O loo e i ai i le Au!
E i ai se mea matagofie e te saofaga ai i le galuega a le Atua.
Ou te le lelei i le pasiketipolo. Ae mo se mafuaaga, sa valaaulia ai pea a’u e a’u uo e taalo. I se tasi taaloga, sa ou faamoemoe o le a le oo mai lava le polo ia te a’u. Ia, sa tupu, ma saou filifili ai e togi le polo. A o lele atu le polo agai i le ato, sa ou mautinoa o le a misi. Na tau le polo i le laupapa i tua ona pa’u lea i totonu o le mama.
Sa ulu la’u togi!
Sa alalaga a’u uo a o ou tu ma le le talitonu. Sa le’i tele se isi mea na ou saofaga ai i lena taaloga, ae sa manaia le lagona o le avea ma se vaega o se ’au ma auai ai i la’u lava ala itiiti.
E sili atu ona taua ma umi atu nai lo le avea ma se vaega o se ’au pasiketipolo, se vaega o musika po o fale faafiafia, se ’au faigaluega, po o soo se isi lava ituaiga o ’au o le avea ma se vaega o le ’au a le Atua ma auai i Lana galuega o le faaolataga ma le faaeaga.
Pe e te mafaufau pe tele ni mea e mafai ona e faia i le galuega a le Atua? Afai e te faia, o nisi nei o mea aogā e tatau ona manatua.
E Manaomia Outou.
E mafai e le Atua ona faia Lana lava galuega (tagai i le 2 Nifae 27:20–21), ae ua tatou maua le avanoa e auai faatasi ai ma Ia i Lana galuega. Lea e aofia ai ma oe!
Afai e i ai se taimi e te lagona ai le le agavaa, ia manatua e le finagalo le Atua ia e i ai i autafa o le laina. E manaomia e Ia oe ina ia avea oe ma se tasi o Lana ’au ma auai ma le olioli i Lana galuega.
Ua fetalai mai le Alii, “O outou o e e o atu i le galuega a le Atua, vaai ia outou auauna atu ia te ia ma o outou loto atoa, mafaufau atoa, manatu atoa, ma le malosi atoa.”
“O lea, afai ua ia te outou le manao e auauna atu i le Atua, ua valaaulia outou i le galuega” (Mataupu Faavae ma Feagaiga 4:2–3).
Afai e te manao i ai, o le a ave e le Atua au taleni ma tomai tulaga ese ma faaaogaina i ni auala ofoofogia. Atonu e te le o vaai i ai i le taimi nei, ae e tele mea e manaomia e le Atua ona e faia e fesoasoani ai e uunai i luma Lana galuega maoae.
Ia manatua ia Poloaiga Sili e Lua
E le lava le auauna atu i le Atua ma o tatou loto atoa, malosi, mafaufau, ma le malosi atoa. E tatau foi ona tatou alolofa ia te Ia i mea uma ua tatou maua (tagai i le Mataupu Faavae ma Feagaiga 59:5). Na aoao mai le Faaola o poloaiga silisili o poloaiga uma o le:
“Ia e alofa atu i le Alii lou Atua ma lou loto atoa, ma lou agaga atoa, ma lou manatu atoa” ma “Ia e alofa atu i le lua te tuaoi e pei o oe lava ia te oe” (Mataio 22:37, 39).
O lo tatou alofa i le Atua e faamalosia ai o tatou manaoga ma le tomai e auauna atu ai ia te Ia. E faateleina ai foi lo tatou gafatia e alolofa ai ma auauna atu i isi. Afai e mafai e i latou o loo siomia oe ona lagona lou alofa moni ma le tausia o i latou, o le a e maua avanoa e faamanuia ai i latou ma fesoasoani ia latou lagona le alofa o le Atua.
Suesue—Ona Tautala Atu Lea!
A o lei faatulagaina le Ekalesia, sa faailoa mai e le uso matua o le Perofeta o Iosefa Samita o Ailama lona manao e auauna atu. Sa ia fesili atu ia Iosefa po o le a se mea e mafai ona ia faia e fesoasoani ai i le galuega a le Atua. Na maua e Iosefa se faaaliga mo Ailama. Na fetalai le Alii:
“Aua le saili e talai atu la’u upu, ae ia muamua saili ia maua la’u upu, ona matala ai lea o lou laulaufaiva; ona oo lea, afai e te manao i ai, o le a e maua lo’u Agaga ma la’u upu, ioe, le mana o le Atua i le faatalitonuina o tagata” (Mataupu Faavae ma Feagaiga 11:21
O se lesona lelei lea ma se mamanu mo i tatou uma. Muamua, suesue i le afioga a le Atua, tuu i lou loto, ona mafai lea ona e tautala atu ma faasoa atu. E te le iloa lava po o le a le lelei o le a oo mai pe a e tautala atu. E mafai ona e fesoasoani e aumai le malamalama ma le upumoni a le Atua ia i latou “o e ua taofia mai le upumoni ona ua latou le iloa le mea e maua ai” (Mataupu Faavae ma Feagaiga 123:12).
Ia Tausisia se Vaaiga e Faavavau
O le galuega a le Atua e mo Lana fanau uma lava. O se vaega taua o lena galuega o loo faia i malumalu i le salafa o le lalolagi, e oo lava ia i latou o e na ola ma maliliu e aunoa ma se malamalama i le talalelei, o e semanu e mauaina”“ (Mataupu Faavae ma Feagaiga 137:7).
Atonu e te mafaufau pe o le mea moni lava o loo e faia i le taimi nei e faia ai se eseesega, ae e mafai ona e fesoasoani ia i latou o loo i le isi itu o le veli e ala i le faia o papatisoga mo i latou i le malumalu. O le auai ma tapuai i le malumalu i lou olaga atoa o le a fesoasoani ia te oe e tausia ai se vaaiga e faavavau—ia mafaufau selesitila—ma aumai le olioli ma le mana faaleagaga ia te oe ma isi iinei ma le olaga a sau.
Faatasi ai ma lenei vaaiga e faavavau, o le a e iloa ai o loo e i ai i le ’au—’au manumalo a le Atua—ma o loo i ai sau vaega taua e faia i ai. E tele naua mea e mafai ona e faia e fesoasoani ai i lenei galuega taua o le faaolataga ma le faaeaga.
Auai ma vaai po o le a le mea e mafai ona faia e le Atua e ala mai ia te oe.