Oa i le Lagi

O le suesuega o le masina lenei o le Mataupu Faavae ma Feagaiga ua faamamafaina ai auala e mafai ona e “teuina ai oa mo oe lava i le lagi” (Mataupu Faavae ma Feagaiga 6:27). Siaki nei tusiga o mekasini a le Ekalesia e aoao atili ai e uiga i oa faalelagi e pei o aafiaga faaleagaga, tapuaiga i le malumalu, ma se sootaga ma le Atua.

Aoao mai Lenei Tusiga

Tatalo mo Isi

E te iloa se tasi o loo feagai ma se taimi faigata? Mulimuli i le faataitaiga a Elder Dieter F. Uchtdorf ma lona faletua, o Harriet, e ala i le tatalo mo lena tagata (tagai i le itulau 2). Manatua e faalagolago i le finagalo o le Atua, e tusa lava pe le vave vaai le tagata o loo e tatalo i ai i faamanuiaga.

Suesue i Nofoaga o Talafaasolopito o le Ekalesia

Ua faasoa mai e se faifeautalai ua toe foi mai o le sa auauna atu i nofoaga o talafaasolopito o le Ekalesia i Niu Ioka ma Penisilevania le mea na tupu iina ma le mafuaaga e taua ai i le aso (tagai i le itulau 12). O a ni nofoaga po o ni aafiaga na taua mo lou tuputupu ae o se soo o Iesu Keriso? Mafaufau e ta’u atu i lou aiga po o uo se tasi o nei taimi paia mai lou olaga ma le mafuaaga e taua ai ia te oe.

Vaai i le Olaga e ala i se Vaaiga e Faavavau

Faitau le tusiga o loo i le itulau e 36 e aoao atili ai e uiga i le auala e mafai ai e le faaeega paia o le malumalu ona faalautele la tatou vaaiga i le fuafuaga a le Atua. O a ni aafiaga na e maua na fesoasoani ia te oe e maua ai se vaaiga e faavavau—pe mafaufau foi i le selesitila, e pei ona aoao mai e Peresitene Russell M. Nelson? Mafaufau e tusi au aafiaga i se apitalaaga pe faasoa atu i aiga ma e pele ia te oe.

Gaioiga Mālie Faaleaiga i le Sau, Mulimuli Mai ia te A’u

O Mea e Sili Ona Taua

Mataupu Faavae ma Feagaiga 6; 11–16

Valaaulia tagata taitoatasi o le aiga e faaali atu se mea e taua ia i latou—mo se faataitaiga, o se ata, tusi, po o se meataalo—ma faamatala mai pe aisea e taua ai ia i latou. Ona talanoaina lea faatasi o fesili nei:

O le a le mea ua ta’u atu e le Alii i Ana auauna e mafai ona latou “faapelepele” i ai pe afai latou te auai ma le filiga i le galuega faafaifeautalai? (tagai i le Mataupu Faavae ma Feagaiga 6:3; 11:3; 12:3; ma le 14:3).
O le a le mea na ta’u atu e le Alii ia Oliva Kaotui e “teu” i le Mataupu Faavae ma Feagaiga 6:20? O le a le fetalaiga a le Alii e uiga i “oa” i le Mataupu Faavae ma Feagaiga 6:27?
I le Mataupu Faavae ma Feagaiga 15:6 ma le 16:6, o le a le mea ua fetalai mai le Alii o le a “sili ona taua” ia i latou o e na Ia valaauina e talai atu le talalelei?
O a ni mea e mafai ona tatou faia o se aiga e teumalu ai mea faalelagi?

I le sauniuni ai mo lenei talanoaga, atonu foi e te manao e toe iloilo le saunoaga a Elder Ronald A. Rasband i le konafesi aoao ia Oketopa 2021, “O Mea o Lo’u Agaga.”