“O Le A Ou Faamaloloina i Latou,” Liahona, Fep. 2025.
“O Le A Ou Faamaloloina i Latou”
O le galuega faamalolo a le Faaola o se faatomuaga paia ma o se folafolaga o le faamalologa tumau faaletino ma faalelagona lea o le a oo mai ia i tatou taitoatasi i le Toetutu.
Ou te manatua pea nisi o malaga uumi sa ou faia i lo’u olaga faalegaluega o se ave vaalele.
I se tasi o ia malaga, ou te alu ese mai Siamani i le 11:00 i le taeao ma taunuu i Kalefonia i le 1:00 i le aoauli i le aso lava e tasi. O le faatusatusaina o taimi e malaga ese atu ai i le lotoifale ma taimi e taunuu ai, atonu e foliga mai o se malaga i le Vasa Atelani ma le konetineta o Amerika i Matu sa na o le lua itula na alu ai. Sa saoasaoa le Boeing 747, ae e le o le saoasaoa lena! O le mea moni, pe a ma le 11 itula, e faalagolago i le matagi, e malaga ai i le 5,600 maila (9,000 km).
Ona sa matou felelei i sisifo, e lei goto lava le la i le taimi o le matou faigamalaga. Sa matou fiafia i le ao teatea mai Siamani i Kalefonia.
Peitai, o le toe foi atu i Siamani, sa o se tala sa matuai ese lava. E ui lava ina sa matou malaga ese i le aoauli, a o matou felelei i sasa’e, sa vave ona oo mai le goto o le la nai lo le mea e masani ona i ai, ma e lei leva, ae ua oo mai le po i o matou luga.
I le taimi o nei malaga uumi, sa masani ona faatumulia lo’u agaga i le maofa a o ou mafaufau loloto i le matagofie o lenei lalolagi ma le faatulagaga o le foafoaga a le Atua. E oo lava a o malaga i le po, i le pogisa atoa, sa ou iloa ma le mautinoa o le a toe oso ae le la, o le a toe foi mai lena malamalama susulu ma aumaia le mafanafana ma le ola i se aso fou a o lei oo i le iuga o la matou malaga. O tulaga o la’u faigamalaga atonu na foliga mai ai e pei ua goto ifo lemu tele pe sili atu ona vave le goto ifo o le la, ae sa ou iloa o loo tumau pea le la, mausali, ma faatuatuaina i le lagi.
Ou te lagona foi lea lava lagona e tasi e uiga i le Atua. Ona ua ou maua se mautinoa loloto o le atamai ma le faamoemoega o le Atua mo Ana foafoaga uma, e mafai ona ou lagonaina le faamoemoe fiafia ma le filemu tumau pe a ou mafaufau e uiga i lo tatou olaga faaletino. O i Tatou o Fanau a le Atua. E alofa o Ia ia i tatou. Ua silafia e Ia o tatou tulaga. Ua saunia o Ia e fesoasoani mai. O nei upumoni e le suia, e tusa lava pe foliga mai o isi mea o loo siomia ai i tatou e foliga mai e le mausalii ma e le mafaufauina.
Tatou te oo uma lava i taimi o le pogisa, faanoanoa, ma le le mautonu e faamatauina ai lo tatou filemu. E maeu lo’u faafetai mo le punavai faatuatuaina ma moni o le upumoni ma le malamalama (tagai i le Mataupu Faavae ma Feagaiga 88:6–11). O Iesu Keriso o le malamalama ma le ola o le lalolagi. Ona o Ia ma Lana taulaga togiola, ua tatou maua ai le faamoemoe mo le lumanai, maua le malamalama faalelagi e faamalamalama ai aso pogisa o la tatou malaga, ma le folafolaga o le manumalo silisili i le agasala ma le oti.
“E alofa o Ia i le lalolagi”
O Iesu Keriso ua na o le pau lea o le tagata atoatoa na savalia le lalolagi. Ona o Lona soifuaga atoatoa, sa leai ai sana aitalafu i le faamasinoga tonu. Ona o le alofa mo i tatou, na Ia ofoina mai ai Lona soifua mo i tatou taitoatasi ma mo fanau uma a le Atua e tatalaina le faitotoa i le tino ola pea ma le ola e faavavau.
E ui i mea e manao Satani tatou te talitonu i ai, e leai se tasi o i tatou e le oo i ai le mafaia e le Faaola ona laveai i tatou. E leai se tasi o i tatou e faaleaogaina mai le alofa tunoa o le faamagaloga. E leai se tasi o i tatou e le mafai ona “siosiomia e faavavau i aao o lona alofa” (2 Nifae 1:15).
