O Ai na Faatumuina le Vai Papatisoga?

Ata na tusia e David Miles

Ina ua misi se pasi i Nairobi, Kenya, sa ma filifili ma la’u soa e faasoa atu le talalelei i tagata uma sa ma vaaia a o faatalitali mo se isi pasi i lo ma eria. Sa ma talanoa i le silia ma le 400 tagata.

O se tasi o i latou o Benard, o lē sa faigaluega faufale i se nofoaga e lata ane. Sa ma tuuina atu ia te ia se Tusi a Mamona ma lu’iina o ia e faitau ma fesili atu i le Atua pe moni.

E fa masina mulimuli ane, ae ou siitia atu i Nairobi. I la’u sauniga faamanatuga muamua lava iina, sa ou vaaia ai Benard. Ua uma ona papatisoina o ia ma ua faauuina i le Perisitua Arona.

Sa valaaulia ma le fiafia i matou e Benard e asiasi i lona fale ma aoao lona faletua o Megan. A o matou feiloai ma Megan, sa ma ofo i lona faatuatua tele. Ina ua ia tatalo ia iloa pe moni la ma’ua savali, sa tali mai le Atua i lana tatalo.

Sa ma valaaulia Megan e papatiso i le Aso Sa na sosoo ai. Ae peita’i, i lenā vaiaso, na faasilasila mai ai e le aai o Nairobi o le a tipiina le vai mo aso e 10! Ina ua maea le faatalanoaga o le papatisoga o Megan i le Aso Toonai, sa ma tatalo ma la’u soa ina ia mafai ona faaauau lona papatisoga i le aso na sosoo ai.

Sa matou anapopogi, fefautuaai ma o matou taitai, ma taumafai i auala eseese e maua ai le vai—sa leai se aoga o mea uma. O lena afiafi sa matou sauniuni ai lava mo le papatisoga. Ona ma tootuli lea ma toe tatalo. Sa uunaia i ma’ua e faapipii le tasi pito o se faagaau i le paipa pe o le umukuka o le falelotu ma tuu le isi pito i le faatanoa papatisoga. Sa ma faia se isi tatalo, loka le falesa, ma o atu i le fale.

O le taeao na sosoo ai ina ua matou o i le falelotu, sa matou maofa i le tumu o le faatanoa i le vai! Sa matou siakiina le paipa o le umukuka, ae sa leai lava se vai na sau i fafo. E leai se tasi mai le paranesi na iloa se auala na faatumuina ai le vai papatisoga.

Na papatiso Megan i lena aso. Na o mai le uarota atoa e molimauina lona papatisoga ma faafeiloai o ia i le Ekalesia. Sa tumau pea le matutu o le paipa, ae sa susu mata o tagata uma i le lotofaafetai.

Na aoao mai Peresitene Russell M. Nelson, “O le a faamanuia ai e le Alii oe faatasi ma vavega pe afai ‘e te talitonu ia te Ia, ma lē masalosalo i se mea’ [Mamona 9:21]. Fai le galuega faaleagaga e saili ai vavega.” Ou te iloa ona sa ma faia ma la’u soa le galuega faaletino ma le faaleagaga—tatalo, faataitai ni filifiliga eseese, ma mulimuli i uunaiga faaleagaga—sa ma vaaia ai se vavega mai le Alii.