O le Pese a Sundae

Saunia e Abby Larkins

Sa iai se manatu ia Sundae! “E te fia sau i lo’u papatisoga?”

O se tala moni mai Filipaina.

O teineiti e toalua o loo taaalo ma manu meataalo

Sa taaalo Sundae ma lana uo o Amy i le aso atoa. Sa laua faataitaia le faatafiti i fafo ma taaalo i manu utu meataalo. Sa malie, ae sa manaomia ona alu Sundae i le fale.

“E mafai ona e toe taalo taeao?” Na fesili ai Amy.

Sa le iloa e Sundae po o le a le tala a fai. O taeao o le a papatisoina ai o ia! O Amy e le o se tagata o le Ekalesia. E faapefea ona ta’u atu e Sundae ia te ia e uiga i le papatisoga?

Ae o Amy o le uo a Sundae. Atonu e le afaina.

“E le mafai ona ou taalo taeao ona o lo‘u papatisoga,” o le tala lea a Sundae.

“O le a le uiga o lena mea?” Na fesili ai Amy.

“O se mea matou te faia i la’u ekalesia,” o le tala lea a Sundae. “Sa papatisoina Iesu Keriso, ma ou te manao ia papatisoina ina ia mafai ona ou mulimuli ia te Ia.”

O teineiti e toalua o loo tutu ma talanoa

Ona oso a’e lea o se manatu ia Sundae! “E te fia sau? O le a ou usuina foi se pese.”

Sa ataata Amy. “Ia, ou te fia alu atu la!”

O le aso na sosoo ai, na matamata ai Sundae i tagata o o mai mo lona papatisoga. Ona ia vaai lea ia Amy! Sa talotalo atu Amy ia te ia. Sa ataata Sundae ma toe talotalo mai iai.

E le’i umi ae oo i le taimi e amata ai. Sa faia e Tinā se lauga puupuu. Fai mai o ia, pe a papatiso Sundae, o le a ia folafola atu e mulimuli ia Iesu Keriso ma tausi poloaiga. Ona faamauina lea o ia. O lona uiga o le a faamanuiaina o ia i le meaalofa o le Agaga Paia.

“E mafai ona tatou lagonaina uma le Agaga Paia,” o le tala lea a Tinā. “Ae a faamauina i tatou, e mafai ona faatasi le Agaga Paia ma i tatou i taimi uma.”

Ona oo lea i le taimi mo le pese a Sundae. Sa savali atu o ia i luma o le potu ma manava loloa. Ona amata lea ona ia usuina le pese “Pe a Ou Papatiso.”

Ou te manao ia mama lo’u olaga e pei o le eleele i le taimi lava e uma ai timuga.

Ou te manao ia avea ma tagata sili ou te mafaia ma toe nofo faatasi ma le Atua.

O se teineitiiti o loo ofuina se ofu paepae ma pese

Ina ua uma, sa lagona e Sundae le fiafia tele. Sa ia iloa o lenei lagona o le Agaga Paia. Sa ia vaaia Amy o ataata ma loimata i ona mata.

Ou te manatu o loo lagonaina foi e Amy le Agaga Paia, sa ia mafaufau ai.

Ina ua uma ona papatisoina ma faamauina Sundae, sa ia mauaina Amy.

“Faafetai mo le valaauliaina o a’u,” o le tala lea a Amy. “Sa ou lagonaina ai se lagona lelei tele. Ua ou fiafia lava mo oe.”

Sa ataata atu Sundae ia te ia. “Faafetai mo le avea ai ma a’u uo,” o lana tala lea. Sa fiafia o ia i le taimi nei ua i ai ni uo lelei se toalua—o Amy ma le Agaga Paia.

O se teineitiiti o loo papatiso a o matamata se isi teineitiiti mai fafo o le vai papatiso