Auala e 7 e Fiafia ai i Musika Musuia

Ata na pueina e David Green

I le aluga o taimi, sa avea musika ma se vaega taua o le tapua’iga mo soo o Iesu Keriso.

O le tele o salamo i le Feagaiga Tuai o pese o viiga i le Alii. O loo faamaumauina i le Feagaiga Fou e faapea, o Iesu ma Ana Aposetolo, a o lei agai atu i Ketesemane, sa latou usuina faatasi se viiga (tagai i le Mataio 26:30). Ma o viiga e faaleleia ai la tatou tapuaiga i taimi o sauniga faamanatuga i aso nei.

O le fatuina faifai pea o le tusi pese fou o se mea fiafia, ma e mafai ona tatou tulimatai atu i nisi viiga fou a o agai i luma le faagasologa. Ae o viiga e le na o le pau lea o ituaiga musika e mafai ona musuia ai i tatou. O polokalama o le Potutusi o le Talalelei ma le Sacred Music a le Ekalesia e tele ituaiga musika eseese e maua ai aafiaga, mai musika masani a le aufaipese e oo i musika fiafia, ma faaonaponei (e le tau avea oe ma se talavou e fiafia ai i lipine o le Strive to Be!). I totonu o nei polokalama e mafai ona e maua ai ni musika lelei, musuia, o le tele lava o na musika e aofia ai pepa o musika e mafai ona e taina pe usuina e oe lava.

O nisi nei o manatu e fesoasoani ia te oe e faaaoga ai musika musuia i lau tapuaiga i le fale—e tusa lava pe leai ni au aoaoga faamusika:

• Faalogologo i lipine o viiga ma isi pese musuia i le aluga o le vaiaso. E mafai ona maua nei mea i polokalama o le Gospel Library po o Sacred Music po o le Music Library i luga o le uepisaite a le Ekalesia.

• Suesue i tala o viiga ma aoao po o le a le mea na musuia ai i latou.

• Usu viiga ma aoao vaega eseese e faaaoga ai le filifiliga o le Pepa o Musika Fesootai i luga o le polokalama o Sacred Music po o luga o le uepisaite a le Ekalesia.

• Faalogologo i le Aufaipese a le Tapeneko po o le Strive to Be i le tulaga e te fiafia e faalogologo ai (e pei o le YouTube, Spotify, Apple Music, Pandora).

• Aoao e taina viiga ma isi pese musuia i luga o le piano po o le kitara e faaaoga ai pepa o musika po o pese o loo aofia ai i le polokalama o le Gospel Library po o luga o le uepisaite a le Ekalesia.

• Suesue ma mafaufau loloto i upu o pese ma viiga faagaeetia.

• Mulimuli i upu a o faalogologo i faatinoga a le Aufaipese a le Tapeneko i le Lotoa o le Malumalu. E mafai ona maua faafiafiaga i le alaata o le YouTube a le aufaipese.