O Le a La’u Matafaioi i le Seleselega?

Pe a foliga mai ua sinasina se fanua saito, o se faailoga lea ua uma ona ola le saito ma ua saunia e aoina mai. O le seleselega e mafai ona faatusa i le aumaia o fanau a le Atua i Lona malo.

O se Selesaito

O se selesaito o se meafaigaluega mo le seleselega o fua o laau. O le selesaito e i ai se lau maai, ma pio lea e mafai ai e le tagata o loo faaaogaina ona tipiina ma le faigofie ni laau tetele. O se meafaigaluega faigofie e mafai e soo se tasi ona faaaogaina. E mafai ona faatusa i meafaigaluega o loo avanoa mo i tatou, e pei o le malumalu, tusitusiga paia, a tatou taleni, molimau, ma isi mea.

O le upu sasau o lona uiga o le tuleia po o le agai i luma. E tauaveina ai le vaaiga o se taumafaiga naunautai nai lo o se gaoioiga faasamasamanoa, ma faigofie. O le fesoasoani i tagata taitoatasi e o mai ia Keriso e manaomia ai le faatuatua, taumafaiga, finafinau, ma le tuuto.

Selesele

Pe a selesele mai faifaatoaga, latou te o i la latou fanua ma ao mai saito ua matua, fualaau faisua, laau-afu, po o fualaau aina. I le uiga o le talalelei, tatou te fesoasoani e selesele i taimi uma tatou te auai ai i gaoioiga e fesoasoani e aumai ai fanau a le Atua i Lona malo. E mafai ona aofia ai le faasoaina atu o le talalelei, faatinoina o galuega o le malumalu mo o tatou tuaa, ma le fesoasoani atu i e matitiva ma e le tagolima.

O lenei fuaitau ua tuuina mai ai se lagona o le faanatinati i le galuega o le seleselega. O i latou e mananao e ao mai a latou faatoaga e manaomia ona galulue a o saunia faatoaga po o saito, a leai o le a leai se seleselega. Na fetalai mai le Alii, “O le itula lenei e sefulutasi, ma o le taimi mulimuli lenei o le a Ou valaaulia ai e e galulue i lo’u tovine” (Mataupu Faavae ma Feagaiga 33:3).

Ia Teu Lelei pe Faaputuputu i se Faleoloa

E maea le seleselega pe a uma ona aoina mai fua lelei uma. E puipuia ma faasaoina i latou. E faapena foi, pe a tatou fesoasoani i tagata taitoatasi e osia ma tausia feagaiga ma le Atua, o le a puipuia ma faasaoina i latou mo le faavavau. Ua folafola mai e le Alii, “E matua tele lava lo outou olioli faatasi ma ia i le malo o lo’u Tama!” (Mataupu Faavae ma Feagaiga 18:15).

E ui o loo toe faia pea le vaaiga o le faapotopotoina i nei vaega, ae o mea e le o toe faia o faatonuga tonu ia o le mea po o le auala e selesele ai. O le taimi lenei mo le seleselega, ae o le liua e tulaga ese i tagata taitoatasi. Afai e te manatu po o le a se mea e mafai ona e faia e fesoasoani ai i le faapotopotoina o le seleselega, atonu e aoga le aoaoga a Peresitene Nelson: “Soo se taimi e te faia ai soo se mea e fesoasoani ai i soo se tasi—i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma sauniga o le malumalu, ua e fesoasoani e faapotopoto Isaraelu. E faapena lona faigofie.”