Na o Tusiga Faaeletonika
O Se Amataga Fou—O Le Auala na Suia ai Lo’u Olaga e le Olioli i le Salamo
E alaala le tusitala i Papeete, Tahiti.
Ou te lei fuafua lava e papatiso, ae ina ua ou aoao e uiga i le meaalofa o le salamo, sa suia ai mea uma.
Ina ua 16 ou tausaga, sa faatagaina a’u e lo’u tina e feiloai ma faifeautalai ae sa fai mai e le mafai lava ona ou papatiso. Sa ou ata. Ou te lei manaomia o ia e ta’u mai ia te au lena mea. Ua uma ona ou iloa ou te le’i manao e papatiso.
Na ou feiloai muamua lava i faifeautalai ona o le faaaloalo. Sa fesili mai se uo ia te a’u pe ou te fia talanoa ia i laua, ma sa ou ioe aua ou te le manao e faatiga i ona lagona.
Sa faaauau pea ona ou feiloai ma faifeautalai ae ou te le’i manatu mamafa i a latou lesona, aua sa ou iloaina o le papatisoga e le o se filifiliga mo a’u.
O Se Anapogi ma se Vavega
Ina ua iu ina valaaulia a’u e faifeautalai ina ia papatisoina, sa ou fai atu o le a le faatagaina e lo’u tina. Sa fautuaina i matou e le tama o la’u uo e anapopogi ma ole atu i le Tama Faalelagi e fesoasoani e faamaluluina lona loto.
Ou te lei talitonu o le anapogi o le a suia ai le loto o lo’u tina, ae sa ou ioe e taumafai. Sa matou anapopogi uma ma le aiga o la’u uo, faifeautalai, mo lo’u tina ina ia mafai ai ona ou papatiso.
E lei leva ona uma la matou anapogi, ae faia se ma taumafaga o le afiafi faatasi ma lo’u tina. I se tulaga e lei mafaufauina, sa ia liliu mai ia te au ma fai mai, “E te iloa, afai e te manao e papatiso, o lau filifiliga lena.”
Sa ou le talitonu i mea sa ou faalogo i ai.
Sa ia toe faia foi. “E mafai ona e papatiso.”
Sa ou lē mautonu. Sa le mafai ona ou toe faaaogaina lo’u tina e fai ma alofaga e aua ai nei papatisoina. Sa tatau lava ona ou faia na o au le faaiuga. Sa amata ona ou faalogologo i faifeautalai ma se mafaufau matala.
Se Avanoa e Toe Fanauina Ai
Ina ua amata ona ou faalogologo i lesona a faifeautalai ma le faamoemoe moni, sa amata ona ou lagonaina le alofa o le Atua. Na oo mai o se lagona o le filemu ma le faamautinoaga. Ona o le alofa sa ou lagonaina mo Ia, sa le mafai ai ona ou onosaia le manatu o le le mama i Ona luma. Sa ou naunau e lafoai mea uma sa le ogatasi ma poloaiga a le Atua.
Ou te manatua lo’u mafaufau, “Maimau pe ana mafai ona ou toe faia lo’u olaga.”
O lea la, ina ua ta’ua faasamasamanoa e la’u uo o le papatisoga e pei lava o le toe fanauina (tagai i le Mosaea 27:25), sa tau le mafai ona ou taofia lo’u fiafia. Sa ou iloaina le mea e tatau ona ou faia.
Sa ou papatiso ma talu mai lena taimi ua ou auauna atu i se misiona i Kanata e fesoasoani i isi tagata ia maua le olioli lava lea e tasi na ou maua i le talalelei a Iesu Keriso.
O Le Olioli o le Salamo i Aso Taitasi
O le olioli sa ou lagonaina ina ua ou papatiso sa le o se lagona i se taimi e tasi. Ou te lagonaina pea lena lagona toafilemu, ma le mama i taimi uma ou te tatalo ai mo se faamagaloga.
Na a’oa’o mai e Peresitene Russell M. Nelson:
“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e [faa-tasi] ona tupu; ae o se faagasologa.
“… Tatou te fa’atagaina le Fa’aola e suia i tatou i o tatou lava itūaiga tagata silisili.”
O le salamo i aso taitasi e aumaia ai ia te a’u le olioli tele. Ou te lagona le filemu i le iloaina e alofa le Atua ia te a’u e ui lava ou te le atoatoa. E mafai ona ou feagai ma le lumanai ma le faamoemoe aua ou te iloa o taimi uma lava ou te salamo ai ma le faamoemoe moni, e mafai ona faamagaloina a’u (tagai Moronae 6:8).