E Na’o le Faaeletonika
O Auala e 3 e Avea ai le Salamo ma Se Vaega o o Tatou Olaga i Aso Taitasi
O le salamo o se faagasologa fiafia lea e mafai ona tupu i le gasologa o lou olaga atoa.
I le 2019 sa ou faalogo ai i se lauga na suia ai lo’u olaga. Na saunoa mai Peresitene Russell M. Nelson: “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani, i aso taitasi i le salamo.”
E fai i aso taitasi? E mautinoa lava ou te le’i atoatoa, ae ou te lei manatu sa ou faia ni mea sese tetele i aso uma . O le a la le foliga o le salamo i lea aso ma lea aso? O nai tausaga ua mavae atu sa o se malaga e iloa ai lena mea. O mataupu faavae nei e tolu ua ou aoaoina i le ala.
Liliu atu i le Atua
Sa ou manatu muamua o le salamo e faatatau i le fai atu, faamalie atu pe a ou faia se mea sese. Peitai, sa amata ona ou malamalama o le salamo e sili atu nai lo le liliuese mai le agasala; o le liliu atu i le Atua. E le na o le taofia o mea leaga. O loo faaleleia ai foi le lelei.
Na saunoa mai ia Elder David A. Bednar o le Korama a Aposetolo e Toasefululua, “O le talalelei a Iesu Keriso ua aofia ai mea e tele atu nai lo na o le aloese, faatoilalo, ma le faamamaina mai agasala ma faatosinaga leaga i o tatou olaga; e aofia moni ai le faia o mea lelei, avea ma tagata lelei, ma avea ma tagata lelei atu.”
Pe a ou taumafai ia sili atu ona anoa le suesueina o tusitusiga paia i aso taitasi, o le salamo lena.
A ou tatalo ia tele atu le alofa mama, o le salamo lena.
Soo se taimi lava tatou te filifili ai e mulimuli ia Iesu Keriso ma saili ia avea atili e faapei o Ia, o le salamo lena.
Fai Ni Laa Laiti.
Na faamanatu mai e Peresitene Nelson ia i tatou e faapea “o le salamo e le o se mea e tupu; o se faagasologa.”
Sa ou aoaoina o le salamo e le na o le taimi ou te tatalo ai mo se faamagaloga po o le ai o le faamanatuga (e ui o se vaega lena). O le salamo o se mea ou te faia i aso taitasi.
Na saunoa mai Elder David A. Bednar: “O mea faaleagaga laiti, mautu, ma auaua’i ona faaleleia, o laasaga ia e finagalo le Alii tatou te uia.” O nisi taimi, e tupu ai suiga faavavega i le aso e sosoo ai. O le tele o taimi, e tupu malie ai suiga a o tatou taumafai ia lelei atili i aso taitasi.
3. Valaaulia le Faaola e Fesoasoani ia te Oe
Na a’oa’o mai Elder Dale G. Renlund o le Korama a le au Aposetolo Toasefululua e faapea, o le salamo moni e tatau ona aofia ai le faatuatua i a Iesu Keriso.
Na ia saunoa, “A aunoa ma le Togiola, o le a mou atu le faamoemoe ma le olioli masani, ma avea ai le salamo o se amioga pagatia e na ona fetuutuunai.”
Ua ou faatuina le tele o sini i lo’u olaga, ae o sini e maua ai se alualu i luma sili ona mataina o sini ia ou te faaaofia ai le Faaola e ala i le tatalo i aso taitasi mo Lana fesoasoani. E fesoasoani o Ia ia ou suia e le gata i la’u amio ae faapea foi lo’u loto.
Ou te iloa a o tatou taulai atu i le Faaola ma taumafai e faapei o Ia i aso taitasi e ala i le salamo, e mafai ona Ia suia o tatou loto ma fesoasoani ia i tatou ia maua le olioli, faatuatua, ma le filemu faateleina.