Auala o FesootaigaFaalelagi

O le iloaina o le taimi e fetalai mai ai le Atua e manaomia ai le faatuatua ma le faalagolago. O le faatuatua e taula i taimi uma ia Iesu Keriso. E manaomia foi ona tatou faalagolago ia te Ia. Na Ia fetalai:

“Faauta, o le a Ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto.

“O lenei, faauta, o le agaga lenei o faaaliga” (Mataupu Faavae ma Feagaiga 8:2–3).

Ae o faaaliga ma le taitaiga paia e le sau mai le na o le faatalitali mo se faaaliga faaleagaga. E tatau ona tatou faatino. E pei lava ona ta’u mai lo’u toalua ia te a’u e fai i la’u lauga i le konafesi, o nisi taimi e manaomia ai ona tatou “amata.”

Ina ua ma auauna atu ma Isabelle o ni taitai misiona i le Misiona a Farani Lyon, sa manaomia ona ou fuafua po o fea e tatau ona o i ai faifeautalai taitasi i totonu o le misiona ma le taimi e fai ai le tofiga. Sa ou iloaina o le a taialaina a’u e le Agaga pe afai ou te tatalo mo se fesoasoani ona faaaoga lea o la’u faamasinoga sili. Ona oo mai lea o le faamaoniga i le taimi lava e faatulaga ai mea uma.

I lo’u valaauga o i ai nei, ua auina atu ai a’u i siteki i le Ekalesia atoa e toe faatulaga au peresitene o siteki. A o ma faatalanoaina ma la’u soa tagata taitoatasi, e i ai o ma manatu, lagona, ma uunaiga e oo mai ia i ma’ua. Ona ma fefautuaa’i lea ma tatalo faatasi. Mulimuli ane, e oo mai faaaliga, ma faamautu mai e le Alii ia i ma’ua lē ua Ia valaauina e auauna atu.

O se faagasologa le iloaina o le taimi e fetalai mai ai le Atua ma iloa ai Lona finagalo. E tatau ona tatou faaalia ua tatou naunau e galulue ma le faatuatua ma faalagolago [ia te Ia].

O se tasi o auala taua e fetalai mai ai le Atua i Ana fanau e ala lea i perofeta. O le i ai o se perofeta i le lalolagi i aso nei o se tala fiafia tele! Na te mauaina faaaliga mai le Atua e taitai ma taiala ai le Ekalesia (tagai i le Amosa 3:7). E mafai foi ona tatou maua le taitaiga ma le puipuiga e ala i le mulimuli i ana aoaoga. E le faigofie i taimi uma lenei mea, ae ua faatonuina i tatou e le Alii e mulimuli i le perofeta “i le onosai ma le faatuatua atoa” (Mataupu Faavae ma Feagaiga 21:5).

“O Le Aiga: O Se Folafolaga i le Lalolagi,” mo se faataitaiga, ua faamaonia le faaperofeta talu ona faalauiloa mai i le 30 tausaga ua mavae. E talanoaina ai le tele o popolega tatou te lei iloaina o le a oo mai ia i tatou ma tuuina mai ai le taitaiga tatou te lei iloaina o le a tatou manaomia—ae ua tatou maua nei. Atonu e lē o taimi uma e tatou te manana’o ai e faalogo i le ta’ita’iga a le perofeta. Atonu e le ogatasi ma tulaga faatauaina o loo i ai nei a le lalolagi. E tusa lava po o le a, o le a taitaia ma puipuia i tatou pe a tatou mulimuli i le perofeta.

Fai Fesili ma Saili Tali

I le popofou o le Toefuataiga, sa masani ona fetalai mai le Atua e tali ai fesili faamaoni sa i ai i le Perofeta o Iosefa Samita ma isi. A o galulue Iosefa ma Oliva Kaotui i le faaliliuina o le Tusi a Mamona, sa la tau atu i aoaoga a le Faaola e uiga i le aoaoga faavae o le papatisoga (tagai i le 3 Nifae 11:23–33). Sa la’ua mananao e aoao atili ma o atu i le togavao e tatalo. E lei umi, ae faaali mai Ioane le Papatiso ma toefuatai mai le pule e papatiso ai e ala i le faatofuina mo le faamagaloina o agasala.