O lenei meaalofa silisili o meaalofa uma e sau mai le mana gafatia ma togiola o le Togiola a Iesu Keriso. Ona o mafatiaga o le Faaola i Ketesemane ma i Kolokota, ua Ia silafia ai le ala e laveai ai i tatou mai ma fesoasoani ia i tatou i soo se mea ma o tatou vaivaiga uma (tagai i le Alema 7:12).
“E lē faia e ia se mea vagana ai ua mo le manuia o le lalolagi; ona ua alofa o ia i le lalolagi, e oo ina tuu ai lava e ia i lalo lona lava soifua ina ia mafai ona ia aumai o tagata uma ia te ia” (2 Nifae 26:24).
O Iesu Keriso o lo tatou malosi!
E aapa mai o Ia.
Na te toefuatai mai.
Na te laveai.
“Ina ua [faia e le Faaola Lana taulaga togiola] mo tagata uma, sa Ia tatalaina se ala ina ia mafai ai e i latou o ē mulimuli ia te Ia ona maua Lona mana faamalolo, faamalosiau, ma le togiola,” na saunoa ai Peresitene Russell M. Nelson.
O lena mana, e pei o le la, o loo i ai pea iina. E le taitai lava sui. O le filifiliga e mulimuli i tulagaaao o le Faaola e pei lava o le savavali ese mai ataata ma oo atu i le la susulu, lea e mafai ai ona tatou maua faamanuiaga o le malamalama, mafanafana, ma le alofa o le Atua. Ou te iloa e i ai se aso, o le a tatou toe tepa ai i tua ma faatumulia i le lotofaafetai na tatou faia le faaiuga taua e faavavau e faalagolago ia Iesu Keriso ma Lona alofa paia e siitia ma faamalosia i tatou.
“Foi mai nei ea ia te A’u”
O loo ta’u mai i le Tusi a Mamona e uiga i se nuu na faaaluina aso e tolu i le pogisa sili ona loloto ina ua mavae le Faasatauroga o le Faaola. O le pogisa faaletino o loo siomia ai i latou e mafai ona faatusa i le pogisa faaleagaga tatou te oo uma i ai ona o le agasala. Ona faalogoina lea e tagata o le siufofoga o Keriso o valaaulia i latou mai le pogisa ma agai atu i Lona malamalama:
“Pe tou te le foi mai nei ea ia te a’u, ma salamo i a outou agasala, ma liua, ina ia Ou faamaloloina outou?” (3 Nifae 9:13).
“Osi mai mo se taulaga ia te a’u le loto momomo ma le agaga salamo” (3 Nephi 9:20).
“Salamo ma foi mai ia te a’u ma le faamoemoe atoa o le loto” (3 Nifae 10:6).
Ua tuuina mai e le Faaola na lava valaaulia ia i tatou i aso nei pe a tatou iloaina ua leiloloa i tatou lava i le pogisa. Ae e pei lava ona faailo mai e la oso taitasi le amataga o se aso fou, o taimi taitasi tatou te salamo ai tatou te maua ai se amataga fou, o se amataga susulu fou.
Ae e le faapea e faigofie. O le salamo o lona uiga o le suia, ma e le vave ona tupu se suiga. E ui o le olioli, o le salamo e aofia ai le “tiga e tusa i le Atua” (2 Korinito 7:10). E manaomia ai lo tatou tautino atu ma ta’uta’u atu a tatou mea sese, ole atu mo le faamagaloga mai le Atua ma mai ia i latou atonu na tatou faatiga i ai. Ae o le mea sili lava, e manaomia ai lo tatou sailia “o le Agaga o le Alii Mamana Aoao,” ina ia mafai ona tatou oo i “se liuga tele i totonu … o o matou loto, ua lē toe i ai so matou manao e fai mea leaga, ae ia faia mea lelei e le aunoa” (Mosaea 5:2).
O lena ituaiga o suiga o se malaga umi, ae o le taimi lava e te faia ai le laasaga muamua, e amata ai “le aso o lo outou olataga” ma “o le taimi nei lava o le a faataunuu ai le fuafuaga tele o le togiolaina ia te outou” (Alema 34:31).
E ala i lo tatou salamo faamaoni, ua folafola mai ai e le Atua e faamagalo ma le toe manatuaina a tatou agasala. Pe a faigata ia i tatou ona faagalo a tatou agasala, ia tatou taumafai e faalagolago i le folafolaga a le Alii e faamagalo atu ma aoao e faamagalo atu i isi ma i tatou lava .
“E faaleagaina o tatou agaga pe a tatou faia ni mea sese ma faia ni agasala,” na aoao mai ai Peresitene Boyd K. Packer (1924–2015). “Ae e le faapei o le tulaga o o tatou tino faaletino, a oo ina maea le faagasologa o le salamo, e le toe i ai ni ma’ila e totoe ona o le Togiola a Iesu Keriso.”
