Leo o le Autalavou

Aveeseina o Mea, Mauaina o le Faaola

Gi Hyun M., 16 tausaga, Laguna, Filipaina

E fiafia e usu viiga, faalogologo i musika, ma auauna atu i le autalavou.

Sa masani ona ou le fiafia e alu i le lotu aua sa ou lagonaina sa leai ni a’u uo iina. I le aoga, sa i ai ni a’u uo e mafai ona matou taliē faatasi. Ae sa ou lagonaina sa ese tamaitai talavou i le lotu mai ia te au pe atonu foi e le fiafia i o’u uiga. Sa amata ona ou faafoliga o loo ou moe ina ia ou le auai ai i le lotu.

Ona oo mai lea o le faama’i o le KOVITI-19, ma na matou oo ai i se taimi o le aveesea o mea. Ou te nofo faatasi ma lo’u tina ma lo’u tinamatua. Na leai se galuega a lo’u tina, ma sa matou manatu e tatau ona matou lafoaia lo matou fale. Sa amata ona ou sailia se nofoaga taugofie e nofo ai, ae ou te lei maua se mea. Nai lo lena, sa ou mauaina le Faaola.

Na amata ona faasalalauina e le Ekalesia ia sauniga lotu i luga o le initoneti, ma e fafagu au e lo’u tina ma matamata, lea na fesoasoani ia te au e “faafoliga seia ou oo i ai.” Sa ou lagonaina e pei o loo aapa mai le Faaola ia te au, e tusa lava pe ou te le o aapa atu ia te Ia. Ma ina ua amata ona ou aapa atu ia te Ia, sa Ia faia Lona aao ia sili atu ona mauagofie. O le aveesea o mea na fesoasoani ia te au e maua ai le Faaola.

Sa tuuina mai e lo matou epikopo ia te au se valaauga, ma sa avea isi tamaitai talavou ma a’u uo aua sa ou tatalaina atu au lava ia i latou. Talu ai sa ou lagonaina e pei e leai ni a’u uo, sa ou iloa ai atonu o o’o foi i ai nisi i lenei mea. Sa ou manatu ai e tatau ona ou faia le uluai laasaga ma aapa atu.

Ou te manatua le taimi na oo mai ai lo’u taimi e fesoasoani ai e aoao atu se lesona i le lotu. I totonu, ou te le’i manao tele e fai. Ae ina ua uma ona ou faia ma le manuia, sa ou lagonaina le olioli. Na aoaoina au e lenei mea e matua matagofie lava le talalelei. E lagona le le mafaamatalaina i se auala lelei.

I le faaiuga, sa fesoasoani le Alii i lo’u tina e maua se galuega fou. O le mea e faafetai ai, o loo matou nonofo pea i lo matou fale, ma sa faia e le Faaola o se nofoaga e sili atu ona paia. O loo matou taliē pea ma a’u uo i le aoga. Ae e leai se mea e sili atu nai lo le olioli ua ofoina mai e le Faaola.