Siaki le Faitoto’a o le Pa

Ata o le tusitala i le nofoaga mo lafumanu na pueina e Shaun Sutton

I le latalata atu i le faaiuga o lo’u taimi o se faifeautalai talavou o auaunaga, sa ou mulimuli ai i se uunaiga e auauna atu i ni aso se lua o le vaiaso i se nofoaga mo lafumanu i Iuta mo aiga o le militeli ma tagata na faasaoina [i auaunaga faamiliteli]. Sa matuai leai lava so’u poto masani i soo se mea e faatatau i lafumanu, ae sa ou fiafia lava.

I le amataga o lo’u taimi iina, sa talosagaina ai a’u e faamama ia pa solofanua. Sa tofia la’u uo lelei ma o la’u soa sa ma o faatasi e tala’i i afiafi, o Elder Saltern, e faaali mai ia te a’u le mea e fai.

I le taunuu atu ai i le pa manu mulimuli e faamama i se tasi o aso, sa ou mulimuli ai ia Elder Saltern i totonu. I lo’u mafaufau sa ou maua ai se uunaiga mālū e fesili atu e uiga i le tapunia o le faitotoa i o ma tua. Sa ou le amanaia le manatu ma ou alu e faamama.

O le solofanua sa i totonu o le pa, o Shrek, o se tasi o solofanua telē tele i le lafumanu. Sa amata ona feminoia’i ma le popole o ia a o ma faamamaina. Na faafuasei lava ona oso ese Shrek mai le pa manu e ala i le faitotoa matala ma tamoe ese mai isi solofanua i fafo i le pa.

O le mea e faafetai ai, na uu mai e se tasi o tagata poto masani i le pa manu se pakete o saito ma vave ona toe faatosina mai ai le solofanua. A o ia toe tuuina Shrek i lona pa, sa tilotilo mai o ia ia te a’u ma fesili mai ma le fiafia, “O le a se mea na tatou aoaoina?”

O le lesona manino lava o le tapunia lea o le faitoto’a o le pa i taimi uma. Sa faamanatu mai ia te a’u se mau sa ou faitauina i lena lava taeao lea na aoaoina ai a’u ia gauai atu “i faatosinaga a le Agaga Paia” (Mosaea 3:19).

Ina ua ma ulufale atu ma Elder Saltern i le pa o Shrek, sa ou le amanaiaina se uunaiga mai le Agaga Paia e tapuni le faitoto’a o le pa. Sa ou le amanaiaina le Agaga i le fautuaina o a’u i mea sa ou manatu e na o mea “faaleagaga” e faatatau i tusitusiga paia po o poloaiga. O lenei aafiaga na faamaualaloina ai a’u. Sa ou iloaina o le malamalama o le Agaga sa sili atu nai lo le mea sa ou iloaina—e tusa lava pe e faatatau i pa manu!

Na aoao mai Peresitene Thomas S. Monson (1927–2018): “Ia manatua o lenei galuega e le o sa outou galuega po o sa’u foi. Afai o loo tatou i ai i le feau a le Alii, ua ia i tatou le aia tatau mo le fesoasoani a le Alii.”

Atonu ou te le’i aoaoina atu le talalelei i le pa manu, e pei ona ou faia i lena afiafi ma Elder Saltern, ae sa ou maua le aia tatau mo le fesoasoani ma le taitaiga paia—e tusa lava pe na o lo’u faamamaina o pa o solofanua.