Mai Loimata o le Tiga i Loimata o le Lotofaafetai

Ata na tusia e Katy Dockrill

E leai se mea na saunia ai a’u mo le aso na fai mai ai lo’u toalua ua 10 tausaga e manao e tuua le Ekalesia ma la ma faaipoipoga. E moni, o i ma’ua uma taitoatasi sa le lava se tulaga o le faa-matua, agalelei, faamagaloga, ma le alofa, ae sa ou manao e taumafai pea e faaleleia la ma’ua faaipoipoga. Peita’i, e le’i faia e ia.

Sa ou lagonaina sa ou faamamaluina a’u feagaiga, suesue ma le naunautai i tusitusiga paia, ma auauna atu ma le usiusitai i le au epikopo o la’u uarota. Ae ina ua alu ese lo’u toalua, sa ou matua fememea’i, ita, ma le mautonu lea oute ala a’e ai i le vaeluaga o le po ma le tiga tele. Sa tafe loimata, ma sa ou faia le mea e tasi na mafai ona ou faia—tatalo mo le tele o itula.

Sa ou lagonaina le pei o le avetaavale o se taavale sa aveina saogalemu ae na faafuasei lava ona taia e se isi taavale ua le mafai ona pulea. Pe le’i tatau ea ona mafaia e lo’u usiusitai ona puipuia au mai mala?

Sa ou mafaufau pe sa manatu tagata o le uarota o a’u o se tagata taufaasese. Sa avea a’u ma se taitai o le uarota lea o lona aiga sa feteenai ma le ata o se aiga faataitai. E mafai faapefea ona ou faasaga atu i tagata o le uarota pe a lagona le nutimomoia o lo’u olaga? Ona sa ou lagona le le agavaa, sa ou faapea ai e tatau ona ou talosaga atu ina ia faamaloloina mai lo’u valaauga.

“Afai e te tauivi ma lagona o le le agavaa, e le tatau ona e faapena,” o le tala lea a lo’u epikopo. “O i tatou uma lava o tagata ma e faia mea sese.”

I le lima tausaga faigata mulimuli ane, na ou matauina ai ua ou suia. Sa sili atu lo’u alofa ma le faamagalo atu. Sa sili ona filemu lo’u agaga. Sa ou vaai i o’u vaivaiga o ni avanoa e faamamaina ai e le Agaga Paia (tagai i le Eteru 12:27).

Mulimuli ane, sa ou feiloai ai i se tamaitai lelei ma se fanau e toalua mai se faaipoipoga muamua. Na avea o ia ma o’u toalua i le 2020. Sa ou maua le fiafia talu mai lena taimi. O o’u loimata i le po o le tiga ua tafe mai nei o loimata o le lotofaafetai. Ua liligi mai e le Alii le tele o faamanuiaga.

I le oo ai i tulaga le fiafia ma le le lelei i lo’u aiga, ua ou maua ai le faamafanafanaga mai fautuaga na tuuina mai e Elder David A. Bednar o le Korama a Aposetolo e Toasefululua: “Ia te outou o e na oo i le lototiga o le tatalaina o faaipoipoga i lo outou aiga pe lagonaina foi le tiga o le solia o le faatuatuaina, faamolemole ia manatua [o le mamanu a le Atua mo aiga] e toe amata mai ia te outou! … E mafai ona e faaopoopoa i ai le malosi i lau filifili [o augatupulaga] ma e masalo e oo lava i le fesoasoaniga e toefuatai mai sooga ua motusia.”