Mulimuli i le Perofeta

Pe tusa o le 600 T.L.M., ina ua mavae le faaumatiaga o Ierusalema e Nepukanesa, le tupu o Papelonia, na faatagaina ai se vaega to’aitiiti mai le ituaiga o Iuta e nonofo pea i le laueleele, ae o le toatele o isi na ave faatagataotaua i Papelonia. O nisi o i latou na nonofo ai o Ieremia le perofeta ma Ioanana, le atalii o Karea, o se taitai o le autau.

O se taimi faigata lenei ma le matautia mo lenei toe vaega o Iuta o e na maua tonu lava i le ala o malo malolosi e lua na faamoemoe e o mai e faasagatau le tasi i le isi i le taua. Sa feagai tagata ma se faaiuga taua tele: pe tatau ona latou nonofo i Ierusalema, pe, e pei ona mananao ai le toatele, pe tatau ona latou o i Aikupito e nonofo ai? I le sailia o le taitaiga, sa liliu atu ai Ioanana ma le nuu ia Ieremia ma talosaga atu ia te ia e ole atu i le Alii mo i latou, ma fai atu, “Ina ia faasino mai ia te i matou e Ieova lou Atua se ala matou te savavali ai, ma se mea matou te faia” (Ieremia 42).

Sa ioe Ieremia, ma fai mai, “Ou te tatalo ia Ieova lo outou Atua e tusa ma a outou upu; o upu uma foi e tali mai ai Ieova ia te outou ou te ta’u atu ai ia te outou; ou te le natia se upu ia te outou.” Na folafola mai e le nuu, “Ia fai Ieova ma molimau moni ma faamaoni ia te i tatou, pe afai matou te le faia lava e tusa ma mea uma e auina mai ai oe e Ieova lou Atua ia te i matou. Pe lelei, pe leaga, matou te faalogo lava i le siufofoga o Ieova lo tatou Atua.”

Sa sailia e Ieremia le fautuaga a le Alii, ae sa folafola atu e Ioanana ma le nuu e usiusitai i soo se mea e faaalia mai e le Alii. Ina ua mavae aso e sefulu, sa maua e Ieremia le afioga a le Alii. Sa ia faapotopotoina tagata ma tuuina atu le savali: “O loo faapea ona fetalai mai o Ieova … afai tou te nonofo pea i lenei nuu, ona ou atiina ae lea o outou, ae ou te lē lepetia, ou te totoina foi outou, ae ou te lē liaina. … Aua tou te fefefe i le tupu o Papelonia, o lē ua outou fefefe i ai; … auā ou te ia te outou e faaola ia te outou ma laveai ia te outou ai lona lima. … Aua tou te o i Aikupito: ia outou iloa lava, ua ou matua fai atu ia te outou i le aso nei.” (Ieremia 42–43).

Na faapefea ona tali atu tagata i lenei fautuaga mai le Alii e ala mai i Lana perofeta? I tulaga faanoanoa, ua uma ona faia a latou filifiliga. Sa latou sailia le faamaoniga nai lo le taitaiga moni. Sa tuuaia e Asaraia, Ioanana, ma isi taitai faamaualuga ia Ieremia i le pepelo, ma fai mai, “O le pepelo ua e fai mai ai; e lei auina mai oe e Ieova lo tatou Atua, ia faapea mai, Aua tou te o atu i Aikupito e aumau ai.” I le lē amanaiaina o faatonuga a le Alii, sa le usiusitai ai Ioanana, o kapeteni, ma le nuu ma o atu ai i Aikupito. E pei ona valoia, na faaumatia i latou ina ua faatoilaloina e Papelonia Aikupito (Ieremia 43).

E faapefea ona tatou tali atu i upu a perofeta soifua? Na faafofogaina e le Alii tatalo a le toe vaega lenei o Iuta ma tali mai e ala mai i Lana perofeta. O le asō, o loo faaauau pea ona fetalai mai o Ia e ala mai i perofeta soifua ma i latou ua valaauina e taitai. Na folafola mai e le Alii, “Pe i lo‘u lava leo po o i le leo o a‘u auauna, ua tutusa lava” ma folafola mai “o soo se mea o le a latou tautatala atu ai pe a uunaia ai e le Agaga Paia, o tusitusiga paia ia, o le finagalo lea o le Alii, o le mafaufau lea o le Alii, o le afioga lea a le Alii, o le siufofoga lea o le Alii, ma o le mana lea o le Atua mo le faaolataga” (Mataupu Faavae ma Feagaiga 1, 68).

I aso nei, ua siomia i tatou e le anoanoai o leo, o loo tautino mai e i latou taitoatasi a latou lava upumoni ma filosofia. E pei o Korioa i le Tusi a Mamona, o le tele o nei leo ua fai mai e leai se Keriso, e leai se tasi e mafai ona iloa le lumanai, e le mafai ona tatou talitonu i mea e le mafai ona tatou vaai i ai, ma e manuia tagata taitoatasi e tusa ma lona atamai ma manumalo e tusa ai ma lona malosi (tagai Alema 30). O le mulimuli i na leo o le a taitaiseseina ai i tatou. Ae peitai, o i latou o e malolosi faaleagaga ma faalogo i uunaiga a le Agaga Paia o le a le faaseseina. Ae peitai, o se tulaga lamatia sili atu e ono oo mai i le faafiafiaina o nei manatu, lea e ono faatupuina ai lo tatou lē toaaga ma faasamasamanoa i lo tatou avea ai ma soo.

I le Ekalesia Toefuataiina a le Alii, ua faamanuiaina i tatou i le mauaina o le taitaiga a se perofeta soifua, o Peresitene Russell M. Nelson. Mafaufau i lana fautuaga musuia: ia avea le Sapati o se mea fiafia, ia faamuamua le Atua i lou olaga, “Faalogo ia te Ia,” mafaufau faaselesitila, fai le galuega faaleagaga e maua ai faaaliga patino mo le tagata lava ia, talia le mana o le malosiaga faaleagaga, faaaoga le igoa sa‘o o le Ekalesia, suesue i le Tusi a Mamona, avea ma se tagata e faatupuina le filemu, ma faaalu taimi e tele e tapuai ai i le malumalu.

Na aoao mai Peresitene James E. Faust, “Ua folafola mai ia i tatou o le a maua e le Peresitene o le Ekalesia le taitaiga mo i tatou uma o se talifaaaliga mo le Ekalesia. O lo tatou saogalemu e taoto i le gaua‘i atu i mea na te fai mai ai ma mulimuli i ana fautuaga.” Tau ina ia tatou mulimuli uma i le perofeta ma maua faamanuiaga o le lagi.