Iosefa, Matini, ma Lesona mai Itulau na Leiloloa

Saunia e Elder Claudio D. Zivic

Pulega Aoao o le Au Fitugafulu ua Malolo Faamamaluina

O le mulimuli i mataupu faavae na aoaoina e le Faaola ma perofeta e tele mea e fesoasoani ai i lo tatou alualu i luma i lenei olaga.

faaputuga o pepa e i ai le avanoa i le ogatotonu

I le taumafanafana o le 1828, sa galue ai ma le filiga le Perofeta o Iosefa Samita i le faaliliuina o le Tusi a Mamona. I se tasi aso, sa talosaga atu ai lana tusiupu, o Matini Harisi, ia Iosefa mo se faatagaga e ave ai itulau muamua e 116 o tusitusiga i lona fale i Palamaira, Niu Ioka, ina ia mafai ona vaai i ai lona aiga. Sa le mautonu Iosefa ma sa fesili atu i le Alii po o le a le mea e tatau ona ia faia. Sa ta’u atu e le Alii ia te ia e ‘aua ne’i faatagaina Matini e ave ia itulau. Sa aioi atu Matini ia Iosefa e toe fesili atu. Na toe faia e Iosefa, o le tali lava e tasi. Na aioi Matini ia Iosefa e toe fesili atu i le Alii. O le taimi lenei na faatagaina ai i laua e le Alii e faia o la loto.

Sa ta’u atu e Iosefa ia Matini e mafai ona ia aveina itulau pe afai e sili ona ia osifeagaiga ma le mamalu e faaali atu na o lona toalua ma nisi o tagata o le aiga. Na folafola atu e Matini ma ave itulau i le fale. Ae na solia e Matini lana folafolaga ma faaali atu itulau i isi. Mulimuli ane, ina ua alu Matini e aumai itulau, sa le mafai ona ia mauaina. Sa matuai leiloloa lava.

Sa matuai aoaiina lava e le Alii ia Iosefa ona o le le faalogo ina ua Ia fetalai mai e aua nei faatagaina Matini e ave le tusitusiga (tagai i le Mataupu Faavae ma Feagaiga 3:5–8). Mo sina taimi, na aveese ai e le Alii papatusi ma le tomai o Iosefa e faaliliu ai, ae na faamautinoa atu e le Alii ia te ia e mafai ona faamagaloina o ia (tagai i le Mataupu Faavae ma Feagaiga 3:9–10). Sa salamo Iosefa, ma i se taimi mulimuli ane na toe faafoi mai ai papatusi. Sa agai i luma Iosefa ma le naunautaiga faafouina.

O Galuega a le Atua E Le Mafai Ona Taofia.

Ina ua mavae lenei tulaga faigata matautia, sa maua e le Perofeta o Iosefa Samita se faaaliga lea na aoao mai ai e le Faaola ni mataupu faavae taua e mafai ona fesoasoani ia i tatou a o tatou agai i luma i o tatou olaga atoa.

“O galuega, ma manatunatuga atoa ma fuafuaga faafinagaloina a le Atua e le mafai lava ona taofi, pe mafai foi ona faaleaogaina,” ua fetalai mai ai le Alii.

“Aua e lē savali le Atua i ala faapiopio, pe liliu foi o ia i le itu taumatau po o le itu tauagavale, pe ese foi o ia mai le mea na ia fetalai mai ai, o lea o ona ala e sasa’o, ma o lona ala o se taamilosaga faaavau e tasi.

“Ia manatua, ia manatua, e lē o le galuega a le Atua e taofia, ae o le galuega a tagata” (Mataupu Faavae ma Feagaiga 3:1–3).

E mafai ona tatou lē fiafia pe a tatou faatalitalia le galuega a le Atua e na o i tatou lava e faalagolago i ai. Na faamalamalama mai e le Alii, “E ui atonu e maua e se tagata faaaliga e tele, ma ia te ia le mana e fai ai galuega tetele, ae afai e mitamitavale o ia i lona lava malosi, … o le a pau o ia” (Mataupu Faavae ma Feagaiga 3:4).

Talu mai le taimi o Atamu ma Eva, ua i ai i latou o loo taumafai e faalavelave i le galuega a le Atua. O loo faaauau pea i aso nei. Ae o taumafaiga e taofi le galuega a le Atua o le a le manuia lava. Ua aoaoina i tatou e lenei mataupu faavae e le tatau ona tatou le fiafia e tusa lava pe feagai ma faigata.

O le mea moni e faapea o le galuega lenei a le Atua e le faamaonia ai o le a tatou saoloto mai faafitauli. Ua faamanatu mai e le Aposetolo o Paulo ia i tatou e mafai ona tatou “puapuagatia i mea uma, ae lē faaatuatuvaleina; … fememeai , ae le matua fememeai; sauaina, ae le tuulafoaiina; lafo i lalo, ae lē fano” (2 Korinito 4:8–9).

Pe a tatou feagai ai ma faafitauli, ua poloai mai le Alii ia i tatou e “tatalo e lē aunoa, ina ia mafai ona e sau ai o lē ua manumalo; ioe, ina ia mafai ona e manumalo ia Satani, ma ina ia e sao ese mai lima o auauna a Satani ua sapasapaia lana galuega” (Mataupu Faavae ma Feagaiga 10:5).

Aua Le Sili Atu Ona Matatau i Tagata i lo le Atua.

