O Le Olioli ma le Taua o Aiga

“O la’u fanau, fanau a la’u fanau, ma fanau o fanau a la’u fanau … o nisi ia o olioli silisili i lo’u olaga.

“A o e faia ni faaiuga e uiga i lou olaga ma lou aiga—po o lou aiga i le lumanai—faamolemole ia manatua o oa silisili i le lalolagi ma le lagi o o tatou alo ma a tatou fanau.

“Ou te faafetai atu i aso uma i se Tama Faalelagi alofa o le ua faamanuiaina a’u i lenei aiga ou te alofa tele i ai.”

“I tina i soo se mea o e ositaulaga mo o latou aiga, ou te fia fai atu … e le o le iloa la outou osigataulaga—e le o le iloa e taitai o le Ekalesia ma e le o le iloa e lo tatou Tama oi le Lagi o lē e saili pea le tausiga o Ana fanau.

“Pe a uma lenei vaega faalelalolagi o o tatou olaga ma ua mou ese atu mamalu uma o le lalolagi, ou te talitonu atonu o tina amiotonu o e na muai faalogo i upu, ‘Ua lelei, auauna lelei ma le faamaoni e: … ulu atu i [lo’u malologa]’ (Mataio 25:21).”

“E ui lava o uluai tausaga o lo’u olaga sa luitauina ona o le taua ma ona popolega e fesootai ai, ae sa matuai faamanuiaina lava a’u i le avea ai ma se vaega o se aiga e alofa ia te a’u. …

“I nei tausaga popofou, sa le’i faailoaina atu lo’u aiga i le talalelei toefuataiina a Iesu Keriso. Sa o se taimi sa sili ona faigata. Ae o loo i ai pea ni o’u manatuaga fiafia i nei nofoaga ona o le alofa o aiga, uo, ma tuaoi.

“Atonu o nisi o outou matua (po o i latou o le a i ai se aso e avea ai ma matua) o loo popole i le lalolagi o loo outou aumaia ai a outou fanau. Ou te fautua atu afai tou te taulai atu i le tausia o lau fanau i le alofa faaKeriso ma aoao i latou ia alolofa i lo tatou Tama oi le Lagi ma le Faaola o Iesu Keriso, o le a faamalosia i latou i le tomai e faafoe ai luitau uma o le olaga. O le a mafai ona latou lagona le olioli ma le filemu lea e oo mai i le ola ai i le talalelei a le Faaola e ui lava i faigata.”

“E mafai ona maua faaipoipoga e faavavau ma aiga e faavavau ona o feagaiga tatou te osia ma le Atua i Ona malumalu paia. Ou te valaaulia i tatou uma ina ia avea le faaipoipoga i le malumalu o se mea e faamuamua. O i latou uma o e naunau e osi feagaiga ma le Atua ma le tasi ma le isi, ua valaaulia e auai i sauniga o le malumalu lea e fusia faatasi ai i tatou. O aiga, e moni lava, e faavavau ma e totonugalemu i le fuafuaga a le Atua.”

“O le fuafuaga a lo tatou Tama e faatatau i aiga. O le a le fiafia tele le faavavau e aunoa ma i latou. …

“Sei ou faamautinoa atu ia te outou afai ua e faaipoipo pe o nofofua, i ai se aiga toatele po o se aiga toalaiti, o loo avea pea oe ma se vaega o le aiga o le Alii. Ou te olioli ona o le ata sili o le faaolataga ua lava le telē mo fanau uma a le Tama Faalelagi. Ma ou te matua faafetai lava ona o le fuafuaga a le Atua ua saunia ai se auala mo sootaga faaleaiga e oo atu i tala atu o le tuugamau. Ou te molimau atu a tatou toe foi atu i le afioaga o le Atua, o le a tatou faatasia e faavavau ma i latou e sili ona tatou alolofa i ai.”

“E toatele ulugalii talavou e popole i le tausia o fanau i le tulaga o le lalolagi i aso nei.

“I ni nai tausaga ua mavae, sa fesili mai ai se tasi o le ma fanau teine talavou ua faaipoipoina ma lona toalua ia i ma’ua ma Sister Rasband i le fesili taua tele lenei, e tosina ai le olaga:

‘Pe o saogalemu ma atamai pea le aumaia o fanau i lenei lalolagi e foliga mai e amioleaga ma taufaafefe o loo tatou ola ai?’ O le ma tali ia i laua o se ‘Ioe, [mausali] e sili atu nai lo le OK,’ a o matou fetufaai i aoaoga faavae o le talalelei ma a ma’ua uunaiga faamaoni ma aafiaga o le olaga.

“Na silafia e le Alii o le a i ai taimi i o tatou olaga o le a tatou lagona ai le fefe. Sa ou i ai iina ma e faapena foi outou.

