“Auai i le Fuafuaga a le Atua ma i totonu o le Malumalu,” Liahona, Mat. 2025.
Auai i le Fuafuaga a le Atua ma i totonu o le Malumalu
E tolu mataupu faavae e faamanatu mai ai ia i tatou e mafai e i tatou uma ona maua faamanuiaga ua ofoina mai e le Atua i Ana fanau.
Ata o le Malumalu o Barranquilla Colombia na pueina e Leslie Nilsson
Sa ou nofo ma se vaega o tagata o le Ekalesia. E matou te le’i feiloai muamua lava le tasi i le isi, ae e tasi lava le mea e tutusa ai i matou uma: sa matou nofofua.
Ia, ou te fia toe foi i tua mo sina sekone. I le talalelei a Iesu Keriso, e le o faauigaina i tatou i faailoga. Na aoao mai Peresitene Russell M. Nelson, o lo tatou faasinomaga moni lava, o i tatou “moni lava o fanau agaga a le Atua.” Ou te malamalama ona o le manaomia o lea tatou te ta’ua ai nisi o tagata o le Ekalesia o ni tagata nofofua. O loo i ai ni mafuaaga tatau mo lena mea. Ae o nisi taimi, e pei ona foliga mai o le tulaga lea i lenei vaega, e mafai ona saofaga i le lagonaina e tagata o le ekalesia o ni tagata ese. Atonu e faafaigatā ai ona latou lagona le aofia atoatoa i faamanuiaga a le Atua o le faaolataga ma le faaeaga.
Tou te silafia, sa matou talanoa e uiga i le malumalu—ma sa manatu nisi tagata o le vaega o le nofofua e faaesea ai i latou mai le mauaina o le atoatoaga o faamanuiaga o le malumalu. Ou te malamalama; pe a e le faaipoipo i se Ekalesia e taulai atu i le aiga, e mafai ona faigata ona iloa pe faapefea ona e fetaui i ai. Ae ou te iloa foi e le faamasinoina e le Alii pe agavaa se tagata e maua faamanuiaga folafolaina e faavae i foliga vaaia po o faailoga. Na te “vaai i le loto” (1 Samuelu 16:7) ma avanoa Ana faamanuiaga mo i latou uma o e filifili e mulimuli ia te Ia. Ou te talitonu i lenei mea ma lo’u loto atoa. O lea la, faatasi ai ma lena mea i le mafaufau, o mataupu faavae nei e tolu e fesoasoani ai i le Au Paia o Aso e Gata Ai o e nofofua ia iloa o i latou o ni tagata o le fuafuaga a le Atua ma i totonu o le malumalu.
1. Na mamanuina e le Atua Lana fuafuaga mo Ana fanau taitoatasi.
Talu ai o le feagaiga fou ma tumau-faavavau o le faaipoipoga e manaomia mo le faaeaga, atonu e foliga mai e lei faia le fuafuaga a le Atua mo i latou o e nofofua (tagai i le Mataupu Faavae ma Feagaiga 131:1–3). Ae na aoao mai Elder Patrick Kearon: “O le fuafuaga matagofie a lo tatou Tama, e oo lava i Lana fuafuaga ‘maoae’, ua mamanuina e aumai ai oe i le aiga, ae le o le taofia ai o oe i fafo. E leai se tasi na faia se poloka auala ma tuu ai se tagata iina e toe faafoi oe ma auina ese atu oe. O le mea moni, o le faafeagai tonu lava. E le o malolo le Atua i le tulituliloaina pea o oe. E ‘finagalo o Ia i Ana fanau uma ina ia filifili e toe foi atu ia te Ia,’ ma ua Ia faaaogaina auala uma e mafai ai ona toe aumai ai oe ma foi atu.”
E le o faamoemoe le Atua e auina ese i latou o e nofofua mai le olioli i faamanuiaga ua Ia ofoina mai. Na aoao mai Peresitene M. Russell Ballard (1928–2023), Sui Peresitene o le Korama a Aposetolo e Toasefululua, “Ua faamautu mai e tusitusiga paia ma perofeta o aso e gata ai o tagata uma o e faamaoni i le tausia o feagaiga o le talalelei o le a maua le avanoa mo le faaeaga.” E tofu agaga taitasi ma le taua tele i le silafaga a le Tama Faalelagi—o lea na Ia auina mai ai Lona Alo e Toatasi na Fanaua e maliu ma togiola i tatou uma mai le agasala ina ia mafai ona tatou maua le meaalofa o le ola e faavavau (tagai i le Ioane 3:16–17; Mataupu Faavae ma Feagaiga 18:10–12).
Afai e ese le olaga nai lo le mea na faamoemoeina, atonu tatou te fesiligia lo tatou faamoemoega i le fuafuaga a le Atua. Ae e lei faamaonia lava e Lana fuafuaga o le a tutusa uma o tatou olaga. Tatou te le iloa po o a ni olioli, le fiafia, faamanuiaga, po o le lototiga e ono oo mai i o tatou ala. Na saunoa Peresitene Dallin H. Oaks, Fesoasoani Muamua i le Au Peresitene Sili, “E tele naua mea tatou te le iloa e na o lo tatou faalagolago mautinoa lava o le faalagolago lea i le Alii ma Lona alofa mo Ana fanau.”
