Ua Avea ma se Faifeautalai

Sa fesoasoani Thad ia Tinā e seti le laulau mo le taumafataga o le afiafi. “E mafai ona ou ofuina o’u ofu lotu i le po nei?” Na fesili ai Thad. “Auā o lea e o mai faifeautalai i le taumafataga o le afiafi?”

Na ataata Tinā. “Ou te manatu o se manatu lelei tele lena.”

A o lei faia le taumafataga o le afiafi, sa alu Thad i le fogafale i luga e fai lona ofutino paepae ma lona fusiua.

“Aisea ua fai ai lou fusiua i le asō?” o le fesili lea a lona tuafafine matua o Mindy. “E le o se Aso Sa lenei.”

“O la e o mai faifeautalai,” o lana tala lea. “Ou te fia faapei o i la’ua!”

Sa tatagi le logo o le faitotoa, ma sa taufetuli ifo Thad ma Mindy i le fogafale i lalo. Sa la vaaia ni faifeautalai se toalua o loo ofutino papae ua o mai i totonu. Sa latou nonofo i lalo, faamanuia meaai, ma amata ona aai. Sa faaeteete Thad e aua nei faamasaaina ni supakeli i luga o lona ofutino paepae mamā.

“Ou te fiafia i lou fusiua,” o le tala lea a Elder Cowley. “Pei lava oe o se faifeautalai.”

Sa ataata Thad. “O le a ou auauna atu i se misiona pe a ou matua.”

“O se sini maoa‘e tele lena!” Na saunoa atu ai Elder Wakefield. “E mafai foi ona e amata avea nei ma se faifeautalai.”

Sa nofo maualuga Thad i lona nofoa. “E faapefea?”

“E mafai ona avea oe ma faataitaiga lelei i isi. E mafai ona e auauna i lou aiga. Ma e mafai ona avea oe ma se uo lelei.”

Sa mafaufau i ai Thad. “E mafai ona ou faia lena mea.”

O le aso na sosoo ai, sa taumafai malosi ai Thad e agalelei ia Mindy. Sa fesoasoani o ia ia Tinā i feau. Sa ia faasoa atu ana meataalo ina ua sau se uo e taalo.

I le faaiuga o le aso, sa fusiina o ia e Tina. “O le a avea oe ma se faifeautalai maoae i se aso.”

Na ataata tele Thad. “A lea ua avea a‘u ma faifeautalai!”

Ata na tusia e Melissa Manwill Kashiwagi