Na o le Faatekinolosi: Misiona o Auaunaga
Misiona o Auaunaga: E Aoga le Malaga
Ina ua toe foi mai pepa o la’u misiona, sa ou faamoemoe i se tofiga i se misiona aoao atu. Sa ese le auala na alu ai lo’u ala, mo le lelei sili atu.
Ou te manatu pe a vaai tagata i misiona, e masani ona latou vaai i misiona o auaunaga o se misiona “maualalo” e faatusatusa i se misiona aoao atu. Ou te tautino atu a o ou talosaga mo la’u misiona, sa ou maua nisi o nei lagona. Sa ma galulue ma o’u taitai perisitua, le Matagaluega a Faifeautalai, i la’u talosaga mo le silia i le ono masina. Sa ou mana’o e auauna atu i se misiona aoao atu. Na ou lagona e faapea na ou manaomia ona faia.
O Se Valaauga e Sili Atu Ona Patino
Mulimuli ane, sa ou feiloai ma lo’u peresitene o le siteki, ma sa ou iloa ai ua valaauina au i se misiona o auaunaga. Sa agai atu lo’u ala i se isi itu nai lo le mea sa ou mafaufauina muamua, ae o le mea na faateia ai, sa ou lagonaina le filemu. Sa ou iloa e sao lea.
Talu mai le amataga o la’u misiona, ua mafai ona ou faatasitasi ma tagata a o latou nonofo na o i latou i potu mo tui o le kanesa ma auauna atu i le malumalu o se tagata faigaluega i sauniga. Sa ou maua foi le avanoa e tusi ai tusiga mo le AMa Faalevaiaso, e faaaoga ai lo’u fiafia i le tusitusi e fesoasoani ai e aumai le malamalama ma le faamoemoe i isi.
Ou te talitonu atonu sa mafai ona ou alu i se misiona aoao atu i le taimi atoa. Ae peitai, ou te iloa ina ua ou mauaina lo’u tofiga e auauna atu o se faifeautalai o auaunaga, sa itiiti lava se mea na faatatau i lo’u ola maloloina faalemafaufau ae sili atu ona faatatau i le mea sa sili ona manaomia ai au e le Alii. Ou te manatu semanu ou te misia aafiaga patino loloto na ou maua i la’u misiona auauna atu.
E Le Maualalo ae Tutusa
O misiona o auaunaga e le itiiti ifo pe a faatusatusa i misiona aoao atu. O se talafaatusa lenei ua ou faalogo i ai: O faifeautalai e aoao atu o le fofoga lea o le Faaola; o faifeautalai o auaunaga o Ona aao ia. O le faamoemoega o le faafaifeautalai o auaunaga ua tau mai ai tatou te auauna atu “ma le alofa agalelei e pei ona faia e le Faaola.”
Tatou te tuuina atu se lima faamafanafana ma le alofa ia i latou o loo manaomia le fesoasoani. O le mea lena na faia e le Faaola, ma o le mea lena ua valaauina i tatou e faataitai i ai.
Alu ma Fai
Ou te iloa o loo vaavaai mai le Tama Faalelagi mo i tatou taitoatasi ma e silafia e Ia le mea e sili mo i tatou. Po o le a lava lou tofiga faamisiona, afai na te valaauina oe e auauna atu, auauna atu.
I upu o le Faataoto 3:5–6: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”
Ou te faamautinoa atu lena mea, ia te outou.