Sau, Mulimuli Mai ia te A’u
Mataupu Faavae ma Feagaiga 3–17
OaNatia
A o e faia au suesuega o tusitusiga paia i le masina lenei, e mafai ona e maua le anoanoai o lesona ma upumoni.
Ata na tusia e Emily Jones
Atonu ua e faalogo e i ai se eseesega i le va o le faitau ma le suesueina o tusitusiga paia. jPe a e suesue, e te taulai atu, auai, fiailoa, tatalo, ma tatala atu i le Agaga. E te faia fesootaiga ma aoao lesona patino ma upumoni e faavavau.
O ni nai faataitaiga nei o nisi o lesona ma upumoni na tatou mauaina a o tatou suesueina tusitusiga paia o loo aofia i le fuafuaga suesue o le Sau, Mulimuli Mai ia te A’u i le masina lenei. O a ituaiga oa e mafai ona e maua?
Na leiloloa itulau, ae sa i ai se fuafuaga a le Alii.
Na amata papatusi auro i le otootoga a Mamona o le tusi a Liae. Na faaliliuina e Iosefa Samita itulau e 116—ae na leiloloa itulau ia Matini Harisi.
Pe le mafai ea e Iosefa ona toe faaliliuina? Ioe, ae sa i ai i fili o Iosefa ia itulau na leiloloa ma o le a o latou vaavaai mo eseesega i le va o faaliliuga e lua (pe fatu ni faaliliuga) e osofaia ai o ia (tagai i le Mataupu Faavae ma Feagaiga 10:29–32).
O le mea e lelei ai, sa i ai se fuafuaga a le Alii. I seneturi na muamua atu, sa Ia poloaiina ai Nifae e fai se seti lona lua o papatusi lea na aofia ai le tele o na lava mea ae taulai atili atu i mea faaleagaga (tagai i le 2 Nifae 5:29–33). Ona musuia lea e le Alii o Mamona e faaaofia nei papatusi laiti faatasi ai ma lana aotelega o isi mea uma (tagai i le Upu a Mamona 1:3–7).
Na faamautinoa e le Alii o loo i ai pea se faamaumauga o mea e pei o le faaaliga vaaia a Liae o le Laau o le Ola ma le malaga a lona aiga i le nuu folafolaina. E i ai se aso o le a toefuatai mai ai le vaega o loo misi. Ae o le taimi nei, ua ia i tatou le mafuaaga sili atu e suesue ai ma fiafia i mea ua tatou maua, i le mafaufau ai i taumafaiga uma na faia e le Alii ina ia mautinoa ai ua tatou mauaina.
Sa auai Oliva Kaotui i le au ma maua ni aafiaga e le mafaagaloina.
Mataupu Faavae ma Feagaiga 6; 13; Iosefa Samita—Talafaasolopito 1:66–75
Vaai faalemafaufau o oe o Oliva Kaotui, o se faiaoga e 22 tausaga le matua, o lē na feiloai ma le aiga o Iosefa Samita le Matua ma aoao i mea ofoofogia o loo faia e lo la atalii o Iosefa—ona e aafia ai lea!
O le mea e sosoo ai, ua e tusitusiupu e faamalau mai e Iosefa e faaliliu ai le Tusi a Mamona. Oka se aafiaga! Ina ua fai mai Oliva, “O aso nei e le mafai ona galo” (Iosefa Samita—Talafaasolopito 1:71, vaefaamatalaga), atonu o se faamatalaga itiiti lena.
A o faaliliuina ma tusia e Iosefa ma Oliva le Tusi a Mamona, sa i ai ni a la fesili e uiga i le papatisoga. E mafai ona e aoao i le mea na tupu ina ua la aveina atu a la’ua fesili i le Alii, ma taunuu ai i ni aafiaga e sili atu ona paia e le mafai ona galo i se tasi o nei alii.
E aumaia e le Alii tagata i o tatou olaga e fesoasoani ia i tatou—ma mo i tatou e fesoasoani ai.
O se mea moni taua lenei: O le faamanuiaina e masani lava ona manaomia ai le fesoasoani mai isi tagata.
E tuu e le Tama Faalelagi tagata i o tatou ala o e e mafai ona faamanuiaina o tatou olaga (ma o o latou olaga e mafai ona tatou faamanuiaina). E faatatau lenei mea i mataupu faaleagaga ma faaletino. Sa feiloai Iosefa Samita ia Oliva Kaotui ona o Oliva, o se faiaoga, na feiloai i matua o Iosefa i le gasologa o lana galuega. Ua uma ona faauo Oliva ma le aiga o Uitimera, o e na vave ona liua ma amata ona faia galuega e le mafai ona faia e Iosefa na o ia.
E tele naua mea maoae na ausia ona o nei tagata na “te’i” ua oo mai i olaga o le tasi ma le isi. Pe e te manatu o se mea na tupu faafuasei sa la feiloai ai? Leai!
Pe a e ole atu i le Tama Faalelagi mo se fesoasoani, ia tatala atu i le avanoa e ono musumusu mai ai e le Agaga Paia le igoa o se tasi i lou olaga e mafai ona tuuina atu le fesoasoani e te manaomia.
Ma aua nei galo le isi itu o lena tupe siliva: O le ala o ai lena ua tuu ai oe ? O ai e mafai ona avea oe ma tali i ana tatalo?