Savali i le Lotu

“Tinā, nofo i luga,” o le musumusu mai lea a Kupa.

“E lei oso ae le la.” Sa mavava Tinā. “E le mafai ona e moe mo sina taimi umi teisi atu?”

“Ua ou fiafia tele,” o le tala lea a Kupa. “O le Aso Sa, ma e mafai ona tatou o i le lotu!”

“Ia ua lelei. Ua e manumalo,” o le tala lea a Tinā. “Ae ou te manaomia lau fesoasoani e faasauni ai ou uso.”

E fiafia Kupa e fesoasoani ia Tinā. Sa amata o ia i le faapuna o le falaoamata saga e fai ai sadza mo ona uso laiti, o Agnes ma Sheila. Ina ua uma ona latou aai, sa fesoasoani Kupa e faamamā.

Sa ofu e Kupa lona ofu e sili ona fiafia i ai ma filifili lavalava mo ona uso. Sa faatumulia le potu i talieega a o ia fesoasoani ia i laua e fai o la lavalava. Sa matuai fiafia lava o ia!

“O oe o se fesoasoani lelei, Kupa,” o le tala lea a Tinā.

“Faafetai,” o le tala lea a Kupa.

A o amata ona latou o atu i fafo o le faitotoa, sa nonoa e Tinā ia Sheila i lona papatua i se ie afifi. “Ou te fiafia lava ua lava lo oulua matutua e savavali ai,” o lana tala lea ia Kupa ma Agnes.

Sa uu e Tinā le lima o Kupa, ma amata ona latou savavali i lalo o le auala pefu. I se mea mamao, sa mafai ai e Kupa ona iloa atu le malumalu sa fausia i Harare. “Ou te fiafia e vaai atu i le malumalu,” o le tala lea a Kupa.

“Ma a’u foi,” o le tala lea a Tinā. “Ua faamanuiaina i tatou e nonofo i se mea e mafai ona tatou vaaia ai lona fausiaina.”

Sa latou uia se auala ‘alo i togā saga. O nisi taimi, latou te tutu ai e malolo ma tuu atu ia Sheila sei tau gaoioi ma fālo. Sa latou talanoa, usu pese, ma faalogologo i manulele. Ina ua mavae le itula ma le afa o savavali, sa matuai fiafia lava Kupa e vaai atu i le lotu.

Sa faitau e Kupa le faailo: “O Le Ekalesia a Iesu Keriso o le Au Paia o Aso e Gata Ai.”

“Ua tatou taunuu,” na fai atu ai Mama. Sa ia tatalaina le fusi na faataamilo ia Sheila.

“Ma ua tatou toe vave foi!” o le tala lea a Kupa ma le fiafia.

E lei umi ae faafeiloai ma le fiafia e Kupa ma Tinā isi o loo ulufale atu i le fale. E fiafia Kupa e faatasi ma tagata i le lotu. Sa ia lagonaina le alofagia o ia iina.

Na maua e Kupa ma lona aiga se nofoaga e nonofo ai. Sa lelei le lagona o le faamaloloina o ona vae. Ina ua ia ai ma inu i le faamanatuga, sa mafaufau o ia ia Iesu Keriso. Ona ia faalogologo lelei lea a o faamatala mai e le epikopo o le Aso Sa anapogi ma valaaulia tagata e faasoa mai a latou molimau.

Sa matamata ma faalogologo Kupa a o o mai isi i luma o le falesa e faasoa mai mea sa latou talitonu i ai. Sa manao o ia ia latou iloa uma e i ai foi sana molimau. Sa savali atu o ia i luma o le potu. Sa ia lagonaina sina popole, ae sa ia iloa le mea sa ia manao e fai atu.

Sa ia manava loloa, tu maualuga, ma fai mai, “Ou te fiafia e vaai i le malumalu. Ou te iloa o se nofoaga faapitoa lea e aoao ai e uiga i le fuafuaga a le Tama Faalelagi. O lo tatou ola o se meaalofa taua mai ia te Ia. Ou te iloa e moni tusitusiga paia. Ou te iloa e alolofa le Tama Faalelagi ma Iesu ia te a’u. O loo ou taumafai ia agalelei ma fesoasoani e pei o Iesu. Ou te iloa e moni le Ekalesia. I le suafa o Iesu Keriso, amene.”

Sa tilotilo atu Kupa i tagata o loo i totonu o le potu. Sa latou ataata atu ia te ia. Sa ataata tele Kupa ma toe savali atu i lona nofoa. Sa fusi o ia e Tinā a o nofo i lalo. Sa fiafia Kupa sa maua le lototele e faasoa atu ai lana molimau. E fiafia Kupa i Aso Sa.

Ata na tusia e Fotini Tikkou