E Finagalo le Tama Faalelagi e Saunoa mai ia te Oe

Ia Atamu ma Eva ma i latou uma o le a mulimuli ia i laua, sa faatonuina ai e se agelu, “Ia e salamo ma valaau atu i le Atua i le suafa o le Alo e faavavau” (Mose 5:8).

Na a’oa’o mai Iesu: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou” (Mataio 7:7). “Pe a e tatalo, … tatalo i lou Tama … i le mea lilo” (Mataio 6:6). “O lenei ia faapea outou ona tatalo: Lo matou Tamā e, o i le lagi, ia paia lou suafa” (Mataio 6:9).

Sa tatalo atu pea Iesu i Lona Tama. “O aso lava ia ua maliu ae ai o ia i le mauga e tatalo, ua aoina lana tatalo i le Atua” (Luka 6:12). “Ona … maliu atu lea o ia i le mauga e tatalo” (Mareko 6:46). “Ua latou oo atu i le fanua o Ketesemane lona igoa: ona fetalai atu lea o ia i ona soo, Ina nonofo ia outou iinei, sei ou tatalo” (Mareko 14:32). A o i ai i luga o le satauro, sa tatalo Iesu mo fitafita na faasatauroina o Ia: “Lo’u Tama e, ia e faamagaloina atu ia te i latou; auā ua latou le iloa le mea ua latou faia” (Luka 23:34).

Ua fautuaina i tatou e tusitusiga paia ia “tatalo e le aunoa” (Luka 21:36; 2 Nifae 32:9; 3 Nifae 18:15; Mataupu Faavae ma Feagaiga 10:5; 19:38; 20:33; 31:12). “Filifili faatasi ma le Alii i au mea uma e fai, ma o le a ia taitai oe mo le lelei” (Alema 37:37). E le gata i lea, tatou te “avatu le faafetai ma le viiga atoa ua i ai i o [tatou] agaga atoa le mana e maua ai” (Mosaea 2:20), ma le iloaina o mea uma e faia e lo tatou Tama mo i tatou.

Na faamalamalama mai e Peresitene Russell M. Nelson: “O le taua faaleagaga o le tagata lava ia e amata i le iloaina o taeao fou taitasi o se meaalofa mai le Atua. … Na te faasaoina i tatou mai lea aso i lea aso, ma lagolago i tatou mai i lea taimi i le isi (tagai i le Mosaea 2:21).”

Na faapea mai Nifae, “Ona a na tou faalogo i le Agaga ua ia aoaoina le tagata ia tatalo, po ua outou iloa e tatau ona outou tatalo; ona e lē aoaoina e le agaga leaga se tagata ia tatalo, ae na te aoao atu ia te ia e lē tatau ona tatalo o ia” (2 Nifae 32:8).

Faamatalaga mai le O Keriso o loo Faatuina le Afafine o Iairo, saunia e Greg K. Olsen

Faatasi ai ma le faataitaiga a lo tatou Faaola ma fautuaga a agelu ma perofeta i le tele o seneturi, ua tatou iloa manino ai ia tatalo i aso taitasi e faailoa atu le agaga faafetai mo o tatou faamanuiaga, ma ia faatumauina se tatalo i o tatou loto e le aunoa. Ua ia i tatou le tiutetauave e fesootai ai ma lo tatou Tama.

Ae o le mea e sili atu ona mamalu, e tali mai lo tatou Tama oi le Lagi i a tatou tatalo. O se fesili mafaufau loloto i lenei lalolagi faaletino o le, e faapefea ona tatou maua ma malamalama lelei i tali, taitaiga, ma le faamafanafanaga e sau mai lo tatou Tama?

I le silia ma le fitu sefulu tausaga o lo’u olaga, ua ou iloa ai o loo fetalai mai lo tatou Tama ia i tatou. E lē o tuua na o i tatou. E leoleoina i tatou e tagata faalelagi ma fesoasoani ia i tatou a o tatou saili e mulimuli i le Faaola.

O le mauaina o tali i a tatou tatalo e amata i lo tatou faatuatua i lo tatou Tama Faalelagi ma Lona Alo, o Iesu Keriso. Na fetalai Iesu, “Aua e te mata’u, tau lava ina e faatuatua” (Mareko 5:36). Tatou te faalagolago ia te Ia, faia le mea sili tatou te mafaia e tausi ai poloaiga, ma vaavaai mo Lona aao i mea uma. “Ua leai se mea e faatausuai ai le tagata i le Atua … sei vagana ai i latou o e latou te lē tautinoina lona aao i mea uma, ma lē usiusitai i ana poloaiga” (Mataupu Faavae ma Feagaiga 59:21).