Atonu tatou te le iloa pe aisea e foliga mai ai lo tatou ala i le ala o loo iai nei i le taimi nei. Ae o le faamoemoe i le Atua ma Lona alofa e mafai ona aumaia ai le manino i le auala na Ia mamanuina ai Lana fuafuaga mo Ana fanau uma—e aofia ai ma oe.
Ata na pueina i totonu o le Nofoaga Autu mo Tagata Asiasi i le Malumalu o Roma Italia na pueina e Massimo Criscione
2. O le malumalu e umia faamanuiaga patino mo tagata uma.
Atonu tatou te mafaufau i faamauga e na o se tane ma se ava e faatatau i ai. Ae e faaopoopo atu i le tuufaatasia o ulugalii ma le Alii, o faamauga e tuufaatasia ai aiga e faavavau. E ala i faamauga, e mafai ai e fanau uma a le Atua ona olioli i faamanuiaga e faavavau pe afai latou te tausia a latou feagaiga.
O le mana o faamauga e faamaonia ai sauniga uma o le perisitua i le lagi ma le lalolagi. Na aoao mai Elder D. Todd Christofferson o le Korama a Aposetolo e Toasefululua: “[O le mana faamau]—e faia ai ia avanoa autasi le faaolataga mo le tagata lava ia ma le faaeaga faaleaiga i fanau a le Atua i soo se mea ma i soo se taimi latou te ola ai i le fogaeleele. E leai se isi mataupu silisili po o se filosofia po o se pule e mafai ona tutusa se mea na te ofo maia i sea avanoa ua ta aofai ai mea uma. O lenei mana faamau o se faailoaga atoatoa lea o le faamasinotonu, alofa mutimutivale ma le alofa o le Atua.” O faamanuiaga ua ofoina mai e le Alii e matua aofia ai mea uma ma o loo avanoa mo tagata uma o e o le a osia ma tausia feagaiga ma Ia.
Atonu tatou te malamalama lelei i le auala e aofia uma ai le fuafuaga a le Atua a o tatou tapuai i le maota o le Alii. O le taimi e faaalu i totonu o le malumalu, na aoao mai ai Peresitene Nelson, o le a fesoasoani ia te oe e te mafaufau faaselesitila ai ma pu’e ai se vaaiga po o ai moni lava oe, o ai e mafai ona e avea ai, ma le ituaiga o olaga e mafai ona e mauaina e faavavau.” Sa ia faamalamalama mai foi o le tapuai i le malumalu o le a aumaia ai ia i tatou le puipuiga, se molimau malosi atu, faamafanafanaga, faaaliga patino, faateleina o le malamalama ma le mana, ma se malamalamaaga sili atu i le fuafuaga a le Atua.
Pe ua tatou faaipoipo pe nofofua, o loo umia e le malumalu avanoa faaleagaga patino mo i tatou uma—o se nofoaga e faamalosia ma faamamanaina ai i latou uma o e mananao e latalata atu i le Atua. Mo nisi faamatalaga, tagai i le pa i le itu “Faamalosia e Tapuaiga i le Malumalu.”
3. I totonu o le malumalu, e mafai ona faalolotoina ai la tatou sootaga ma Iesu Keriso.
I totonu o le malumalu, o le taulaiga autu lava o Iesu Keriso. O Ia o le totonugalemu o le fuafuaga a le Atua ma o le mafuaaga lea e mafai ai e i tatou uma ona maua le faaolataga ma le faaeaga. Na aoao mai Peresitene Nelson: “O le maota o le Alii o se fale o le aoaoga. O iina e aoao mai ai le Alii i Lana lava ala. O iina e aoao mai ai sauniga taitasi e uiga i le Faaola. O iina tatou te a’oa’o ai i le auala e vavae ai le veli ma talanoa ma le manino atili ma le lagi. O iina tatou te a’oa’o ai i le auala e fetu’u ai le tiapolo ma utuvai mai ai i le mana o le perisitua a le Alii e faamalosia ai i tatou ma i latou tatou te alolofa i ai. E ma’eu le naunautai e tatau ona oo ia i tatou taitoatasi e saili atu ai i le malutaga iina.”
E mafai ona tatou maua le sulufaiga ma lagona o le avea ma ni o i le malumalu e ala i le vaavaai mo le Faaola i sauniga ma feagaiga. O le faia o lena mea, o le a tatou maua ai faamaoniga e alofa o Ia ia i tatou ma “e tutusa uma lava i latou i le Atua” (tagai i le 2 Nifae 26:33). Ona o Lona alofa mo i tatou, ua finagalo ai o Ia ia tatou fausia ni “sootaga tumau-faavavau” ma Ia ma maua ai se “ituaiga alofa faapitoa ma le alofa mutimutivale” e ala i a tatou feagaiga. Afai tatou te osia ma tausia feagaiga o le malumalu, e mafai ona tatou faamalosia la tatou sootaga ma Ia, ma aumaia ia i tatou le “faamoemoe, olioli, ma le talitonu o le a lelei mea uma i o tatou olaga atoa”—po o a lava o tatou tulaga.