O Le Faamanuiaga o le Malologa o le Feagaiga

O Le Savavali Faatasi ma Ia, saunia e Eva Timothy, e le mafai ona kopiina

I se vasega a le Aualofa sa ou auai talu ai nei, sa faasoa mai ai e se uso pele e faapea, o le faaupuga “auai ma le naunautai” (Mataupu Faavae ma Feagaiga 58:27) ua atili ai ona popole lona agaga popole. O ia o se uso maoae ua tele mea lelei ua ia faia ma e popole mo le toatele.

O ona lagona e toe ta’ua i loto o le toatele o uso lelei o e mafaufau pe ua lava mea o latou faia ma pe taliaina a latou taulaga.

Ou te manatu o le “auai ma le naunautai” o lona uiga tatou te faaopoopoina se aofaiga e le mafai ona faatoilaloina o galuega lelei i la tatou lisi o mea e fai. Ou te manatu foi o lona uiga tatou te taumafai ma le naunautai e foia faafitauli o le lalolagi po o faafitauli uma foi i totonu o o tatou lava lalolagi.

I le faigalotu a le Aualofa i le lalolagi atoa ia Mati 2024, na faamanuiaina ai i tatou e Peresitene Russell M. Nelson “i le poto e iloa ai mea e manaomia ma aua le tamoe saoasaoa atu nai lo mea [tatou te] mafaia.”

I le avea ai ma tamaitai o le feagaiga, ua tatou maua le faamanuiaga o le mana o le perisitua a le Atua e ala i le faamamaluina o a tatou feagaiga. E mafai ona fesoasoani Lona mana ia i tatou ia maua le malosi ma le poto faalauteleina e iloa ai “mea e manaomia” ma ia aua nei “tamoe saoasaoa atu nai lo [tatou] mafaia.”

Ua valaaulia i tatou e le Alii e faia Lana galuega i Lana ala, lea e ese mai le ala o le lalolagi—e ese mai le saoasaoa tele lea e masani ona maua ai le viiga o se lalolagi ua soona faaosofia, soona aoga, ma vaivai.

Ua faamatala mai e le Alii le auala e tatau ona faia ai le faapotopotoina o Isaraelu: “Aua tou te le o atu ma le faataalise [po o le faatopetope], tou te le o atu foi faasosola: aua e afio Ieova io outou luma; e mulitai foi ia te outou le Atua o Isaraelu” (Isaia 52:12).

O le le faanatinati e aoao ai i tatou o le talalelei a le Faaola ua fuafuaina e aumaia ai le filemu, toafilemu i o tatou loto, e oo lava i se malologa o feagaiga lea e oo mai i le tausia o tulafono maualuluga atu a Iesu Keriso. Na aoao mai Peresitene Russell M. Nelson:

“O le taui mo le tausiga o feagaiga ma le Atua, o le mana faalelagi—mana e faamalolosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. O lea, o ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua. …

“… E ui i mea faalavefau ma mea leaga ua siomia ai i tatou, e mafai lava ona e mauaina le malologa—o lona uiga, o le mapusaga ma le filemu—e oo lava i le lotolotoi o ou faafitauli sili ona faigata.”

Ou te iloa o lenei ituaiga o malologa faapitoa e oo mai pe a tatou le faia na o i tatou lenei galuega. E oo mai pe a tatou galulue faatasi ma Iesu Keriso ma le faamoemoe ma maua Lona mana e ala i le faamamaluina o a tatou feagaiga.

E oo mai le malologa pe a tatou tuu atu ia te Ia e tauave a tatou avega ma pe a tatou filifili e salamo faamaoni. E oo mai le malologa pe a tatou faatuatuaina o Ia i o tatou manaoga ma popolega ma pe a tatou filifilia se vaaiga maualuga atu ma le paia. E oo mai le malologa pe a tatou filifili e faaitiitia le faamasinoina o le tasi ma le isi ma alofa atili le tasi i le isi.

E oo mai le malologa pe a tatou iloa e silafia i tatou e le Atua ma e alofa ia i tatou. E oo mai le malologa pe a tatou maua le olioli i le aumaia o le toomaga a le Faaola i isi ma tuu atu i isi e aumai Lana toomaga ia i tatou. E oo mai le malologa pe a tatou manatua ma mafaufau i faamanuiaga matagofie ua tuuina mai e le Atua ma le alofa mutimutivale ia i tatou i aso taitasi.

E oo mai le malologa pe a tatou tapuai i le maota o le Alii. Ua valaaulia i tatou e Peresitene Nelson e fai “le malumalu [o lo tatou] nofoaga o le sulufaiga ma le toe faatulagaina”—o se nofoaga tatou te maua ai le malologa. Tatou te tuua le maota o le Alii ua faaauupegaina i Lona mana ma le vaaiga ma “e sio faataamilo [i tatou]e agelu, e sapasapai [tatou] i luga” (Mataupu Faavae ma Feagaiga 84:88).

O le malologa o le feagaiga tatou te sailia e sau mai ia Iesu Keriso. Na te valaaulia oe ma au:

“Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou.

“Ia outou amoina la’u amo, ma ia outou faaa’oa’o ia te au, … ona maua lea e outou o le malologa mo outou agaga” (Mataio 11:28–29; faaopoopo le faamamafa).