Sailia o Faaaliga mai le Atua

O loo i ai i le Mataupu Faavae ma Feagaiga aoaoga taua e uiga i faaaliga.

O fea e tatau ona ou sailia ai se galuega fou? E mafai faapefea ona ou fesootai lelei ma lou aiga? O le a le fuafuaga a le Atua mo au?

Atonu sa i ai ni au fesili faapenei e uiga i lou olaga, o au sootaga, po o lou faatuatua. E mafai e le Agaga Paia ona taialaina oe a o e talanoaina fesili faapenei. O fuaitau i le Mataupu Faavae ma Feagaiga ma aoaoga mai perofeta e mafai ona fesoasoani ia te oe e aoao ai e uiga i le mauaina o faaaliga mo au fesili faanatinati.

O loo avanoa faaaliga mo i latou uma o e ole atu.

“Afai tou te ole mai ia te au o le a outou maua; afai tou te tuitui atu, o le a tatalaina ia te outou” (Mataupu Faavae ma Feagaiga 6:5; tagai foi i le Mataio 7:7).
“O le avanoa o le mauaina o fa’aaliga o se tasi lea o meaalofa silisili a le Atua i Lana fanau.” —Peresitene Russell M. Nelson

E eseese auala e maua ai faaaliga.

“O le a ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (Mataupu Faavae ma Feagaiga 8:2).
“E faaaoga e le Atua mamanu eseese e faailoa atu ai Ana faaaliga i Ona atalii ma afafine, e pei o mafaufauga i le mafaufau ma lagona i le loto, miti, faaaliga, talanoaga ma avefeau faalelagi, ma musumusuga.” —Elder David A. Bednar o le Korama a Aposetolo e Toasefululua

Atonu e manaomia e faaaliga ni sauniuniga.

“Suesue i ai i lou mafaufau; ona … e ole mai ia te au pe ua sao” (Mataupu Faavae ma Feagaiga 9:8).
“E matua faaleleia atili a tatou sauniuniga faaleagaga pe a tatou suesue e le aunoa i tusitusiga paia ma upumoni o le talalelei ma mafaufau loloto i o tatou mafaufau i le taitaiga tatou te sailia.” —Elder Quentin L. Cook o le Korama a Aposetolo e Toasefululua

E mafai ona oo mai faaaliga i le tulaga o le filemu.

“Ia e mafaufau i le po na e tagi mai ai ia te au i lou loto. … Ou te lei tautala atu ea le filemu i lou mafaufau e uiga i le mataupu?” Mataupu Faavae ma Feagaiga 6:22–23).
“O le a musumusu e le Agaga le filemu i lou loto. O le a ia uunaia oe ia agai i luma i le faatuatua. Ma o le a Ia toe aumaia le manatuaina o na taimi na e lagonaina ai le malamalama ma le alofa o Iesu Keriso.” —Peresitene Henry B. Eyring, Fesoasoani Lua i le Au Peresitene Sili

E mafai ona aumaia e faaaliga le olioli.

“Ou te tuuina atu ia te oe se vaega o lou Agaga, o le a faamalamalamaina ai lou mafaufau, e faatumuina foi lou agaga i le olioli” (Mataupu Faavae ma Feagaiga 11:13).
“O le olioli lea e faatumulia ai o tatou agaga e aumaia faatasi ai ma se vaaiga e faavavau e faatusatusa lea i le olaga o aso taitasi. O lena olioli e oo mai o se filemu i le lotolotoi o faigata po o le lototiga.” —Elder Ronald A. Rasband o le Korama a Aposetolo e Toasefululua