Na fetalai foi le Alii i le Perofeta o Iosefa Samita, “sa le tatau ona sili atu lou fefe i tagata nai lo le Atua” aua ua “tuu faameanoa e tagata fautuaga a le Atua, ma latou inoino i ana afioga” (Mataupu Faavae ma Feagaiga 3:7).

E tatau ona tatou lototoa i le molimau ia Iesu Keriso ma aua le fefefe e faailoa atu o tatou talitonuga. A o tatou faia ma le mautinoa, mausali, ma le malosi ma le taitaiga mai le Alii, e mafai ona tatou faia le tele o mea lelei ma e oo lava i nisi taimi tatou te maua ai le faaaloalo o isi. E le tatau ona tatou matatau i tagata i lo le Atua.

Salamo

“Ia manatua, e alofa mutimutivale le Atua,” na aoao mai ai le Alii ia Iosefa. “O lea, salamo i lena mea na e faia ua lē tusa ai ma le poloaiga na Ou tuu atu ia te oe, ma ua filifilia pea oe, ma ua toe valaaulia oe i le galuega” (Mataupu Faavae ma Feagaiga 3:10).

O le salamo faifai pea e faaauau pea ona agavaa ai i tatou e tutu agavaa. Pe a tatou salamo, tatou te liliu atu i lo tatou Tama Faalelagi ma se loto momomo ma se agaga salamo, ole atu mo se faamagaloga o a tatou agasala, ma faia taumafaiga uma e aua nei toe faia. E ala mai i le Perofeta o Iosefa Samita, na faaali mai ai e le Alii, “Aua faauta, o A’u, o le Atua, ua Ou puapuagatia i nei mea mo tagata uma, ina ia latou lē puapuagatia pe afai latou te salamo” (Mataupu Faavae ma Feagaiga 19:16).

A o ou auauna atu o se peresitene o le misiona, sa ou pulefaamalumalu ai i le aufono o tagata auai o se uso lea na iu ai ina aveesea lona auai i le Ekalesia. Sa salamo lenei tagata i ana agasala ma ina ua mavae le tausaga sa faatagaina e toe papatisoina.

Ina ua uma lona papatisoga, sa ou mauaina se imeli mai ia te ia lea na faitauina faapea: “Le Peresitene pele, o ananafi na faia ai le sauniga o le papatisoga, ma e mafai ona ou faamautinoa atu ia te outou ou te lagona le pei o se tagata fou. Sa faia se vavega i totonu ia te au. Na amata ona aoga le taulaga a le Alii o Iesu Keriso ia te au. O le asō, ua ou lagona ai le saoloto mai le sauaina o le agasala. Ou te iloa semanu ou te le ausia na o au lenei mea. Sa fesoasoani o’u taitai ma lo’u toalua ia te a’u e taulai atu pea i le sini. O Iesu Keriso o lo’u Faaola. O loo iai le vavega o le faamagaloga.”

E mafai ona tatou salamo, e pei o lenei uso ma le Perofeta o Iosefa Samita, ma e mafai e le Alii ona faamagaloina i tatou ma valaauina i tatou e toe auauna atu i Lana galuega.

Faalagolago i le Alii

E tatau ona tatou faalagolago i le Alii pe afai tatou te mananao moni lava e alualu i luma i lenei olaga. Na faamalamalama atu e le Alii ia Iosefa na pau Matini Harisi ona sa ia “faatauvaaina fautuaga a le Atua, ma [solia] folafolaga aupito paia na faia i luma o le Atua, ma … sa faalagolago i lana lava faamasinoga ma mitamitavale i lona lava poto” (Mataupu Faavae ma Feagaiga 3:13). Ou te tatalo ina ia faamanuiaina i tatou e le Alii ina ia tatou le faia foi ia lava mea sese.

I le mulimuli ai i aoaoga a le Alii, tatou te le faalagolago i a tatou lava faamasinoga pe mitamita i lo tatou lava poto, ae nai lo lena, tatou te taliaina Ana musumusuga ma le taitaiga. Tatou te taumafai e tausia feagaiga na osia i luma o le Atua ma avea ma soo o Iesu Keriso. E mafai ona tatou faaatoatoaina lo tatou avea ai ma soo e ala i le faaaogaina o uiga mama o le usiusitai, agamalu, lotomaualalo, onosai, ma le alofa (tagai i le Mosaea 3:19; Mataupu Faavae ma Feagaiga 4:5–6).

Aua ne’i tatou mitamita i lo tatou lava poto. Afai tatou te faia faapea, atonu tatou te totogia se tau mamafa ma le maua ai le tele o avanoa e alualu ai i luma. I le Faataoto ua tatou faitau ai, “E i ai le ala ua tonu i le manatu o le tagata, a o lona taunuuga o ala ia e oti ai” (Faataoto 14:12). E tatau ona tatou faatuatuaina le Alii, o Ona manatu ma ala e maualuga atu nai lo o tatou:

“Aua o o’u manatu e le o outou manatu, o o’u ala e le o outou ala, ua fetalai mai ai le Alii.

“Aua o ou manatu e le o outou manatu, o ou ala e le o outou ala, aua e pei ona sili ona maualuga o le lagi i le lalaolagi, ua faapea ona sili ona maualuga ou ala i o outou ala” (Isaia 55:8–9).

Afai tatou te salamo ma faalagolago ma le lotomaualalo i le Alii, o le a Ia faamanuiaina i tatou ina ia mafai ona tatou agai i luma ma avea ma alii ma tamaitai o loo Ia faamoemoeina mai ia i tatou.