O le aao o le Atua i o tatou olaga e le faapea ai ua Ia faatupuina mala leaga po o mala matautia o loo i ai i lo tatou lalolagi. Ae peitai, o lona uiga i taimi o ou faigata ma le lē tonu, o le a Ia tu atu ia te oe, faamalosia ou tomai, faamafanafanaina oe, ma “faapaiaina ou puapuaga mo lou manuia” (2 Nifae 2:2).

A o tatou faatuatua ia te Ia ma tausi Ana poloaiga, e masani lava ona tatou aoao ina ia lelei atu lo tatou faalogo i Lona siufofoga.

Ia Setema 1993, o lo’u tausaga muamua o se Pulega Aoao, na valaaulia ai i ma’ua ma Peresitene James E. Faust (1920–2007), o le sa avea ma se tasi o le Korama a Aposetolo e Toasefululua, ma lo’u toalua o Kathy, e auai faatasi ma ia i se faigalotu a le Iunivesite o Polika Iaga. Ia manatua, o le 1993 na muamua atu a o le’i faateleina le mauaina o telefonipoto, ala o faasalalauga faaagafesootai, ma le Initoneti.

I lana lauga, ua faaulutalaina “O Le Siufofoga o le Agaga,” na lapatai mai ai Peresitene Faust: “I la outou tupulaga o le a faatumulia outou i le tele o leo o loo ta’u atu ia te outou le auala e ola ai, le auala e faamalie ai o outou tuinanau, le auala e maua ai mea uma. O le a oo atu i le lima selau alaata o televise i ou tamatamailima. O le a i ai ituaiga uma o polokalama faakomepiuta, faaleotele leo fesootai faakomepiuta, utuofaamatalaga, ma laupapa o faamatalaga; o le a i ai le lomiga o komepiuta, masini satelite, ma fesootaiga o fesootaiga o le a faaleagaina ai oe i faamatalaga. … O le leo e tatau ona e aoao e faalogo i ai o le siufofoga lea o le Agaga.”

Na aoao mai Peresitene Boyd K. Packer (1924–2015), Peresitene o le Korama a Aposetolo e Toasefululua, e uiga i le leo filemu ma le itiiti o le Agaga i le toe faamatalaina o se aafiaga o John Burroughs, o se tagata e suesue i le natura, a o savavali atu o ia ma ana uo i se paka sa faatumulia. O upu nei a Peresitene Packer:

“I luga a’e o leo o le olaga i le aai na faalogoina e [Mr. Burroughs] le pese a se manulele.

“Sa tu o ia ma faalogo!. E le’i faalogo i ai i latou na faatasi ma ia. Sa vaavaai solo o ia. E leai se isi na matauina.

“Sa faalavelave ia te ia le tatau ona misia e tagata uma se mea matagofie tele.

“Sa ia aveina se tupe siliva mai lana taga ma fiti i le ea. Na tau i le auala ma se tatagi, e lei leotele atu nai lo le pese a le manulele. Sa liliu tagata uma; na mafai ona latou faalogoina lena mea!

“E faigata ona tuueseese mai leo uma o taavale o le aai le pese a se manulele. Ae e mafai ona e faalogo i ai. E mafai ona e faalogo manino i ai pe afai e te aoaoina oe lava e faalogo i ai.”

O aoaoga a Peresitene Packer e uiga i le Agaga Paia na tupu i le 1979, o se taimi sa sili atu ona filemu le olaga ma sa sili atu ona pulea le pisapisao o le lalolagi nai lo le taimi nei.

Na a’oa’o mai Peresitene Nelson, “Afai e tele atu lou gauai i faamatalaga mai faasalalauga faaagafesootai nai lo musumusuga a le Agaga, ua e tuuina oe lava i se tulaga matautia faaleagaga.”

Na saunoa Peresitene Faust, “Afai tatou te faalogo i le siufofoga o le Agaga, e tatau foi ona tatala o tatou taliga, liliu atu le mata o le faatuatua i le puna o le leo, ma vaavaai atu ma le mausali i le lagi.”

O lenei siufofoga o le Agaga e oo mai i lo tatou mafaufau ma o tatou lagona. “O le a Ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (Mataupu Faavae ma Feagaiga 8:2). Faalogo i lou lotofuatiaifo—e masani ona amata faaaliga iina.

