O Lo’u Ala i le Onosai Tumau

Ata pu’e o le tusitala na pu’eina e Shaun Sutton

Ina ua ou toe foi atu i le aiga i Filipaina i saute i le 2016 ina ua uma ona ou auauna atu i se misiona faamamaluina i Filipaina i matu, sa ou tulimatai atu i le auai i le Iunivesite o Polika Iaga–Hawaii ma oo i isi mea fou uma o loo faatalitali mai i talavou matutua.

Ae peitai, na faafuasei lava ona amata ona faaitiitia lo’u mamafa. Na iloa e la’u fomai le faaletonu o lo’u fa’aī. Sa taufaafefe o ia ia te a’u i le tauina mai o le tulaga e o’o i ai pe afai e lē togafitia le ma’i.

E ui lava i togafitiga, ae na amata ona suia lo’u tino. Sa amata ona fulafula o’u mata, ma sa ou paee tele. Sa ou aloese mai le pu’eina o lo’u ata ma e oo lava i le tilotilo i le faaata ona o o’u foliga vaaia.

Sa amata ona fesoasoani lemu fualaau. Ae i le tolu tausaga mulimuli ane, na iloa ai ua ou maua i se ma’i ogaoga lona lua—o se ma’i o le atuatuvale. O nei ma’i e lua na faoa ai lo’u talitonuina o a’u lava ia. Sa ou tauivi e aluese mai le moega e auai i le aoga, ma sa ou lagonaina le le mafai ona ou auauna atu i le Ekalesia.

Sa ou ita ona ua faatagaina e le Atua lenei mea e tupu. Sa ou mafaufau pe aisea e tatau ai ona ou auauna atu ma lo’u loto atoa ma lo’u agaga atoa pe afai o le faia o lena mea na aumaia ai ni tofotofoga? Ae peitai, sa ou maua le faamafanafanaga mai upu nei a Peresitene Jeffrey R. Holland, o le Sui Peresitene o le Korama a Aposetolo e Toasefululua: “O mafaufau nutimomoia e mafai ona faamaloloina e pei lava ona faamaloloina ai ponaivi nutimomoia ma loto nutimomoia.” Sa ou tagi ina ua ou faalogo i na upu. Sa i ai so’u mafaufau ua nutimomoia lea sa manaomia ai le faamalologa.

Sa ou ola ae i se aiga faamaoni, ma sa tumau pea lo’u faatuatua i le Tama Faalelagi ma Iesu Keriso e ui lava i le tiga ma le le mautonu. Na faasolosolo malie lava ona ou taliaina ma faamasani i o’u tulaga fou.

O lenei, i le valu tausaga mulimuli ane, ua le toe faatelegeseina a’u i o’u ma’i. Ua ou taliaina i latou o se vaega o le olaga. Ua ou lagona le atoatoa. E mafai ona ou auauna atu ma ola atoatoa i le olaga, e ui atonu e faaauau pea luitau o le soifua maloloina i lo’u olaga atoa. Ua ou aoaoina o le tumau ma le onosai o se vaega o le olaga faaletino (tagai i le Mataupu Faavae ma Feagaiga 121:7–8). O loo ou a’oa’o e inu la’u ipu oona ma tumau malosi.

Ua ou faigaluega nei i le matagaluega o tagata faigaluega o se kamupani o le atamai ma e ave a’u vasega i le initoneti i le po mai le Iunivesite o Polika Iaga–Pathway Worldwide. Ua ou le toe fesili “Aisea ua tupu ai ia te a’u?” ma amata ona fesili “O le a se mea e mafai ona ou aoaoina? E mafai faapefea ona ou manuia mai lenei aafiaga?”

O le toe tepa i tua, ua ou iloa ai sa faatasi le Tama Faalelagi ma Iesu Keriso ma a’u i le taimi atoa. O le agai i luma, ua ou iloa ai lē e mafai ona ou faatuatuaina (tagai i le Faataoto 3:5–6; 2 Nifae 4:34).