“Faae’eina i le Mana mai Luga,” Liahona, Mat. 2025.
Vaaiga Faasolopito i le Maota o le Alii
Faae’eina i le Mana mai Luga
E pei o soo i le Feagaiga Fou, na folafola atu i le Au Paia o Aso e Gata Ai se faaeega paia o le mana mai le Alii.
I le tautotogo o le 1836, sa avea ai Charles Rich ma se faifeautalai o loo talaiina le talalelei toefuataiina i Ohaio i saute. Sa tatau ona le fiafia o ia ona sa taunuu o ia i Katelani, Ohaio, i le aso 12 o Aperila—pe tusa ma le lua vaiaso talu ona uma le faapaiaga o le Malumalu o Katelani.
Sa malaga o ia i le vaa karasini i luga o le Vaitafe o Ohaio ona savali lea i le toeitiiti 100 maila (160 km). Sa ia vaaia le maota o le Alii i luga o se tulaga masani i le laufanua faatasi ai ma ona puipui lanumoana ma le taualuga lanumumu. Ae sa tuai o ia. Sa ia misia le faapaiaga, le faapotopotoga paia, ma, sa ia manatu, ua misia foi e ia ia faae’ega paia folafolaina o le mana mai luga.
Ia Setema 1830, i ni nai masina talu ona faatulagaina le Ekalesia toefuataiina, na maua ai e Iosefa Samita se faaaliga mai ia Iesu Keriso e valaauina ai tagata o le Ekalesia e faapotopoto (tagai i le Mataupu Faavae ma Feagaiga 29:7–8). I ni nai masina mulimuli ane, na faaali mai ai e le Alii le mafuaaga. Sa tatau ona “o atu le Au Paia i Ohaio,” lea, na tautino mai ai e Iesu, “o le a Ou tuu atu ai ia te outou la’u tulafono; ma o iina o le a faaeeina ai outou i le mana mai luga; ma mai iina, o soo se tasi Ou te loto i ai, o le a o atu i totonu o atunuu uma” (Mataupu Faavae ma Feagaiga 38:32–33; faaopoopo le faamamafa). O tagata o le Ekalesia o e na faalogo i lenei faaaliga na semanu e iloaina lenei gagana e sau mai le Feagaiga Fou.
O So’o o le Feagaiga Fou sa Faae’eina i le Mana
O leLuka 24 e amata i se taimi o le faanoanoa. Sa faasatauroina Iesu, ma sa toe foi atu se vaega o Ona soo tamaitai i Lona tuugamau. Sa latou iloa ai ua fuli ese le faitotoa maa, ma sa latou “lei iloa le tino o le Alii o Iesu” (fuaiupu 3). E lei umi ae tuuina atu e agelu avefeau ia i latou le faamoemoe: “E le o iinei o ia, a ua tu” (fuaiupu 6).
Mulimuli ane, na faaali mai le Alii toetu i Ona so’o ma auauna atu ia i latou. Na Ia tuuina atu ia i latou mea ua iloa e Kerisiano i le lalolagi atoa o “le Tofiga Sili” e tala’i atu le talalelei a Iesu Keriso. Sa faamalamalama mai e Iesu e faapea “Ina ia tala’iina foi le salamo ma le faamagaloina o agasala i nuu uma i lona igoa” (fuaiupu 47).
Ae peitai, sa Ia faatonuina Ona so’o ia aua nei o ese vave: “Ia outou nonofo i le aai o Ierusalema, seia maua e outou le mana mai luga” (fuaiupu 49). Endued (po o le “endowed” i le gagana Peretania i ona po nei) o se faaliliuga o le upu Eleni o lona uiga “ia faaofu.” Sa tatau i so’o anamua o Keriso ona faatalitali i Ierusalema seia oo ina faaofuina i latou i le mana mai lugā. Ona latou fausia lea o le malo o le Atua i le lalolagi atoa.
A o lei afio a’e o Ia i le lagi, sa fetalai atu le Alii i Ona so’o, “Ia outou nonofo i le aai o Ierusalema, seia maua e outou le mana mai lugā” (Luka 24:49).
Ua Faae’eina le Au Paia o Aso e Gata Ai i le Mana
Sa faapotopoto le Au Paia o Aso e Gata Ai i Ohaio i le vaitau o le 1830 ma se faamoemoega faapena. Sa latou tulimatai atu i le “faae’eina i le mana mai luga” (Mataupu Faavae ma Feagaiga 38:32) ma ave le sāvali a Iesu i le lalolagi atoa. Mulimuli ane, na folafola mai e le Alii e faapea o le Au Paia “ua tatau ona maua o latou faae’ega mai lugā i lo’u fale” (Mataupu Faavae ma Feagaiga 105:33, faaopoopo le faamamafa; tagai foi i fuaiupu 11–12). Ae, o le toatele o le Au Paia anamua sa le iloa lelei le mea e faamoemoeina.
