Manatua: E Taua Tele Oe

“Mafaufau i lili o le vao, pe faapefea ona tutupu; latou te le galulue, latou te le milo foi: … afai e faaofuina e le Atua le vao o le fanua …, e le sili ea ona faaofuina o outou …?” (Mataio 6:28, 30).

Talu ai ua faamanuiaina i matou e nonofo latalata i le natura, e fiafia lo’u aiga e savalivali umi a o lei goto le la i auala e sosoo ma lo matou fale. I na savaliga, e masani ona matou talanoa e uiga i o matou aso ma faamanuiaga na matou iloaina i lena aso. O nisi o mea faatauvaa e sili ona fiafia i ai la’u tama teine i le matou auala sopo o fugalaau vao. E felanulanuai, tetele, ma saoloto. E leai se tasi e fuiina na fugalaau vao i aso taitasi, ona latou aoina mai le vai ma le susū mai le sau, puao, ma timuga mai lea taimi i lea taimi.

O lenei mea e faamanatu mai ai ia te au le aoaoga a le Atua i le Mataio 6:28. E masani ona tatou popole i aso taitasi i le auala e agai ai i luma i le olaga, pe o faapefea o tatou foliga vaaia, po o faapea le vaai mai o isi tagata ia i tatou. Ae o le matagofie o na fugalaau vao o se faamanatu faigofie lea mo a’u i aso taitasi e alofa le Atua ia te a’u ma o le a Ia tausia pea au ma lo’u aiga.

Thang Nguyen, Texas, ISA

“Pe a outou auauna atu i o outou uso a tagata, ua nao lo outou auauna atu lava lea i lo outou Atua” (Mosaea 2:17).

Ua ou aoaoina e taua tele a’u i le Atua e ala i le suesueina o tusitusiga paia, taulotoina o le Autu a Tamaitai Talavou, faitauina o lo’u faamanuiaga faapeteriaka, ma le osia o feagaiga i le malumalu paia. Ua ou aoaoina e matua taua tele a’u i le Atua e ala i lo’u aafiaga i lenei olaga. Ua ou lagonaina le tele o Lona alofa ia te a’u e ala i lo’u alofa mo la’u fanau. Pe a ou auauna atu i isi, ou te aoao e alofa ia i latou e pei ona Ia alofa i ai. E i ai Sona alofa atoatoa mo lana fanau uma, lea e aofia ai ma a’u. O lena alofa ua faaalia ai lo’u taua i le Atua, ma ua faaali mai ai ia te a’u lo’u taua.

Ketura Gordon, Oregon, ISA

“O mea laiti ma faatauvaa e faataunuu ai mea tetele” (Alema 37:6).

Ou te manatua a o ou laitiiti, e ta’u mai ai e lo’u tina ia te a’u sa taua tele a’u i le Atua, sa Ia silafia a’u, ma e tatau ona ou saili pea e alofa ma auauna atu ia te Ia. Atonu e foliga mai o se faaupuga faisoo, ae ou te iloa e moni, aua sa ou ola ai. Ona o le faia o mea laiti ma faatauvaa, ua tuputupu a’e ai le fatu o le upumoni na totoina e lo’u tina i lo’u loto i aso ua leva, ma avea ma se malamalama ma se faamautinoaga sili e silafia ma alofa le Atua ia te a’u ma e taua a’u ia te Ia. Ou te ola latalata atili i le Atua e ala i le auai i le lotu ma inu ma ai e le aunoa i le faamanatuga, suesue i tusitusiga paia, tatalo e le aunoa ia malamalama i Lana afioga, sailia o faaaliga mai le Atua mo a’u lava ia ma lo’u aiga, mulimuli i poloaiga a le Atua, taliaina ma faalauteleina o valaauga o le Ekalesia, alofa i isi, faasoa atu le talalelei i isi, aoao atu isi e saili o latou tuaa ma tausia o latou lava talafaasolopito patino, ma le osia ma le tausia o feagaiga paia ma le Atua.

