O le Tali a Cole

“O au o se atalii o le Atua, ua Ia auina mai au nei, ia ou nofo ai i lenei lalolagi ma matua agalelei. …”

Sa faatumulia mata o Cole i loimata, ma sa lē toe pese o ia. Sa ia fesili atu i lona faiaoga o le Peraimeri pe mafai ona alu i le faletaele.

I le faletaele, sa sioa atu ai Cole i le faaata. Sa tu o ia iinei ma lona tamā i le tausaga talu ai, a o lei papatisoina Cole. Sa laei uma e i laua ofu papae.

“O le a e osia se feagaiga tāua tele,” o le tala lea a Tama. “O le asō o le a e folafola atu ai e mulimuli pea ia Iesu Keriso ma taumafai ia avea faapei o Ia.”

Sa matuai fiafia ma mafanafana Cole ina ua alu ane o ia mai le vai. Sa ia iloaina sa ia faia le filifiliga sa’o ina ia papatisoina.

Ae o lenei, ua ese mea uma lava. E le’i faatasi Tamā ma ia i le asō. E le’i toe sau lava o ia i le lotu.

Sa masῡsῡ o Cole ma solo ona mata. I le taimi muamua, ina ua misia e Tama le lotu, sa manatu Cole ua ma’i o ia. Pe atonu foi e tatau ona alu o ia e faigaluega. Ona atili faaitiitia lava lea o le sau o Tama. E lei umi, ae le’i toe sau lava o ia ma i laua.

Na manatua e Cole le aso na iu ai ina ia lagonaina le lototoa e fesili atu ai i lona tinā e uiga ia Tamā. Sa mapuea Tinā ma fai mai, “E le o toe mautinoa e Tamā e moni le Ekalesia. O loo taumafai o ia e filifili po o le a le mea e talitonu i ai.” Sa foliga faanoanoa o ia, ma sa iloa e Cole sa faigata foi ia te ia.

Sa faatumulia le mafaufau o Cole i fesili taufaafefe. E mafai faapefea ona leiloa i se tasi lana molimau? Pe o le a leiloa ea e Cole lana ia foi molimau? O le a le uiga o nei mea uma mo lo latou aiga?

Sa fusi e Cole ia Tinā. “O le a se mea e mafai ona ta faia? E mafai faapefea ona ta fesoasoani ia Tamā e maua lana molimau?”

“E na o le Tama Faalelagi lava e mafai ona fesoasoani ia Tamā e toe maua lana molimau,” o le tala lea a Tinā. “Ae e mafai ona ta tatalo mo ia.”

Talu mai lena taimi, sa tatalo ai Cole mo Tamā i aso uma. Ae na faaauau pea le āluga o masina, ma e leai lava se mea na suia. Sa lagona e Cole le fefe. Sa popole o ia i taimi uma . Sa faigata ona alu i le lotu e aunoa ma Tama. Sa faigata ona talitonu e mafai ona faatasitasi lona aiga e faavavau.

Sa soloiesea e Cole ona loimata na totoe ma fai se isi tatalo le leoa. Ona ia savali atu lea i le peraimeri. Ina ua sau o ia i totonu, sa faamanatu atu e Sister Snow i tagata uma e uiga i le konafesi aoao i le faaiuga o le vaiaso a sau.

O le Aso Sa na sosoo ai, sa nonofo ai Cole ma Tinā ma matamata i le konafesi. Sa i le fogafale i luga Tamā e matamata i le pasiketipolo. Sa faalogologo Cole i le saunoaga a le perofeta e uiga i lona olaga a o tamaitiiti. Sa faateia o ia i le iloaina e lei o foi matua o Peresitene Nelson i le lotu a o laitiiti o ia.

Ona saunoa lea o Peresitene Nelson e uiga i lona moomooga ina ia faamauina i ona matua i le malumalu. Sa le toe minoi Cole, ma faalogologo lelei. Sa faatalitali Peresitene Nelson mo le tele o tausaga, e o‘o lava ina ua mavae le tai 80 o tausaga o ona mātua! Ae na iu lava ina faamauina i latou o se aiga e faavavau.

Sa lagona e Cole le musumusu atu o le Agaga Paia ia te ia o le a lelei foi mea uma e uiga ia Tamā. E tatau ona onosai Cole. Ae o le a fesoasoani le Tama Faalelagi i lona aiga, e pei lava ona Ia fesoasoani i le aiga o Peresitene Nelson.

E ui lava o le tali e le o le mea lea sa manao i ai Cole, ae sa ia iloaina sa faafofogaina ma tali mai e le Tama Faalelagi lana tatalo. E alofa le Tama Faalelagi i lona tamā, ma e alofa foi o Ia ia Cole.

Ata na tusia e Brenna Vaughan