tau e faasagatau ia te outou, ae na matou omai e fesili atu mo le alofa mutimutivale. Na matou omai i se ala faigofie e folafola atu o Iesu Keriso o le Faaola o le lalolagi i nei aso. O le mea lea, faamolemole ia faaavanoa le ala mo matou e ulufale ai.”

Ina ua maea le faafeiloaiga mafanafana, sa auai taitai o le Ekalesia i se talisuaga i le fale o sauniga i le lotoifale, lea sa faapotopoto ai tagata o le ekalesia. O Peresitene Kwanafia, o se faifeau ua lesitala, na faatautaia le faaipoipoina o ulugalii e toaono, ma faamautinoaina o a latou faaipoipoga masani sa faapaiaina faaletulafono e tusa ai ma le tulafono a le Atu Solomona.

O le toatele o le vaega na malaga pe tusa ma le 10 km i le itu i Sasae o le motu i le nuu o Aroaha lea na faia ai papatisoga fou e iva o tagata liliu mai i se aloalo matagofie o le Vasa Pasefika.

I le taeao o le Aso Sa, e 81 tagata o le ekalesia na vave faapotopoto mo le lagolagoina aloaia o le paranesi fou ma le valaauga o lona uluai au peresitene o le paranesi. Na vave amata le sauniga faamanatuga i le sefulu minute ona sa faatalitali ma le naunautai tagata o le ekalesia, usuina viiga ma sauniuni faaleagaga mo taualumaga. Sa autasi tagata i le faatuina o le Paranesi a Ulawa.

I le taimi o le sauniga, sa faalauiloaina ai tagata faatoa papatisoina, ma sa faatautaia le faamanatuga e faifeautalai faamisiona e toafa o loo auauna atu i le paranesi.

I masina a sau, o le a faamaeaina ai e le Paranesi a Ulawa le fausiaina o se falesa fou lea o le a faaaoga e le 100 tagata o le ekalesia. O le falesa, na fausia i mea faufale ma galuega i le lotoifale, ua faamoemoe e faamaeaina i le faaiuga o le 2024. A o faaauau pea ona tuputupu ae le Ekalesia i le Motu o Ulawa, o le faatuatua ma le naunautaiga o ona tagata o se molimau lea i le galuega a le Alii i lenei vaega o le Pasefika.

O le motu o Ulawa, o se vaega o le itumalo o Makira i le Atumotu o Solomona, o loo nofoia e le silia ma le 6,000 tagata. E tapulaa tulaga tau fefaatauaiga ma le eletise, ae o le motu o se nuu e vavalalata i sootaga, ma e taulai atu i aiga. O le faatuatua o tagata o le ekalesia ma faifeautalai i le motu e faatuina se faalapotopotoga o se molimau lea i tagata, le nuu, ma le moni o le talalelei a le Faaola.