O Se Aaafiaga i le Viiga o le Faamanatuga

O le tele lava o vaiaso, ou te auai ai i le Sauniga Faamanatuga i la matou uarota ma aai i le faamanatuga e faafou ai a‘u feagaiga o le papatisoga ma maua ai se faamagaloga o a‘u agasala. E masani lava, ou te iloa e faigofie lava ona avea lenei sauniga paia ma se faiga masani, o se mea e mafai ona ou faia e aunoa ma se mafaufau tele i ai. Ae o le tele lava o taimi, e faamanuiaina ai au e le Alii i se aafiaga faaleagaga mamana lea e tumau pea ia te au.

O se tasi o na aafiaga na tupu i le taimi o se konafesi a le Uarota 1 a Park Ridge o le Siteki a Ausetalia Beenleigh. I le taimi lena, sa ou auauna atu o se failautusi fesoasoani a le siteki, e nafa ma le faamaumauina o faamatalaga mo le talafaasolopito o le siteki. Sa ou sau i le sauniga ma la‘u api, ua saunia e faataunuu ai lo‘u tofiga, ae sa ou alu ese ma se lagona faafouina o le faamoemoe ma le lototele.

A o usuina e le faapotopotoga le viiga #99, “E! Ua Maliu le Faaola,” sa matou tau atu i upu nei:

“Tama e, le ipu ave‘esea,

Ae a e loto e inu pea.

Le galuega na e tu‘u mai;

Ua uma nei ona ou fai.

O lo‘u agaga ia e talia ai.”

Na faafuasei lava ona tuia lo‘u loto i nei upu.

Sa liliu atu lo‘u mafaufau i tofotofoga sa ma feagai ai ma lo‘u toalua i le aluga o tausaga. I le tele o tausaga ua mavae, na matuai suia ai lona soifua maloloina ina ua mavae se aafiaga na toeitiiti maliu ai, na taitai atu ai i luitau faaletino mo se taimi umi lea na iu lava ina taofia ai o ia i se nofoa faataavalevale. Mo le sefulu tausaga ua mavae, sa avea au ma ana tausima‘i i taimi uma, e fesoasoani ia te ia e faafoefoeinaina nei luitau, a o tau puleaina foi ou lava faafitauli tau i le soifua maloloina. Sa ma tauaveina faatasi le tele o avega, e aofia ai le lototiga o le vaaia o nisi o a ma fanau ma fanau a fanau ua o ese mai le talalelei. E i ai taimi, sa ou lagona ai ua taumasuasua la‘u “ipu”.

Sa ou lagonaina e i ai sa tatou galuega uma e fai i lenei olaga. Ua tuuina mai ia i tatou taitoatasi a tatou lava ipu e inuina. Pe o se tama, tina, tamaitiiti, po o a tatou galuega, aoga, valaauga, po o tiutetauave faaleaiga, tatou te feagai uma lava ma luitau e mafai ona tofotofoina ai a tatou faaiuga. O nisi taimi, e toetoe lava a le mafai ona inumia lena ipu.

Sa ou mafaufau ia i latou o e atonu o loo feagai ma luitau faaletino, o le leai o se galuega, tauiviga i le aoga, vaisu, po o le tiutetauave mamafa o le tausia o se tagata matua, ma‘i, po o se tagata o le aiga ua le atoatoa le malosi. O nei tofotofoga, e ui lava ina faigata, ae o se vaega o le galuega ua tuuina mai e le Alii ia i tatou. O ni avanoa ia e faamaonia ai lo tatou alofa mo Ia ma i latou o loo siomia i tatou.

I lena taimi, sa ou fesili ifo ai ia te au lava ia i se fesili faamalosiau: “Ua ou saunia e ‘inuina?’”

Na oo mai i lou mafaufau le faataitaiga a le Faaola. I le Faatoaga o Ketesemane, sa tauivi ai foi o Ia i lalo o le mamafa o Lana lava ipu, ma aioi atu, “Lo‘u Tama e, afai e mafai, ia e aveese lenei ipu.” Ae peitai, i le gauai atoatoa atu, sa Ia faaopoopo mai ai, “Aua le faia lo‘u loto ae o lou finagalo.”

O lenei iloaina na ou maua ai se lototele faafouina e fetaomi atu ai i luma ma le faatuatua. Sa ou mafaufau i le aso ou te faamoemoe e tu ai i luma o le Alii ma faalogo i upu, “Ua lelei ia, le auauna lelei e, ma le faamaoni.” Ina ia oo atu i lena aso, ou te iloa e tatau ona faaauau pea ona ou inuina le ipu ua tuuina mai e le Alii ia te au, e tusa lava pe oona.

Ua aoaoina au e le faataitaiga a le Faaola e faapea, o tofotofoga tatou te feagai e le o faamoemoe e nutimomoia ai i tatou ae ia faamamāina ai i tatou. Ua ou malamalama o le “ipu” ua tuuina mai e le Alii ia i tatou taitoatasi e le gata o se tofotofoga o lo tatou faatuatua ae o se valaaulia foi ia faalagolago atoatoa atili i le Togiola ma ia faalagolago i Lana vaaiga e faavavau. E pei o Iopu i le Feagaiga Tuai, ua ou maua le lototele mai le malamalama e silafia e le Atua mea ou te manaomia e faaleleia ai au, e tusa lava pe ou te le iloaina. Ma e ui e masani ona lagonaina le mamafa o a‘u avega, ae e mafai ona ou faapea atu e aunoa ma le masalosalo e le mafai ona faatusalia a tatou avega i mafatiaga na onosaia e le Faaola mo i tatou.

O nei aafiaga ua faalolotoina ai lo‘u alofa mo lo‘u toalua ma faamalosia ai la‘u faaiuga e avea ma se faataitaiga sili atu i la‘u fanau. Ua aoao mai foi a‘u e nei aafiaga ia vaai i le faamanatuga ma ni mata fou, a o ou mafaufau loloto i le tino ma le toto momomo o le Faaola ma manatua le auala na mafai ai e Lona usiusitai atoatoa ona ou onosaia o‘u lava tofotofoga. Sa ou tagi i loimata e tele, aemaise lava i le tuufua o le po, ae i na taimi, sa ou tuuina atu a‘u ma fai atu, e ui lava i le lotolotoi o tiga: “Aua le faia lo‘u loto, a o Lou finagalo.”

I le 76 o o‘u tausaga, ua ou ausia ai le 60 tausaga ma le isi 10 e faaopopo i ai. Ou te le iloa pe fia nisi tausaga ou te ola ai, ae ou te faamoemoe ia maua a‘u o se tagata faamaoni e oo i le iuga. Po o le a lava le “ipu” o loo teuina pea e le Alii mo au, o le a ou inuina ma le loto i ai, ma le iloaina ua uma ona inuina e le Faaola le ipu e sili ona oona mo i tatou uma. Ona o Ia, e le tatau ai ona tatou inuina na o i tatou.