“Ua Maua i se Mauga Maualuga Tele,” Liahona, Fep. 2025.
Vaaiga Faasolopito i le Maota o le Alii
“Ua Maua i se Mauga Maualuga Tele”
E pei o perofeta o e na mauaina faaaliga ofoofogia o le faavavau, e mafai ona tatou vaaia i le faaeega paia le matafaioi a le Faaola i le ata o le faaolataga ma aoao pe faapefea ona saunia mo le aso o le a tatou ulufale moni ai lava i Lona afioaga ma Lona Tama.
O se uluai ata o le Malumalu o Katelani
I le avea ai ma Perofeta o le Toefuataiga, sa faamanuiaina Iosefa Samita e molimauina faaaliga ofoofogia o le faavavau. Sa ia vaai i le Faaola i le silia ma le faa-tasi ma oo i se faaaliga vaaia “o le mea sa i ai, ma le taimi nei, ma o le a i ai pea.”
E le na o Iosefa le perofeta na mauaina ia ituaiga o faaaliga. O loo i ai i tusitusiga paia ni tala o tagata faamaoni o e na molimauina se vaaiga i le faavavau. Na vaai Aperaamo i le faavavau, e aofia ai le Fono i le muai olaga i le Lagi ma le Foafoaga o le lalolagi (tagai i le Aperaamo 3; 4). Sa “aveina ae Mose i luga i se mauga maualuga tele” ma sa aoaoina o ia i mea uma “e uiga i lenei lalolagi” (Mose 1:1, 36), e aofia ai le Foafoaga, le Pau o Atamu ma Eva, ma le misiona faaola a Iesu Keriso. Sa i ai ia Enoka, Nifae, ma Ioane le Talifaaaliga ni faaaliga tutusa lea na latou maua ai se vaaiga faaperofeta (tagai i le Mose 7; 1 Nifae 11–15; Faaaliga 1).
Pe na e faitauina ea nei tala ma moomoo maimau pe ana mafai ona e maua se aafiaga faapena? E faapei le vaai atu i le lautele o le fuafuaga a le Tama i ou mata ma faalogo i Lona siufofoga i ou taliga?
O Le Faaeega Paia na Tuuina Atu ai i le Au Paia se Vaaiga i le Faavavau
I Katelani, Ohaio, ISA, sa saili ai Iosefa e saunia isi uluai Au Paia mo le avanoa e maua ai se vaaiga o le faavavau mo i latou lava e pei o perofeta anamua. A o fausia e le Au Paia le Malumalu o Katelani, na folafola mai e le Alii e faapea “o e uma e loto mama” o e na ulufale atu i lena uluai malumalu o aso e gata ai o le a “vaai i le Atua” (Mataupu Faavae ma Feagaiga 97:16).
Sa uunaia e Iosefa le Au Paia ina ia saunia faaletino ma faaleagaga e maua lenei faamanuiaga. Sa latou anapopogi, tatalo, suesue i le talalelei, fufulu o latou tino, ma ofu i ofu mama. Ona amata lea ia Ianuari 1836 ma faaiuina i le faapaiaga o le malumalu ma se faapotopotoga paia i le lua masina mulimuli ane, na ulufale atu ai le toatele o le Au Paia i Katelani i le maota o le Alii ma maua ai le vaaiga folafolaina o le faavavau. “Na faaali mai le Faaola i nisi,” na tusia ai e Iosefa i lana api talaaga, “a o auauna atu agelu i isi.” I le toe taua ai o le folafolaga a le Alii o le a Ia faaeeina le Au Paia i le mana i Lona fale, sa faasino atu ai Iosefa Samita i nei aafiaga o se “faaeega paia moni lava.”
O le taimi na siomia ai le faapaiaga o le Malumalu o Katelani o se taimi ofoofogia, o se vaitau paia, o se tasi o vavega silisili i le uluai talafaasolopito o le Ekalesia. Ma e ala i le asiasiga a avefeau faalelagi i lena malumalu, na tuuina mai ai e le Alii i le Perofeta o Iosefa Samita ki e manaomia e faataunuu ai galuega o le malumalu i le lumanai (tagai i le Mataupu Faavae ma Feagaiga 110).