“Ua aoao i tatou i le Alii i tusitusiga paia: ‘Aua e te fefe: aua ou te ia te oe: aua le fetepatepai; aua o a’u o lou Atua: ou te faamalosia oe; e moni ou te fesoasoani ia te oe; e moni ou te taofia oe i lo’u lima taumatau e i ai le amiotonu’ (Isaia 41:10).

“Sa mafaufau loloto le ma afafine ma le atalii faaletulafono i le matou talanoaga i lena po; sa la tatalo ma anapopogi ma oo ai i sa la’ua lava faaiuga. O le fiafia ma le olioli mo i laua—ma mo i ma’ua o matua matutua—ua avea nei le ma tama teine ma tina o se fanau lalelei e toafitu.

“Ioe, ua tatou ola i taimi faigata, ae a o tatou mulimuli i le faataitaiga a lo tatou Faaola, e le tatau ona tatou matatau. Ou te tatalo a o tatou faia faapea, o le a outou le atuatuvale i taimi ua tatou ola ai po o faafitauli e oo mai ia i tatou.”

“O nai tofiga e lauga mulimuli atu nei, na ou lagona ai le uunaiga e faaaofia ai le manatu faapea o o tatou valaauga, galuega, aoga, ma isi taumafaiga agavaa ua fuafuaina e faamanuia ai a tatou sootaga—a tatou sootaga ma le Atua, aiga, ma le tasi ma le isi. Na saunoa Peresitene Russell M. Nelson, ‘O le ala o feagaiga e faatatau uma i la tatou sootaga ma le Atua.’ O nei vaega eseese o o tatou olaga o se auala lea mo lena faamoemoega, e fafaga ma faamanuia ai sootaga e faavavau.

“O o tatou valaauga e auauna atu ma faamanuiaga ua tuuina atu i o tatou aiga e sili atu ona fesootai nai lo le mea atonu tatou te iloaina. E le mafai ona tatou tuueseeseina ia mea e lua. E pei lava ona aoao mai e le mau i le Mareko ia i tatou le mataupu faavae e faapea ‘na faia le sapati mo le tagata, ae le o le tagata mo le sapati’ (Mareko 2:27), o o tatou valaauga, tofiga auauna atu, galuega, ma aoaoga ua fuafuaina e faamanuia ai i tatou ma la tatou sootaga o le feagaiga ma le Atua—ma, e faapea foi, i isi a tatou sootaga uma.

“… A tatou vaai i nei vaega o o tatou olaga o ni auala ua faamoemoe le Atua e faamanuia ai la tatou sootaga ma Ia ma isi, e mafai ona tatou maua le uunaiga, taitaiga, malamalama, malosi, fiafia, ma le filemu faalelagi.

“Matou te alolofa ia te outou ma tatalo o le a faamanuiaina outou a o outou atiina ae la outou sootaga patino o le feagaiga ma le Atua.”

“E fitu tausaga talu ona maliu o ia, na ou maua ai se feau tusitusia mai lo’u atalii—pe na tai faapena.

“Na faatoa faamanatuina e le atalii talavou o lo’u atalii (lona atalii) se aso fanau ma sa tuuina atu i ai le telefoni tuai a lona tamā o se meaalofa.

“Ma ou te le’i faafouina lava faamatalaga e faafesootai ai.

“O le fia iloa ai po o a ma tala na fai ma lo’u atalii i le tasi ma le isi i aso mulimuli o lona olaga, na amata ai ona ou save’u faasolosolo i tusitusiga ua tuanai.

“Sa ou vaaia le tele o savali pupuu e uiga i feau ma mea e tutupu a le aiga. Na faanoanoa lo’u loto i le umi o tau su’e se tusiga na faapea mai, ‘Ou te alofa ia te oe.’

“Sa ou iloaina sa ia iloaina na ou alofa ia te ia, ae sa ou mafaufau pe na ou misia le avanoa e fai atu ai mo le taimi mulimuli.

“Talu mai lena taimi, sa ou taumafai ai e faaiu ia feau tusitusia uma i le ‘Faafetai lava’ po o le ‘Ou te alofa tele ia te oe.’

“Ou te manao ia e tu i le taimi nei ma siaki au feau tusitusia.

“O nisi taimi tatou te pisi tele ai e ta’u atu i le tasi ma le isi mea faanatinati ma galo ai ona tatou fai atu le mea aupito sili ona taua: Ou te alofa ia te oe.

“Ou te valaaulia outou e tesi atu pe ta’u atu i tagata e te alofa i ai ma nonofo faatasi le tele o lou popole mo i latou.

“Aua nei tatou faatali mo se isi sekone e faailoa atu ia i latou lo latou taua tele ia i tatou.

“Tesi ia i latou. Ta’u i ai.

“Ou te folafola atu o le a e le faanoanoa ai!

“‘Le au pele e, ia tatou fealofani: aua o le alofa e mai le Atua’ (1 Ioane 4:7).”

Sister Tamara W. Runia, Facebook, 23 Iulai, 2024, facebook.com/youngwomenworldwide.