Pipii atu i a Tatou Feagaiga

tamaitai ataata o loo nofo i luga o se puipui maa

O tusiga i mekasini a le Ekalesia i le masina lenei e mafai ona fesoasoani ia te oe a o e saili e “pipii atu i feagaiga” ua e faia (Mataupu Faavae ma Feagaiga 25:13).

Aoao mai Lenei Tusiga

Faalogo i le Siufofoga mai le Lagi

I le itulau e 2, ua faamanatu mai ai e Elder Neil L. Andersen o le Korama a Aposetolo e Toasefululua ia i tatou o le pisapisao o le lalolagi e mafai ona faalavelaveina ai i tatou mai le siufofoga o le Agaga. Pe o i ai ni mea faalavefau i lou olaga e faigata ai ona fesootai ma le Atua? E mafai ona e faia se sini i le masina lenei ina ia faaitiitia nei mea faalavefau, e pei o le faaaluina o le tele o le taimi e tapuai ai i le malumalu po o le faia o se anapogi mai ala o faasalalauga faaagafesootai.

Fesoasoani i Isi ia Maua Faamanuiaga a le Atua

O le tusiga o loo i le itulau e 18 o loo talanoaina ai le auala e mafai ai e tagata o le Ekalesia ona maua le olioli ma le faaaofia i le malumalu o le Alii, e tusa lava po o le a le tulaga faale-faaipoipoga. O le a se mea e mafai ona e faia e fesoasoani ai i ou uso a tagata o le Au Paia ia malamalama ma maua faamanuiaga ua ofoina mai e le Tama Faalelagi i Ana fanau uma o e tausia feagaiga ma Ia?

Maua ma Iloa Faaaliga

Faitau le tusiga o loo i le itulau e 44 na saunia e Elder Christophe G. Giraud-Carrier o le Fitugafulu e sue ai ni manatu se lima mo le mauaina ma le iloaina o faaaliga. O a vaega o lou olaga e te manaomia ai le taitaiga faalelagi? Mafaufau e faaaoga mataupu faavae na aoaoina e Elder Giraud-Carrier a o e sailia musumusuga mai le Atua i le masina lenei.

Mea Mālie a le Aiga i leSau, Mulimuli Mai ia te A’u

Mataupu Faavae ma Feagaiga 20:75–79

Ina ua faatulagaina le Ekalesia toefuataiina a Iesu Keriso i le 1830, sa faatonuina e le Alii Lona nuu ina ia “potopoto soo faatasi le ekalesia e taumamafa i le areto ma le uaina i le faamanatuina o le Alii o Iesu” (Mataupu Faavae ma Feagaiga 20:75). E mafai ona e faataitaia lenei gaoioiga faatasi ma lou aiga e aoao atili ai e uiga i le faamanatuga:

Faitau le tatalo o le faamanatuga i le Mataupu Faavae ma Feagaiga 20:77, 79 E mafai ona e fesoasoani i lau fanau ia malamalama i soo se faaupuga e le masani ai, e pei o le “faapaiaina.”

O a ni mea se tolu tatou te folafola atu o le a tatou faia? O le a le faamanuiaga ua folafola mai e le Alii e tuuina mai ia i tatou?
O a nisi o auala e mafai ona tatou “manatua pea” ai le Faaola i le aluga o le vaiaso, mo le tagata lava ia ma le aiga?
Atonu e mananao lou aiga e taumafai e tauloto tatalo o le faamanatuga. E mafai ona e faaaogaina fesoasoaniga vaaia e fesoasoani ai. Mulimuli ane, fesili atu i tagata o le aiga po o le a se mea na latou aoaoina mai le mafaufau i upu o tatalo o le faamanatuga.