E Mafai Ona Matou Fesoasoani ia te Oe

Ata na tusia e Katy Dockrill

Ina ua taia e le Afa o Irma le Atu Keripiane ia Setema 2017, na mafua ai ona faaleagaina le tele o motu. Sa aapa atu se tagata o le Ekalesia mai le Iunaite Setete o le sa manao e fesoasoani i lo’u toalua, o le sa avea ma se peresitene o le siteki i Puerto Rico.

“E i ai la’u vaa tele o le a ou aumaia i Puerto Rico ina ia mafai ona ou aveina meaai ma sapalai i le motu o Tortuga,” o lana tala lea. “Ou te manaomia lau fesoasoani i le aoina mai o sapalai.”

I le tali atu i ai, sa amata ona matou aoina mai foai o meaai, lavalava, ma isi mea mai tagata o le Ekalesia ma isi i Puerto Rico. Sa matou auina atu ni uta vaa se lua i Tortuga ma sa matou sauniuni e auina atu se uta vaa lona tolu o sapalai, lea sa matou aoina mai i le nofoaga autu o le siteki mo le tufatufaina atu. O iina na matou iloa ai o le isi afa, o le Afa o Maria, o loo agai sao atu i Puerto Rico.

Ina ua o’o mai i laueleele le Afa o Maria, na faataumaoia ai lo matou motu, ma fasiotia ai le faitau afe o tagata. Mo ni nai aso mulimuli ane, sa le mafai ona matou tuua lo matou pitonuu ona o laau ua pauu, otaota, ma isi mea na faaleagaina. Ae peitai, i le nofoaga autu o le siteki, sa i ai sa matou sapalai o meaai, vai, lavalava, ma mea patino—o mea uma sa matou manaomia mo se mala faalenatura. Sa matou aoina mai na mea e fesoasoani ai i isi, ae na iu lava ina faamanuiaina i matou e i latou.

O le afā na mafua ai ona pe le eletise ma faaleagaina ai le initoneti ma le auaunaga o telefoni feaveai. A o galulue le malo o Puerto Rico e tali atu, sa i ai ni a matou sapalai na vave ona fesoasoani i le to’atele o tagata.

Ina ua mafai ona tuua e lo’u toalua lo matou fale, sa ia lagona le uunaiga e asiasi i nisi o tagata o le matou siteki. Sa ia maua ni tuafafine se toalua ua faaleagaina o la fale ma ua leiloloa mea uma.

“E mafai ona matou fesoasoani atu ia te oulua,” o lana tala lea. “Ua ia te i matou mea e te lua manaomia. Ua tumu le nofoaga autu o le siteki i sapalai.”

A o faafesootaia e tagata o le Ekalesia ma tagata o isi faatuatuaga lo’u toalua mo se fesoasoani, sa amata ona matou mauaina ni kata o meaalofa tautupe mai tagata o le Ekalesia i le Iunaite Setete lea sa ma tufatufaina atu i e le tagolima. Sa faapotopotoina foi e le Ekalesia ia punaoa mo fesoasoaniga alofa e pei o meaai, vai, ma isi sapalai i lo matou motu. Mo ni masina, o nei foa’i na mafai ai ona matou fesoasoani i le anoanoa’i o tagata Puerto Rico.

A o matou galulue e fesoasoani i o matou tuaoi ina ua mavae le Afa o Irma, sa saunia e le Alii se auala mo i matou e fesoasoani ai ia i matou lava pe a mavae le Afa o Maria. E pei ona aoao mai le Faaola: “Ia outou foai atu, e foaiina mai ai ia te outou” (Luka 6:38).