Taimi Faigatā i Lou Aiga?
O upumoni nei e ono e tatau ona manatua pe a e lagona e le o lelei lou olaga faaleaiga.
Ata na tusia e Emily Davis
Pe na i ai se taimi na e i ai i se tulaga faigata faaleaiga?
Mo se faataitaiga, atonu na e oo i le tulaga o:
-
Matua ua tatalaina faaipoipoga.
-
Feeseeseaiga po o le finau i le fale.
-
Faigata ona fegalegaleai ma se tei po o se mātua.
-
Sauaina pe le amanaiaina.*
-
O se tagata o le aiga o loo faia ni filifiliga le lelei, tuua le Ekalesia, po o le maliu.
Po o a lava foliga o taimi faigata i lou aiga o i ai mo oe, e na o na faapena lava—e faigata. O mea nei e ono e tatau ona e iloa.
1. E alofagia oe
E tusa lava pe e te lagonaina le alofa mai lou aiga faalelalolagi pe leai, ia iloa o oe o se tasi o le aiga o le Tama Faalelagi, ma e sili atu lona alofa ia te oe nai lo le mea e mafai ona e mafaufauina. E ui lava na foafoaina e le Atua ma Iesu Keriso lalolagi e le mafaitaulia, ae e silafia ma alofa le Atua ia te oe.
“E ui lava tatou te le atoatoa, ae e alofa atoatoa o Ia ia i tatou. E ui atonu tatou te lagona ua tatou se ma leai se tapasā, ae siomia atoa lava i tatou i le alofa o le Atua.”
2. E le o tuua na o oe.
Afai e te lagona le tuuatoatasi, aua—ua i ai ni Tagata malolosi se toatolu i ou autafa. E mafai ona e tatalo i lou Tama Faalelagi, o lē e faafofoga ma tali mai ia te oe. E mafai ona e faalagolago i le Faaola, o lē e malamalama i taimi uma, e tusa lava pe le malamalama isi tagata (tagai i le Alema 7:11–12). Ma e mafai ona e maua le Agaga Paia i taimi uma, e faamafanafana oe ma taiala oe, a o e taumafai e tausia au feagaiga.
E ese mai i tagata e sili ona malolosi i le atulaulau, e toatele isi tagata o loo i ou autafa—i itu uma e lua o le veli. O “autau o le lagi” o loo faamalosiauina oe. E manaomia oe. Ua avea oe ma ni ō. E le o tuua lava na’o oe.
“O le a i ai se aso o le a e tu ese ai ma vaai i ou taimi faigata, ma o le a e iloa ai sa i ai pea [le Atua] i ou tafatafa.”
3. E taua lau faataitaiga
E faalagolago i lou tulaga, atonu e tele pe leai foi ni mea e mafai ona e faia e foia ai faafitauli o lou aiga pe suia ai foi le auala e amio ai ma talitonu ai se tagata o le aiga. Ae a o e filifili e mulimuli i le Faaola, o lau faataitaiga lelei e mafai ona faia ai se eseesega sili atu nai lo le mea e te iloaina.
“O la tatou faataitaiga faaKeriso o le agalelei, amiotonu, fiafia, ma le alofa faamaoni mo tagata uma e mafai ona fatuina ai … o se malamalama taiala mo i latou.”
4. E mafai ona fesoasoani le Alii ia te oe e alofa ma faamagalo atu
I le tele o tulaga, o se tasi o mea sili e mafai ona e faia mo tagata o lou aiga o le taumafai lea e alofa ma faamagalo i latou. Afai e foliga mai e faigata lena mea, faalagolago i le Alii e fesoasoani ia te oe.
“E ala i Lana Togiola e lē i’u, e mafai ai ona e faamagalo atu ia i latou o ē faatiga ia te oe ma ē atonu latou te lē talia lava le tiutetauave mo lo latou agaleaga ia te oe.”
5. O le a matagofie fuafuaga faaleaiga e faavavau
Atonu e te popole i le lumanai o lou aiga—e oo lava i le faavavau. Ae e mafai ona e faatuatua e mafai e lo tatou Tama Faalelagi alofa ona faasa’oina mea uma.
“Tau lava o lou ola agavaa mo le malo selesitila, ma o le a sili atu le matagofie o faatulagaga o le aiga nai lo le mea e mafai ona e manatu i ai.”
6. E mafai ona avea ou tofotofoga ma faamanuiaga
A o e liliu atu i le Tama Faalelagi, o le a Ia fesoasoani ia te oe i ou tofotofoga. E mafai foi ona Ia ave mea faigata ma liliu atu i lou lelei (tagai i le Mataupu Faavae ma Feagaiga 98:3).
“Ma pe le malie ea pe afai, i le iuga o o tatou olaga, e mafai ona tatou vaaia ai o na sootaga [faaleaiga], e oo lava i na taimi luitauina, o mea tonu ia na fesoasoani ia i tatou ia avea atili e faapei o lo tatou Faaola? O fegalegaleaiga faigata taitasi o se avanoa e aoao ai le ala e alofa ai i se tulaga loloto atu—o se tulaga faaleatua.”