Ua Na’o Tusiga Faatekinolosi: Talavou Matutua
Ina Ua Faigata le Olaga, Sa Ou Maua le Faamafanafanaga i le Seminare ma le Inisitituti
Talu ona ou auai i le Ekalesia, sa ou alu i le seminare ma le inisitituti e faafailele ma faamalosi ai lo’u faatuatua.
Na ou iloaina le talalelei toefuataiina ina ua 11 ou tausaga.
Sa auai o’u uso matutua i le Ekalesia a o laiti ifo ae ua le toe auai. I se tasi aso na asiasi atu ai faifeautalai i lo’u uso matua ma valaaulia o ia e toe foi mai. Sa ia faia, ma e ala i le faagasologa na iu ai ina ou sau i le lotu, talia le talalelei, ma papatisoina.
O nai tausaga na sosoo ai sa faigata ona o ni mafuaaga eseese. Sa ou aafia i le tele o auala sa feteenai ma aoaoga o le talalelei. E ui lava sa lagolago o’u matua i le ma auai i le lotu, ae sa le o i laua o ni tagata o le Ekalesia ma sa le tutusa o laua tulaga faatauaina. O lea sa leai ai so’u faavae i le fale mo le tuputupu ae faaleagaga.
I lena taimi, o le auai i le seminare ma le fesootai atu i o’u taitai o le autalavou na fesoasoani moni lava e tuleia au i taimi faigata ma tumau ai i le tuuto atu i le talalelei. Sa ou tuputupu a’e faaleagaga, e faafetai ai i taumafaiga a faiaoga ma isi tagata o le Ekalesia o e na alolofa ia te a’u ma popole i lo’u tuputupu a’e.
Mulimuli ane, faatasi ai ma le faamalosiauga mai lo’u peresitene o Alii Talavou ma isi taitai, sa ou auauna atu ai i se misiona. O na tausaga e lua sa o se faamanuiaga maoae ia te a’u ma la’u molimau. Sa ou faatinoina mea uma sa ou aoaoina i le seminare, ma sa ou faasoaina atu le talalelei i le toatele o tagata.
Peitai, ina ua ou toe foi i le fale, sa ou feagai ma isi foi tofotofoga faigata.
O Le Toe Foi Mai i le Aiga ma Aoao e Faatuatuaina
O le faatumauina o lou faatuatua, lau molimau, ma lou faaleagaga i le uma ai o se misiona e mafai ona faigata. Ae o le mea e tasi na fesoasoani ou te tumau mausali ai ina ua uma la’u misiona o le inisitituti.
Sa ou faia se sini e taumafai e auai i vasega o le inisitituti i vaiaso taitasi, ma o lena faaiuga sa matuai taua lava mo lo’u olaga.
Sa ou sailia foi se galuega, ae sa leai se mea na aogā. O le popolevale i le leai o se galuega, sa matuai ou afaina ai lava, ma i se tasi taimi sa valaaulia ai a’u e se uo ma te o ma te faigaluega. O le galuega na aofia ai le taulimaina o le suegaoloa o ava malosi ma faigaluega i po o Aso Toonai—o le po lea na fai ai le inisitituti, o lea sa ou musuā ai e talia.
Sa ou teena la’u uo, ae sa ia valaaulia pea au e galulue faatasi ma ia. Sa tau leai ni a’u tupe, ma o le ofa o lana galuega sa na o le pau lea o le galuega na ou maua. O lea na amata ai ona ou mafaufau e talia le galuega.
Sa tonu ou te fesili i le Tama Faalelagi po o le a le mea e tatau ona ou faia. Sa ou lagonaina le molimau mai o le Agaga ia te a’u, afai ou te le alu i le inisitituti, atonu o le a vaivai ai la’u molimau. Sa ou lagonaina le faamautu mai e le Agaga ia te a’u e le tatau ona ou talia le galuega, ma sa ou toe teenaina le valaaulia a la’u uo.
Sa ou le mautinoa po o le a le mea o le a ou faia pe afai ou te le vave maua se galuega, ae sa ou tuu lo’u faatuatua i le ala na finagalo le Tama Faalelagi ou te mulimuli ai pea.
O lena vaiaso na sosoo ai i le inisitituti, sa ou iloa ai e uiga i se avanoa faigaluega o se taitai faamaopoopo o le ola tutoatasi. Sa ou talosaga i ai, faatalanoaina, ma maua le galuega. Ou te iloa na tuu e le Alii lena avanoa i lo’u ala.
O Le Mea ua Ou Maua ai le Faamafanafanaga ma le Malosi
O aafiaga na ou maua a o ou auai i le seminare ma le inisitituti ua faamalosia ai lo’u faatuatua ia Iesu Keriso ma suia ai lo’u olaga, e pei lava ona folafola mai e Peresitene Russell M. Nelson i le autalavou ma talavou matutua o le Ekalesia: “O le a la le mea o le a fesoasoani ia te oe e avea ai ma se soo tuuto faapena o Iesu Keriso? O se tasi o tali o le seminare ma le inisitituti—e le na o le auai ae ia auai ma le mataalia i vasega ma mulimuli ma le faamaoni i soo se galuega atofa e tuuina atu.”
Talu mai le mauaina o se galuega, e lei faigofie ai lava le olaga. Ae ou te faamautinoa e faamuamua le Alii ma auai i le lotu, pipii i le Tusi a Mamona, faalautele lo’u valaauga, ‘ai ma inu i le faamanatuga, ma auai i le inisitituti. O nei mea e fesoasoani ou te maua ai le mafanafana, e tusa lava pe faigata lo’u olaga. Ou te matua faafetai lava mo punaoa uma ua tatou maua i le talalelei a Iesu Keriso!
Ou te faamoemoe e mafai ona fesoasoani le inisitituti e te maua ai le mafanafana ma le faamoemoe i le Faaola e pei ona faia ia te a’u.