I se isi taimi, na faaalia ai e le faletua o Iosefa o Ema, le popole i le gasu na tuua e alii o e ulaula paipa ma lamuina tapaa i taimi o fonotaga. Sa ave e Iosefa le mataupu i le Alii ma maua ai se faaaliga—“o se Upu o le Poto” (Mataupu Faavae ma Feagaiga 89:1)—e uiga i faiga maloloina mo le manuia faaletino ma le faaleagaga o fanau a le Atua.

O nei faataitaiga—ma le tele o isi—e faamanatu mai ai ia i tatou e le afaina le i ai o ni fesili pe afai tatou te sailia tali i le auala sa’o. Afai tatou te aveina a tatou fesili i le Alii, o le a tatou maua tali. O nisi taimi o le a oo mai ai tali i le taimi e tasi. Peitai, o le tele o taimi, e oo mai tali i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30). Atonu e manaomia ona tatou faatalitali mo tali e fesoasoani ia i tatou e aoao ai ma tuputupu ae, ae o le a tali mai le Atua ia i tatou e tusa ai ma Lona lava finagalo, ala, ma le taimi.

Pe a tatau ona tatou faatalitali mo le Atua e fetalai mai ia i tatou, e taua lo tatou pipiimau i mea ua tatou iloa ma aafiaga ua tatou maua. Atonu i se isi itu e ono aveesea ma i tatou. Tatou te le mananao e masalosalo i aafiaga ua tuanai ma le Agaga ona atonu o loo tatou tauivi nei. I na taimi, e tatau ona tatou toe foi i o tatou mafaufau ma manatua o tatou lagona ina ua tatou lagonaina le latalata atu i le Atua.

Sa fesili atu e Alema nei fesili su’esu’e i se tasi taimi i tagata i Saraemila:

“Ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto? …

“Ma o lenei faauta, ou te fai atu ia te outou, … afai ua oo ia te outou se liuga o le loto, ma afai ua outou lagona le fia lagiina o le pese o le alofa togiola, ou te fia fesili atu, e mafai ea ona outou lagonaina nei?” (Alema 5:14, 26).

E tatau ona tatou mautinoa tatou te manatuaina aafiaga faaleagaga ae le tuleia ese. E tatau ona tatou fesili ifo e le aunoa ia i tatou lava, “E mafai ea ona ou lagonaina nei?” O lenei mea e faamalosia ai i tatou i taimi e foliga mai ai e lē leoa le Atua. E sili atu foi ona tatou iloa taimi e fetalai mai ai o Ia ia i tatou.

O le fesootaiga ma lo tatou Tama Faalelagi o se mea e ola. Tatou te faia la tatou vaega e faatumauina ai le ola e ala i le saili ma le mataalia mo ma fatuina ni avanoa mo fesootaiga faalelagi. E mafai ona tatou tatalo e lē aunoa ma le faatauanau i le Atua mo le filemu, faamafanafanaga, ma le taitaiga. E mafai ona tatou suesue i Lana afioga i tusitusiga paia ma lagona le uunaiga a le Agaga. E mafai foi ona tatou mulimuli i le taitaiga faaperofeta.

A o tatou fesootai pea ma lo tatou Tama alofa o i le Lagi, e mafai ona avea i tatou ma meafaigaluega i Ona aao e fesoasoani ai ia te Ia i Lana galuega ofoofogia. O le utagia o malamalamaaga ma uunaiga tatou te maua, e mafai ai ona tatou fesoasoani i isi ia lagona e silafia ma alofa le Atua ia i latou ma e finagalo e talanoa atu ia i latou.

O le faamautinoaga e faafofoga ma fetalai mai le Atua i Ana fanau o se faamanuiaga maoae. O fesootaiga paia e le aunoa ma Ia e maua ai le taitaiga tatou te manaomia e faafoe ai le malaga o le olaga.