Itulau i le Lotoifale
Na Ia auina mai i matou i Tahaa e auauna atu i lana fanau
O Loo auauna atu nei Elder ma Sister Baehrel, mai le Uarota o Montpeller i le Siteki a Toulouse, Farani, i se misiona o se ulugalii matutua i Tahiti. Sa la faasoaina atu ni aafiaga faagaeetia ma musuia mai o la taimi i le galuega, ma o lenei tala ua ofoina mai ai se vaaiga i se tasi o na taimi faapitoa.
Sa matou maua se aafiaga matagofie o se vaega o a matou galuega faatino o fesoasoaniga alofa.
Na faamatala mai e Uso Eric Graffe, o lē e fesoasoani iā i matou i a matou galuega faatino, se faafitauli i le vaiinu i le motu o Tahaa. Sa vave ona matou faatulagaina se fonotaga faavitio ma Madame Patricia Amaru, o le Pulenuu o Tahaa.
I le matou ofo tele, sa ia amata le fonotaga i se tatalo. Ona matou fesili atu lea ia te ia po o a mea faamuamua e manaomia. Faatasi ai ma loimata, sa ia faamatala mai: “Atonu o outou o le tali i a‘u tatalo, aua o ananafi lava sa i ai se faafitauli faanatinati. Ma ua leai so‘u malosi e foia ai.”
Sa faaauau ona ia faamatala mai ua le toe aoga le upega fesootai o le tufatufaina atu o vaiinu, ma ua faigata ai ona sapalaiina vai i se vaega tele o le motu.
O lea na matou agai atu ai i Tahaa e vaai po o le ā le mea sa mana‘omia. Talu ai o le vai o se tasi lea o faamuamua o galuega faatino o fesoasoaniga alofa, sa tonu ai ia i matou e tuufaatasia se faila o faamatalaga o le a matou auina atu i le taitai faalelotu a le peresitene. Afai e faamanuiaina, o lenei galuega faatino tele o le a faamanuiaina ai olaga o le silia ma le 2,000 tagata.
O le taimi lava na uma ai ona matou asiasi atu i lea nofoaga, sa faanoanoa Madame Amaru i le tuua o i matou, ona sa tatau ona auai o ia i se fonotaga, “ma se alii talavou mai la outou ekalesia o le a alu i se missiona”.
O le mea moni, o se faatasiga lea e tatala ai e le faifeautalai lana tusi o le valaauga mo le misiona. Sa matou fesili atu ia te ia pe o se tagata o lona aiga. “Leai!” sa ia tali mai ai. “Ae ou te alu i soo se mea e valaaulia ai au.”
“Ia, matou te fiafia la e o faatasi ma oe!”
Ina ua matou taunuu atu, sa matou vaaia se paranesi ua faatumuina i le alofa mo lenei faifeautalai talavou o le a malaga i le misiona, o lē na maliu lona tina i le tausaga i luma atu. O le mea e sili ai, o ia o le faifeautalai muamua mai lenei paranesi … i totonu o le 40 tausaga!
Sa talosagaina e le peresitene o le paranesi le pulenuu ma lona toalua e saunoa atu. Sa la tuuina atu uma fautuaga “faamatua”, e uunaia ai o ia ina ia usiusitai ma faaaloalo, ia tumau i le lotomaualalo, aemaise lava ia aua nei nofo ai iina (Misiona a Sate Leki) pe a uma le misiona.
Ae matou te lei o ese, sa matou iloa ai o lenei ulugalii, o e e latalata tele i tagata o le latou nuu, sa auai talu ai nei i le faapaiaina o le falesa. O le mea e sili ai, i le vaitaimi e fitu masina o le fausiaina o le falesa, sa la faafeiloaia ai le paranesi atoa i totonu o lo latou fale (e le o fale o le malo, ae o lo latou lava fale) mo sauniga i Aso Sa!
Sa faatumulia o matou loto i le alofa ma le lotofaafetai mo na tagata agalelei ma lotomaualalo a o matou toe folau ese ai ae tuua i latou.
E le fesiligia lava, tatou te tautino atu o loo leoleoina ma le agamalu e lo Tatou Tama Faalelagi Ana fanau, ma ua Ia auina mai i matou i Tahaa e auauna atu ia i latou; ma o le Ekalesia o le auala lea e mafai ona faia ai lenei mea.