Papatisoga o Tinā

Sa taavilivili le vai i vae o Scott a o ia laa atu i totonu o le faatanoa o papatisoga. Ua i ai i totonu o le vai lona uso matua o Sandy. Sa ataata o ia ma u‘u le lima o Scott.

Sa toe ataata atu i ai Scott ma tilotilo ae i luga i tagata o loo matamata. Sa iai Tamā. Sa ia matuai fiafia lava! Ma sa iai foi Tinā. Sa ia talotalo mai ia te ia. Sa ofuina foi ona ofu papa‘e mo le papatisoga. O le isi uso o Scott o Gerrie o le a papatisoina Tinā.

Ina ua ta‘u atu e Tinā ia Scott o le a papatisoina foi o ia i le aso lava e tasi ma ia, sa matuai fiafia lava o ia. E lei ola ae Tinā i le lotu e pei o Scott. Sa amata ona alu o ia i le lotu ina ua uma ona feiloai ia Tamā.

Sa iloa lava e Scott e alofa Tinā ia Iesu Keriso, ma sa toetoe lava o vaiaso uma sa sau ai o ia ma i latou i le lotu. Sa tele foi taimi na o mai ai faifeautalai i lo latou fale. Ae na alu ai le tele o tausaga faatoa lagona e Tina ua saunia e papatiso. Sa matuai fiafia lava o ia ina ua mafai ona la faasoaina faatasi lenei aso faapitoa!

O Tina na aoaoina o ia e uiga i le papatisoga ma le faamauga ina ua valu ona tausaga.

“O le a e faia se folafolaga taua tele i le Tama Faalelagi e mulimuli pea ia te Ia ma Iesu Keriso,” sa ia fai mai ai. “O le taui, o le a e maua pea le Agaga Paia.”

Ma o lea la ua oo i le taimi e papatiso ai! Sa pupuni e Scott lona isu ina ua faatofu e Sandy o ia i lalo o le vai. Ina ua toe sau Scott i luga, sa emoemo mai ona mata ma ataata. Sa ia lagonaina le matua mamā lava! Sa i ai se lagona mafanafana i lona loto a o ia laa ese mai le vai papatiso.

Ina ua uma ona ia sui i ofu mago, sa nofo i lalo Scott ma matamata i le papatisoina e Gerrie o Tinā. Sa foliga fiafia tele o ia a o alu atu i totonu o le vai ma toe foi mai i fafo. Sa tilotilo sao atu o ia ia Scott ma ataata tele atu ia te ia.

O le aso na sosoo ai i le lotu, na faamauina uma ai i laua o ni tagata o Le Ekalesia a Iesu Keriso o le Au Paia o Aso e Gata Ai. Sa moeiini mata o Scott a o tuu e Tamā ma isi e umia le perisitua o latou lima i luga o lona ulu. Sa latou faamanuiaina o ia i le meaalofa o le Agaga Paia. Ona ia faalogologo lea ma le migao a o faamauina Tinā. Sa ia lagonaina le mafanafana, fiafia, ma le saogalemu. Na iloa e Scott sa ia lagonaina le Agaga Paia.

Ina ua mavae lea, sa latou toe nonofo i lalo e faalogologo i failauga. Ona faalogoina lea e Scott o se masῡsῡ. Sa tilotilo atu o ia ma le tei i le vaaia o se loimata o see ifo i lalo o le alafau o Tina.

Sa faauu Scott. “O seki oe, Tinā?” na ia musumusu mai ai. “Aisea ua e faanoanoa ai?”

Sa solo e Tinā lona alafau ma ataata. “Ou te le o faanoanoa,” sa ia toe musumusu mai ai. Sa ia tuuina lona lima faataamilo ia Scott ma fusi. “O nisi taimi e tagi ai tagata pe a latou fiafia. Ma ua ou fiafia tele i le taimi nei.”

Na toe fusi atu Scott. “Ma a’u foi.”

Ata na tusia e Raquel Martín