E Faapefea Ona Fesoasoani A Tatou Feagaiga ia i Tatou e Faaaoga le Mana o le Atua?

Ata na pueina e Connor Johnson

Ua tofu i tatou ma le avanoa e osia ai feagaiga paia ma le Atua lava ia o le lagi. Tatou te osia nei feagaiga a o tatou auai i sauniga o le perisitua. A o tatou tausia nei feagaiga, Na te faamanuiaina i tatou i Lona mana.

Sei manatunatu faatasi ma a’u i le taitaiga faaperofeta a Peresitene Russell M. Nelson e faatatau i le auala e maua ai le mana mai le Atua: “O alii ma tamaitai uma o e auai i sauniga o le perisitua ma o e osia ma tausia feagaiga ma le Atua, e mafai ona maua tuusa’o le mana o le Atua.” O lenei mauaina tu’usa’o o le mana o le Atua o se meaalofa lea ua Ia faasoaina mai ma le agalelei i Ana fanau.

E faape’ī foliga o lenei mana, lea e tafe mai i le tausia o feagaiga tatou te osia e ala i sauniga o le perisitua, i lou olaga i aso taitasi? E faapefea ona faaaoga e se tamaitai o le feagaiga lenei mana paia?

Ou te faamoemoe o le a fesoasoani se faataitaiga patino ia te oe a o e faia le galuega faamalosiau faaleagaga e aoao ai mo oe lava ia le uiga o le faae’eina i le mana o le Atua.

I se tasi aso sa ou maua ai se feau tusitusia mai la’u tama teine faaletulafono o Amy: “Fai se tatalo mo Dottie.”

E le’i moe le tama teine a la’u tama o Dottie i le po na muamua atu. Sa ala Amy faatasi ma ia i le po atoa ma fai mai o loo fiva Dottie. Sa tuuina atu e Amy ia te ia ni fualaau, ae sa vevela pea Dottie ma sa le mautonu. Ma sa malaga lo’u atalii o Connor mo le galuega ma sa le’i fuafuaina e toe foi i le fale mo le isi lua aso.

Ina ua oo mai le taeao, sa iloa e Amy ua lanumoana laugutu o Dottie. Sa faapena foi ona lanumoana ma malulu ona lima i le pa’i atu i ai. Sa vave ona maua e Amy le uunaiga, “Ave Dottie i le fomai o tamaiti.” Sa ia faalogo i lena uunaiga, valaau atu i le ofisa o le fomai o tamaiti, ma sa faamautinoa atu ia te ia o le a latou aveina sa’o lava Dottie i totonu.

O le mea e lelei ai, o le ofisa o le fomai o tamaiti e faafeagai ma le auala mai le fale o lo’u tina. Sa lagona e Amy le uunaiga e ave le taavale i tafatafa o le fale o lo’u tina. Sa faigaluega lo’u tina i lona fanua ma sa fiafia e vaai le tuafafine e fa tausaga o Dottie, o Goldie, ae ave e Amy ia Dottie i le fomai o tamaiti. O se tali i le popolega o Amy i le manaomia ona siaki Goldie ma tausi ia Dottie i le taimi lava e tasi.

Na iloa e le foma’i o tamaiti o Dottie ua maua i le niumonia, atonu e mafua mai le vai taele i ni nai aso na muamua atu. Sa togafitia Dottie i vai ma sa faaaluina le aso atoa i lima o lona tina, ma sii i luga e tatala ai ona ala mānava ma faafaigofie ai lana manava.

Sa ou ofo atu e piki mai se meaai o le afiafi a o ou agai atu i le fale. Ma sa tuu mai ia a’u e Amy, lea sa ou faafetai ai. Sa ou mafaufau pe na faapefea ona taulima e Amy se po e leai se moe, le atuatuvale o le i ai o se tamaitiiti laitiiti ma’i, ma le manaomia ona tausia o Goldie.

Sa ou savali atu i totonu o lo latou fale ma le tagapepa o meaai na faatau mai ma iloa ai o loo toafilemu Amy ma teineiti. Sa i ai se malosiaga faaopoopo i le savali ma le malamalama i foliga o Amy. Sa to’a o ia, e ui lava ina feagai na o ia ma Dottie ma’i i se isi po. Sa le fefe o ia. Sa lototele o ia. O se filemu sa silisili atu i mea uma e manatu i ai. Sa na ona ou mana’o lava e tumau ai i lena taimi ma talisapaia ma le fiafia.

E taumafai Amy e tausia ana feagaiga ma le Atua ma ua faamanuiaina o ia i Lona mana faamalosiau. Sa uunaia o ia e le Agaga e fai faatinoga sa ia faia e tausia ai Dottie. Ma o le mana o le Alii na faateleina ai lona gafatia e taulima ai manaoga o lona aiga i le onosai ma le alofa ma se faamautinoaga toafimalie o le a lelei mea uma.

O le faamanuiaga lenei o le mana o le Atua, ua avanoa mo i tatou e ala i feagaiga paia ma ona o le taulaga togiola a le Faaola. O lenei mana e suia ai i tatou, faamalosia ai i tatou, faatoafilemuina ai i tatou, aumaia ai ia i tatou le lototele, aumaia ia i tatou le filemu, ma faateleina ai lo tatou gafatia e faataunuu ai o tatou tiutetauave ua tofia faalelagi o ni tamaitai.