O Le A E Iloa Le Mea e Fai

Ata na tusia e Katy Dockrill

I se tasi taeao ina ua faatoa uma ona valaauina au e avea ma se peresitene o le Aualofa, sa ou maua ai se telefoni mai le tina o se aiga i la matou uarota. Sa ia faailoa mai le leai o sana galuega, faafitauli tau i le soifua maloloina, ma isi luitau. Sa manino lava sa faaaoga e le aiga a latou punaoa mulimuli. A o ou faalogologo, sa ou tatalo filemu ina ia taialaina ma taitaiina e le Agaga Paia au upu ma amioga.

Sa ou faamautinoa atu i lenei uso o le a ou faafesootaia lo matou epikopo ma o le a ou aapa atu i se taimi mulimuli ane o lena aso. Sa ou lagonaina se naunautaiga e fesoasoani i lenei aiga, aemaise lava tamaiti i totonu o le aiga. Peitai, ina ua uma ona faia ni telefoni se tele, sa ou iloa ai o le au epikopo atoa ma le au peresitene o le korama a toeaina sa agai atu i fafo atu o le matou aai. Ona o le fou i lo’u valaauga, sa ou le mautinoa ai po o le a le mea e fai.

Ina ua uma ona ou tootuli i le tatalo ma ole atu mo se fesoasoani, sa ou filifili e alu e faatau meaai mo le aiga ma faia nisi vaega ma le epikopo pe a toe foi mai. Sa ou filifili foi e foai atu ni mea sa manaomia. A o ou sauni e alu ese i la’u taavale, sa ou maua se uunaiga manino ma le le mafaaseseina: “Faatali.” Sa ou mulimuli i le uunaiga ma ou alu ese mai la’u taavale. I se itula mulimuli ane, na oo mai ai se tuitui i lo’u faitotoa i luma.

Sa tu i fafo se fafine ua oti lana tane mai la matou uarota. Sa ia tuuina mai ia te au ni taga tetele se lua o meaai ma fai mai, “Sister Smith, ou te iloa o le a e iloa le mea e fai i nei mea.” Ona ia faanatinati atu lea i lalo o le faasitepu o le matou poletito i lana taavale.

Sa lofituina au i le lotofaafetai ma lagona agamalu mai le Agaga. Na tali mai le Alii i la’u tatalo. Sa faamanatu mai ia te au ia Nifae, o lē sa taitaia e le Agaga, ma sa le’i muai iloaina le mea e tatau ona ia faia (tagai i le 1 Nifae 4:6).

Pe a tatou tatalo ma mulimuli i uunaiga laiti ma le filemu, tatou te maua le faamautinoaga lenei mai le Alii: “O le a tuu atu ia te oulua i le itula lava, ioe, i le minute tonu lava, mea e te lua fia fai atu ai” (Mataupu Faavae ma Feagaiga 100:6)—ma o nisi taimi o mea e tatau ona tatou faia. Na silafia e le Alii manaoga faanatinati ma le vave o lenei aiga ae ou te lei faia. Sa faamanuiaina au i le molimauina o se alofa mutimutivale alofa o le Alii a o saunia e lenei fafine ua oti lana tane se taulaga lea na fafagaina ai se aiga i le taimi tonu lava na latou manaomia ai.

Ou te faafetai mo se Tama Faalelagi o le na te saunia mo i tatou i taimi o o tatou manaoga a o tatou faalatalata atu ia te Ia.