Pe Mafai Ona Ou Maua Faaaliga mo Isi?

O le iloaina o le siufofoga o le Alii i taufaasese a le lalolagi e mafai ona faigata, ae ua tuuina mai e perofeta ma aposetolo o aso e gata ai ia i tatou le taitaiga e fesoasoani ai.

Na aoao mai Elder Dale G. Renlund o le Korama a Aposetolo e Toasefululua: “E tatau ona tatou malamalama i le taiala o loo galue ai le Agaga Paia e tuuina mai faaaliga patino. Pe a tatou galulue i totonu o le taiala, e mafai e le Agaga Paia ona tatala mai malamalama’aga, taitaiga, ma le mafanafana ofoofogia. I fafo atu o lena taiala, po o le a lava lo tatou atamai po o taleni, e mafai ona faaseseina i tatou.”

I ni nai masina talu ona faatulagaina le Ekalesia toefuataiina a Iesu Keriso, na aoao ai le Au Paia e uiga i lenei mataupu faavae taua.

Ia Aokuso 1830 na fai mai ai se tagata o le Ekalesia e igoa ia Ailama Page na ia mauaina faaaliga mai le Atua e uiga i “le fausiaina o Siona” ma “le faatulagaga o le Ekalesia.” Sa talitonu ai ni nai tagata o le Ekalesia, e aofia ai ma Oliva Kaotui.

Sa popole le Perofeta o Iosefa Samita ona o faamatalaga a Ailama e le tusa ai ma “le faatulagaga o le maota o le Atua.” Sa fesili Iosefa i le Alii ma maua ai se faaaliga na tuuina atu ia Oliva lea ua faamaumauina nei i le Mataupu Faavae ma Feagaiga 28.

Na fetalai mai le Alii e mafai e Oliva Kaotui ona “tautala atu pe aoao atu” pe afai sa “taitaia oe i soo se taimi e le Fesoasoani” e faia lena mea (Mataupu Faavae ma Feagaiga 28:4). Ae sa fetalai mai foi le Alii “E leai se tasi e tofia na te mauaina poloaiga ma faaaliga i le ekalesia lenei, vagana ai laʼu auauna o Iosefa Samita “se ia tofia e le Alii “se isi i lona tulaga” (fuaiupu 2, 7).

I se isi faaupuga, o tagata sailiili agavaa uma e mafai ona taialaina e le Agaga Paia mo o latou tiutetauave patino, valaauga o le Ekalesia, ma aiga. Ae ua na o le perofeta o loo i ai nei ua i ai le pule e maua ai poloaiga po o faaaliga mo le Ekalesia atoa. “Aua e tatau ona faia mea uma i le faatulagaga tatau,” na fetalai ai le Alii (fuaiupu 13).

Na faamalamalama mai e Elder Gary E. Stevenson o le Korama a Aposetolo e Toasefululua, “Sei vagana ua valaauina oe e ala i le pule tatau, e le tuuina mai ni uunaiga mai le Agaga mo oe e fautuaina pe faasa’o ai isi.”

O le faalogo i afioga a le Alii ua tuuina mai e ala mai i Ana auauna faatagaina ma saili faaaliga patino i totonu o o tatou tiutetauave, e mafai ai ona tatou aloese mai le taufaasese ma maua ai le filemu, olioli, ma le saogalemu.