Tatalo ma se Loto Talitonu

E le mafai ona faamalosia tali ma uunaiga. Tatou te tatalo ma faatalitali ma se loto talitonu. O nisi tali o le a le oo mai i lenei olaga, ae i e amiotonu, o le a auina mai pea e le Alii Lona filemu (tagai i le Ioane 14:27). E masani ona oo mai tali pe a tatou tatalo e fesoasoani ia i latou o loo siomia i tatou. E i ai taimi, e oo mai i latou i “lea fasifuaitau i luga o lea fasifuaitau, o lea mataupu i lea mataupu” (Mataupu Faavae ma Feagaiga 98:12).

E mafai ona oo mai le siufofoga o le lagi ia i tatou i taimi e lei faamoemoeina ma i nofoaga e lei faamoemoeina, ae tatou te maua o tatou avanoa sili ona iloagofie i avanoa filemu ma nofoaga paia. I le filemu o a’u tatalo ma manatunatuga i le taeao po, ua ou maua ai faamanuiaga e le masani ai. O se faitauga o tusitusiga paia i aso taitasi, patino, ma le le faalavelaveina, a o faia soo i nisi taimi, e aumaia ai le siufofoga o le Agaga i o tatou loto e pei o le afi i isi taimi.

E i ai taimi, e faapitoa lava uunaiga mai mea o loo tatou faitauina, ma i isi taimi, o mea o loo tatou mafaufau loloto i ai e aumaia ai se tali i se popolega e matuai ese lava. Manatua upu a Elder Robert D. Hales: “A tatou mananao e talanoa i le Atua, tatou te tatalo. Ma a tatou mananao ia te Ia e fetalai mai ia i tatou, tatou te suesue i tusitusiga paia.”

A o faataavili solo i o tatou autafa le pisapisao ma mea faalavefau o le lalolagi, ua faatonuina e le Alii Lana perofeta e fausia le tele ma le tele o malumalu. I nei maota paia o le Alii, a o tatou tuua o tatou luitau i fafo ae ulu atu ma a tatou tatalo ma popolega, e aoaoina i tatou i upumoni o le faavavau.

I le tausaga talu ai, na tuuina mai ai e Peresitene Nelson ia i tatou le folafolaga ofoofogia lenei: “Ou uso e ma tuafafine pele, o la’u folafolaga lenei. E leai se isi mea o le a sili atu ona fesoasoani ia te oe e pipiimau ai i le ai uamea nai lo le tapuai e le aunoa i le malumalu e pei ona faatagaina ai e ou tulaga. E leai se mea e sili atu ona puipuia oe a o e fetaia’i ma puao pogisa o le lalolagi. E leai se mea o le a faamalosia ai lau molimau i le Alii o Iesu Keriso ma Lana Togiola pe fesoasoani ia te oe e sili atu onae malamalama ai i le fuafuaga ofoofogia a le Atua. E leai se mea o le a sili atu ona faamāfanafanaina ai lou agaga i taimi o tiga. E leai se isi mea o le a sili atuona tatalaina le lagi. Leai lava se mea!”

O konafesi aoao taitasi e aumaia ai faamanuiaga faaopoopo e tele. I le masina a sau o Aperila, o le a tatou toe faatasitasi ai i le konafesi aoao e faalogo i le siufofoga o le Alii. Tatou te o mai i le konafesi aoao ua uma ona tatalo ma ua saunia. Mo i tatou taitoatasi, e i ai ni popolega e manaomia vave ni tali, ma ni fesili aupito faamaoni. Tatou te omai ia faafou lo tatou faatuatua i lo tatou Faaola, o Iesu Keriso, ma ia faamalosia lo tatou gafatia e tetee atu ai i faaosoosoga. Ua tatou o mai ina ia aoaoina mai lugā. Ou te folafola atu ia te outou a o outou sauniuni ma o mai ma le agaga tatalo i sauniga o le konafesi aoao, o le a outou lagonaina tali i o outou popolega, ma o le a outou iloa ai o loo i o outou luga le “aao o le lagi”.

Ia e faatuatua o loo fetalai mai lou Tama Faalelagi ia te oe. O lea lava! Ia tuu atu i lou faatuatua ia te Ia ma Lona Alo Pele e fesoasoani ia te oe e vaelua ai le veli ma maua ai le siufofoga o lou Tama. Ou te molimau atu o loo i ai o Ia iina ma e sili atu lona alofa ia te outou nai lo upu e mafai ona ta’ua.