Faamaloloina o le Tagata Tauaso, saunia e Carl Heinrich Bloch
“Ia Aumai i Latou Iinei”
O le Faaola o le Mata’isau Faamalolo. O se tasi o faataitaiga sili ona matagofie o Lona mana faamalolo o loo maua i le Tusi a Mamona, i le tala o Lana galuega patino i Amerika anamua:
“E i ai ea ni isi o ia te outou ua mama’i?” Sa Ia fesili ai. “Ia aumai i latou iinei. E i ai ea ni isi o outou ua pipili, pe ua tauaso, pe ua setu, pe ua manua, pe ua lepela, pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lou loto i le alofa mutimutivale. …
“Ma sa oo foi ina ua uma ona fetalai mai o ia faapea, ua o atu faatasi uma le motu o tagata, ma o latou tagata mama’i ma o latou tagata puapuagatia, ma o latou pipili, ma o latou tauaso, ma o latou gūgū, ma i latou uma o e na puapuagatia i soo se ala; ma sa ia faamaloloina i latou taitoatasi ina ua aumaia i latou ia te ia” (3 Nifae 17:7, 9).
O taimi uma lava e faamalolo ai e le Faaola soo se tasi e “puapuagatia i soo se ala,” a o lei oo mai ma ina ua mavae Lona Toetu, sa o se molimau i Lona mana tupito e faamalolo ai o tatou agaga. O faamalologa faavavega taitasi sa na o se faatomuaga ma se folafolaga o le faamalologa tumau faaletino ma faalelagona lea o le a oo mai ia i tatou taitoatasi i le Toetutu, “o le faatinoga silisili lea a le Alii o le faamalologa.”
E moni o a tatou tatalo mo le faamalologa i lenei olaga e le o taimi uma e tali mai ai i le ala tatou te faamoemoe i ai, ae e le mafai ona le amanaiaina. O le a oo mai le taimi mo le faamalologa, e pei lava ona mou atu i taimi uma le pogisa o le po—i le taimi sa’o—i le oso a’e o le la matagofie.
E pei ona molimau mai Peresitene Nelson: “E le mafai ona le talisapaia lo tatou faatuatua. Ua ou iloaina e sili atu le lautele o le silafaga a se Tama Faalelagi atamai nai lo tatou. Ao tatou iloa o tatou faafitauli ma tiga i le olaga nei, Na te silafia lo tatou alualu i luma ma le gafatia e faavavau. Afai tatou te tatalo ia iloa Lona finagalo ma gauai atu o tatou tagata i ai, i le onosai ma le lototele, e mafai e le faamalologa faalelagi ona oo mai i Lana lava ala ma le taimi.”
Talu ai nei sa ma faaaofia ai ma lo’u toalua o Harriet i a ma tatalo se faamoemoega faapitoa ma le aioiga mo nisi ma te alolofa i ai. Sa ma tatalo ina ia tuuina atu i la latou ’au faalesoifua maloloina le tomai faapitoa e faamalolo ai o latou gasegase. Sa uunaia i ma’ua e faaopoopo atu e tusa lava pe le tupu se fofo po o se toe manuia vave, o le mana faamalolo o le Faaola e ono aumaia ia i latou le mafanafana ma le filemu. O le aafiaga faamalolo o le mana togiola o le Faaola e mafai ona i ai se aafiaga sili atu i lo tatou soifua maloloina faalelagona, faaleagaga, ma faaletino nai lo soo se vaifofo faalelalolagi tatou te maua. O Iesu Keriso o le Faamalolo i lenei olaga ma i le faavavau.
Ou uso e ma tuafafine, uo pele, ou te molimau atu ua lava le alofa mutimutivale o lo tatou Faaola e faamalolo ai o outou manu’a, faamamā outou mai agasala, faamalosia outou mo tofotofoga o le a oo mai, ma faamanuia outou i le faamoemoe, poto, ma Lona filemu. O loo i ai pea Lona mana iina—tumau ma faatuatuaina—e tusa lava pe tatou te lagonaina, mo se taimi, le mamao mai Lona alofa, malamalama, ma le mafanafana.
Ou te tatalo ia aua lava nei aveesea lo tatou lagona o le maofa ma le lotofaafetai loloto mo mea uma na faia e Iesu Keriso mo i tatou. Faamolemole ia iloa e alofagia atoatoa oe, ma manatua mea ua folafola mai ia te oe e faavavau.
“Talosia ia tuuina mai e le Atua ia te outou ia māmā a outou avega, e ala i le olioli o lona Alo,” o Iesu Keriso (Alema 33:23).