Faamanuiaga i le Toe Faamanatu—O Le Auala na Avea ai le Tiga o le Pitogaau ma Vavega a Lo’u Aiga

I ni nai tausaga ua mavae, na pa ai le pitogaau o lo’u tamā, lea sa avea o se alofa mutimutivale.

O le toatele o tagata e le faapea mai o le afaina o le pitogaau ma le faia o se taotoga faatopetope o se vavega, ae sa [o se vavega] mo lo’u tamā.

Ina ua aveese e le fomai le pitogaau o lo’u tamā, sa ia maua ai le kanesa.

O le mea e laki ai, ina ua mavae ni suesuega, na iloa e fomai sa lei salalau le kanesa. O le aveeseina lona pitogaau, sa leai ai sona kanesa.

Ina ua matou maua se taimi e mafaufau loloto ai i lenei tulaga, sa lagona e lo’u aiga le faafetai i le pa o le pitogaau o lo’u tamā.

O le kanesa i lona pitogaau sa maaleale, ma a aunoa ma le taotoga faatopetope, atonu na semanu e le iloaina seia oo ina tuai tele.

Atonu e manatu nisi tagata o le tala a lo’u tamā o se mea na tupu faafuasei, ae o i matou ma lo’u aiga ua matou iloa sa o se vavega mai le Atua.

Na saunoa Elder Ronald A. Rasband o le Korama a Aposetolo e Toasefululua, “O le mea e foliga mai o se avanoa e lei fuafuaina, o le mea moni, na muai silafia e se Tama alofa i le Lagi, o lē e mafai ona faitauina lauulu o ulu uma.”

Atonu tatou te le matauina le aofia ai o le Atua i o tatou olaga seia oo ina tatou toe mafaufau i aafiaga ua tuanai. I lena taimi, sa le’i manatu lo’u aiga o le afaina o le pitogaau o se faamanuiaga. Matou te lei iloaina le taua o le taotoga faafuasei a lo’u tamā seia oo ina maua e le fomai le kanesa.

O le muai le malamalama i faamoemoega o le Atua o se mamanu masani. Sa mulimuli Nifae i le poloaiga a le Atua e tusi ni faamaumauga talitutusa se lua e aunoa ma le iloaina pe aisea (tagai 1 Nifae 9:2–6). Na faaaofia mulimuli ane e Mamona seti uma e lua o faamaumauga a Nifae e aunoa ma le iloaina pe aisea (tagai Upu a Mamona 1:6–7).

E silia ma le afe tausaga talu ona tusia ma tuufaatasia e Nifae ma Mamona a laua talafaamaumau i papatusi uamea, na leiloloa ai itulau e 116 o le faaliliuga a Iosefa Samita o na faamaumauga. O le mea e faafetai ai, sa mafai lava e Iosefa Samita ona faaaofia ai se faamaumauga o le nuu o Nifae i le Tusi a Mamona ona sa mulimuli ni perofeta anamua se toalua i poloaiga a le Atua e aunoa ma le iloaina pe aisea.

Sa amata e Peresitene Henry B. Eyring, Fesoasoani Lua i le Au Peresitene Sili, se api talaaga e fesoasoani ia te ia e iloa ai le aao o le Alii i lona olaga. I le faaiuga o aso taitasi, e fesili ai o ia ia te ia lava: “Pe na ou vaaia le aao o le Atua o aapa mai e pai mai ia i ma’ua po o le ma fanau po o le matou aiga i le asō?” A o ia faia lenei mea, sa faamanatu atu e le Agaga Paia ia te ia e uiga i taimi na faamanuiaina ai o ia e le Atua i le aso atoa.

O a ni alofa mutimutivale ua e le iloaina i lou olaga? E mafai faapefea e le toe mafaufau i mea ua tuanai ona fesoasoani ia te oe e “manatua ai pea, le silisili o le Atua” (Mosaea 4:11)? A o ou faaaluina se taimi e tepa ai i tua ma saili mo le aao o le Atua i lo’u olaga, ua ou maua ai se molimau e sili atu le silafia e le Tama Faalelagi nai lo i tatou ma e i ai sana fuafuaga atoatoa mo i tatou taitoatasi (tagai 2 Nifae 2:24).