I ni nai tausaga mulimuli ane i Navu, Ilinoi, ISA, na tuputupu ae ai le Ekalesia. E faitau afe tagata fou liliu mai o e sa lei oo i le “faaeega paia o le mana” i Katelani na gasolo mai i misiona a le Ekalesia i Egelani ma le Iunaite Setete atoa.
A o faapotopoto le Au Paia i Navu, sa musuia e le Alii ia Iosefa Samita e faaaoga se toe faataitaiga matautia i le faaeega paia e tuuina atu ai se faaaliga vaaia maoae o le fuafuaga a le Alii. O lenei toe faataitaiga o le Foafoaga, le Pau, ma lo tatou toe foi mulimuli ane i le afioaga o le Atua e ala i le misiona faaola a Iesu Keriso, o le fatu lea o se sauniga faaeega paia e mafai ona toe faia i totonu o malumalu. Na mafai ai e le Au Paia ona auai mo i latou lava ma o latou tuaa. E ui e ese mai aafiaga faaaliga na toe faamatalaina e Aperaamo ma Mose, ae sa tutusa lava le anotusi sa i le totonugalemu o le sauniga.
O le faaeega paia na tuu ai tagata auai i se tala i le vateatea. Nai lo le na ona faitau e uiga i se faaaliga faaperofeta, sa aoaoina le Au Paia e uiga i le faavavau e ala i vaaiga ma leo. Sa avea i latou ma tagata faatino i le tala a o latou osia feagaiga o le a fesoasoani ia i latou e toe foi atu ai i le afioaga o le Atua. Sa pei lava o i laua o Nifae i luga o le mauga po o Iosefa Samita i Katelani. Ma o le Agaga lava lea e tasi na aoaoina perofeta e mafai ona aoaoina i latou a o latou auai i le sauniga o le faaeega paia.
Ata pue o le Malumalu a Navu Ilinoi saunia e Shane Michael Bezzant
Ua Faamatalaina e le Faaeega Paia o Latou Popolega i Aso Taitasi
O le auai i le faaeega paia i le Malumalu o Navu na fesoasoani e tuu ai popolega o le Au Paia i aso taitasi ma tofotofoga faigata i se vaaiga. Na faamautinoa atu ai ia i latou le alofa o le Faaola ma faamanatu atu ai ia i latou le lumanai mamalu o loo faatalitali mai ia i latou o e osia ma tausia feagaiga. I le toe mafaufau ai i le faamalosia o le Au Paia mai Navu ma la latou malaga umi i se fale fou i Iuta, na molimau mai ai Sarah P. Rich, “Ana leai le faatuatua ma le malamalama na tuuina mai ia i matou i lena malumalu e ala i le uunaiga ma le fesoasoani a le Agaga o le Alii, semanu e pei lava la matou malaga o se tasi o loo oso i le pogisa.”
Na faamautu mai e Peresitene Russell M. Nelson le matauga a Sara ina ua ia aoao mai o faatonuga ma feagaiga o le faaeega paia “e siitia ai i tatou i talaatu o tuaoi o lo tatou lava malosi ma vaaiga.”
“O malumalu taitasi o se fale o le aoaoina,” na tautino mai ai Peresitene Nelson. “O iina e aoaoina ai i tatou i le ala a le Matai. E ese lona ala mai faiga a isi.” I le faasino atu i le auala e mafai ai e sauniuniga faaleagaga, e pei o le suesueina o tusitusiga paia, ona faaleleia o tatou aafiaga i le malumalu, na faaopoopo mai ai Peresitene Nelson, “O se toe iloiloina o tusitusiga paia anamua e sili atu ona faamalamalamaina pe a uma ona masani se tasi i le faaeega paia o le malumalu.”
I le aluga o taimi, o metotia na faaaoga e faailoa atu ai upumoni mamalu o le fuafuaga o le faaolataga i totonu o malumalu ua suia mai le faatinoina e tagata o le Ekalesia o matafaioi i se aoaoga pueina ua faaliliuina i le tele o gagana. E tusa lava po o le a le auala e faatino ai, e faitau miliona le Au Paia o Aso e Gata Ai i le 180 tausaga ua mavae ua faamanuiaina i le vaaiga faalauteleina e faavavau latou te oo i ai pe a latou a’ea’e i le mauga e ala i le ulufale atu i le maota o le Alii.