Na Ia auina mai Lona Alo e puapuagatia ma maliu mo a’u aua e alofa tele o Ia ia te a’u ma e finagalo ia ou toe foi atu i le aiga e nonofo faatasi ma Ia i se aso. Ou te le masalosalo na iloa e lo’u tina, ma ou te faamoemoe ma tatalo o le a ou manatua pea ma faaauau pea ona ou faia le mea sili ou te mafaia.

Moana Piena, Hawaii, ISA

“Auā ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).

Ua ou lagonaina le alofa o le Atua i lo’u lava olaga e ala i tali i tatalo ma le filemu ou te lagonaina pe a ou suesue i tusitusiga paia ma lo’u aiga. O nei aafiaga patino ua faamanatu mai ai ia te a’u e silafia a’u e le Atua ma e popole mo lo’u ola manuia. O le ata o le faaolataga lava ia o se molimau lea i lo tatou taua i le silafaga a le Atua. Ua Ia saunia se auala mo i tatou e toe foi atu ai ia te Ia ma avea faapei o Ia. O lenei fuafuaga paia ua faaalia ai e faatauaina e Ia lo tatou alualu i luma ma le fiafia e faavavau.

Atonu o le faamaoniga sili o le alofa o le Atua o le Togiola a Iesu Keriso. Sa puapuagatia lo tatou Faaola mo i tatou taitoatasi, ma faaalia ai e taua i tatou i le taulaga silisili. Ou te molimau atu e alofa tele le Atua ia i tatou taitoatasi ma patino. E le gata lo tatou taua ia te Ia. A o tatou manatua lenei upumoni, e mafai ona tatou feagai ma luitau o le olaga ma le faatuatua ma maua le olioli i la tatou malaga toe foi atu ia te Ia.

Alex Lobanov, Tbilisi, Georgia

“Ia manatua ua tele lava le taua o agaga i le silafaga a le Atua” (Mataupu Faavae ma Feagaiga 18:10).

Ia te au lava ia, soo se taimi lava ou te lagona ai le le alofaina po o le faanoanoa e uiga ia te a’u lava ia, e amata ona ou manatua le mau mai le Mataupu Faavae ma Feagaiga o loo faapea mai, “Ua tele lava le taua o agaga i le silafaga a le Atua” (Mataupu Faavae ma Feagaiga 18:10). O lenei fetalaiga mai lo tatou Tama Faalelagi ua ou maua ai le faamafanafanaga tele. E i ai pea o Ia iina mo a’u, e tusa lava po o le a. E faavavau Lona alofa, ma e le mafai ona mafaufauina o le a Ia ositaulagaina Lona Alo e laveai ai i tatou uma. O lenei faailoga matagofie o le alofa ua tuuina mai ai ia te a’u le malosi e faatoilalo ai mea uma e le masani ai ma tulai a’e e fesootai ma Ia.

Janette Tam, Kalefonia, ISA

“Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39).

O le aoao atili o le ata sili o le faaolataga ma le faaeaga ua fesoasoani ia te a’u e iloa ai o a’u o se atalii o le Atua. Pe a ou suesue i le Mose 1:39, ou te malamalama ai o loo i ai se matafaioi maoae a le Tama Faalelagi e faia i lo’u olaga. E aumaia e lenei malamalama ia te a’u le faamoemoe ma le faamautinoaga.

E ala i lo’u valaauga ma tiutetauave o se tane ma se tama, ua ou aoao ai o le Atua o lo’u Tama ma e alofa i Ana fanau uma. O le osia ma le tausia o feagaiga e ala i le salamo i aso taitasi ma le aai ma feinu i le faamanatuga i vaiaso taitasi ua fesoasoani ou te lagona ai Lona alofa mo a’u ma lo’u aiga.

Francis Kikambi Sseremba, Wakiso, Uganda

E te iloa se tasi o manaomia ona faamanatu atu e taua tele i latou? Saili se auala e faasoa atu ai le alofa o le Atua i isi i le asō!