Faaaogaina o le Taiala
Fesoasoani mai se Punavai Atoatoa
E tusa lava po o a tauiviga o loo e feagai ai, o le a fesoasoani Iesu Keriso ia te oe a o e liliu atu ia te Ia.
O Le Mamanu, saunia e Jeanette Bourup
E i ai taimi tatou te manaomia uma ai sina fesoasoani laitiiti. O nisi taimi e tele se fesoasoani e manaomia. O le mea moni, e masani lava ona sili atu le lelei o le olaga pe a e le taumafai e alu na o oe.
O Iesu Keriso o lou punavai atoatoa lea o le fesoasoani, faamoemoe, ma le malosi. E mafai foi ona Ia fesoasoani e suia oe mo le lelei sili atu—atonu e oo lava i auala e te le’i manatu e mafai ona fai.
O Se Suiga o le Loto
Pe na e tatalo ea ina ia faamaluluina e le Atua loto o ou fili? Afai o lea, o loo e i ai i se aumea lelei (tagai i le 3 Nifae 12:44; Moronae 7:48). E tusa lava pe leai ni ou fili i lena lava lagona o le Tusi a Mamona (e te iloa, o fili ua faaauupegaina i auupega ma ua saunia e osofaia), atonu sa e tatalo ina ia faamaluluina e le Atua le loto o se tasi e le’i agalelei ia te oe.
Ae pe na e mafaufau ea e tatalo ma ole atu i le Atua e faamaluluina lou loto? Atonu o loo faigata ona e faamagalo atu i se tasi. Pe faaauau pea ona e ita, e ui lava e te le manao ai. Pe e te manao foi ia e lagona le agalelei sili atu i ou tei e ui lava i le mea moni e faapea, o nisi taimi latou te faaita ai oe.
“O [Iesu Keriso] o le a Ia suia lou loto ma lou olaga. O sina mea itiiti i lea mea itiiti, o le a e tuputupu ae ai ma avea atili e faapei o Ia. O lau sootaga o le feagaiga ma Ia o le a aumaia ai ia te oe le faaaogaina sili atu o Lona mana” (Mo Le Malosi o le Autalavou: O Se Taiala mo le Faia o Filifiliga [2022], 8, faaopoopo le faamamafa).
Pe le o se folafolaga maoae ea lena? E tusa lava po o le a le mea o loo e tauivi ai, e oo lava i lou lava loto, e mafai ona fesoasoani Iesu Keriso. E mafai faapefea ona e liliu atu ia te Ia i le asō?