E lei leva ona valaauina ma faauuina le Korama a Aposetolo e Toasefululua i le 1835, ae feiloai Iosefa Samita ma i latou e uiga i le maota o le Alii. Na iloa e Iosefa o le Toasefululua sa “popole” ma sa le mafai ona malamalama i le mea o le a oo mai. Sa ia faamalamalama mai sa latou manaomia se faae’ega paia ina ia mafai ona latou “saunia ma mafai ona faatoilalo mea uma” ma aoao atu le talalelei i le mana. “Pe a faaeeina outou,” na ia faamalamalama mai ai, o le a “talai atu e Aposetolo le talalelei i atunuu uma, ituaiga, ma gagana.”
E lei leva, ae faaali mai e Iosefa Samita sauniga na mamanuina e tusa ai ma le faapaiaga o ositaulaga o le malumalu o Isaraelu anamua. I le sauniuni ai mo le faae’ega paia, sa mulumulu ma faau’uina taitai perisitua uma “i le ituaiga suau’u lava e tasi ma le ala sa i ai Mose ma Arona, ma i latou o e na tutu i luma o le Alii i aso anamua.”
I le taimi lea, o le faae’ega paia o le mana na avea ma se liligiina mai maoae o le mana faaleagaga i le taimi o se fonotaga faapitoa o le potopotoga paia. E pei o Elijah Able—o le uluai Fitugafulu Uliuli i le Ekalesia—o tofi o le perisitua sa anapopogi, tatalo, ma aai i le faamanatuga o le Talisuaga a le Alii e fai ma taumafataga faatasi. Sa latou molimau atu ma vavalo, ma sa faamanuiaina i latou e le Atua i le mana. O i latou o e na mauaina faae’ega paia na o atu e fausia le malo o le Atua e ala i le tala’iina o le talalelei toefuataiina. E ui i tete’ega, ae sa puipuia i latou i a latou malaga, faalauteleina i la latou tala’iga, ma faamanuiaina i o latou aiga.
I Katelani, sa na o alii na auai i le fonotaga a le faapotopotoga paia lea na faae’eina ai i latou i le mana mai lugā. Ae peitai, i ni nai tausaga, na fausia ai e le Au Paia le Malumalu o Navu. O iina na faaalia ai e Iosefa Samita sauniga faalauteleina o le malumalu o le faavae lea mo o tatou aafiaga i le malumalu i aso nei. I Navu, sa faae’eina ai tamaitai ma alii i le mana.
A o saunoa atu i tuafafine o le Aualofa, na folafola atu e Iosefa Samita e faapea, i le faae’ega paia o le malumalu “o ki o le malo” o le a “tuuina atu ia i latou,” e tutusa lava “ma Toeaina.” E ui lava o le a tele tausaga a o lei valaauina tamaitai e avea ma faifeautala’i tala’i, ae o tamaitai ma a latou galuega sa avea ma se mea taua tele i le fausiaina o le malo o le Atua i le lalolagi.
E ui lava ina sa misia e Charles Rich le faapaiaga o le Malumalu o Katelani, ae sa ia iloaina o ia ma nisi o faifeautala’i o e na tuai ona taunuu i Katelani o le a latou mauaina le faae’ega paia. E tusa ai ma le mamanu a faitaulaga Isaraelu anamua (tagai i le Esoto 29; 40), sa mulumulu ma faau’uina o ia. Sa ia faapotopoto faatasi ma isi, anapogi, tatalo, ma taumamafa i le Talisuaga a le Alii.
“Sa matou vavalo i le po atoa,” na tusia ai e Charles. “Sa valoia e faapea, o le faaolataga ua tusia i lima ma sooga uma” o lona tino. “Sa faatumulia a’u i le agaga o valoaga, ma sa faae’eina a’u i le mana mai lugā.”
Sa ia faaaluina lona olaga atoa—47 tausaga—e galue ai o se so’o o Iesu Keriso, e fausia le malo o le Atua.
Talu mai lena taimi, ua malaga atu Au Paia o Aso e Gata Ai i le lalolagi atoa i le maota o le Alii ina ia faae’eina i le mana mai lugā. Ma e pei o nei uluai Au Paia, o le faae’ega paia e saunia ai i tatou e fausia le malo o le Atua o ni so’o o Iesu Keriso ma i se aso e maua ai le faaeaga e ala i Lona alofa mutimutivale ma le alofa tunoa.