Taulai Atu i Mea e Mafai Ona E Faia

O le misiona lea ou te lei faamoemoeina lava, ae sa ou fiafia i minute uma.

A o ou i ai i le nofoaga autu mo le aoaoina o faifeautalai e sauniuni e alu i Nouei, sa sau Peresitene Dallin H. Oaks o le Au Peresitene Sili ma saunoa mai ia i matou. Sa ia aoao mai se mea faigofie sa tumau pea ia te au i la’u misiona atoa: “Taulai atu i mea e mafai ona e faia.”

O le a le Misiona o Auaunaga?

I ni nai vaiaso talu ona uma le lauga a Peresitene Oaks, sa auina atu ai au i le fale i Kalefonia mo ni mafuaaga faafomai. Na lofituina a’u. Na iu lava ina ou lagonaina e pei ua ou aoaoina le gagana ma sa ou fiafia lava e ulufale atu i le galuega.

Sa ou feiloai i la’u peresitene o le siteki, ma sa ia fesili mai pe ou te fia auauna atu i se misiona o auaunaga.

Se misiona o auaunaga? Matua ou le iloa lava po o le a lena mea.

Sa ou aoaoina e mafai e faifeautalai o auaunaga ona filifili mai filifiliga eseese po o fea, o afea, ma faapefea le auala o le a latou auauna atu ai. O misiona o auaunaga e taulai atu i le fesoasoani i faifeautalai e faaaoga o latou tomai i se auala o le a auauna atu ai i isi.

O Se Filifiliga Lelei mo Au

Sa ou filifili o se misiona o auaunaga o se filifiliga lelei lea mo au e taulai atu ai i lo’u ola maloloina ma auauna atu i le Alii i le taimi lava e tasi. O nisi o o’u tofiga na aofia ai:

• Faatautaia o maimoaga o se taiala i se falemataaga.

• Auauna atu o se talitelefoni i le ofisa o le misiona.

• Fesoasoani i nofoaga e faaputu i ai meaai ma se tolauapiga a le Ekalesia.

• Fesoasoani i le toomaga i afi o le vaomatua.

• Auauna atu i le Malumalu.

O la’u misiona o auaunaga na mafai ai ona ou nofo i le fale ma faaleleia lo’u ola maloloina a o auauna atu. O le misiona lea ou te lei faamoemoeina lava, ae sa ou fiafia i minute uma. Na fesoasoani ia te au e taulai atu ai i mea e mafai ona ou faia ma atiina ae tomai sa ou maua e aumai ai le lelei i le lalolagi.

Lesona o le Olaga Atoa mai La’u Misiona

O le aoaoga faigofie ae mamana mai ia Peresitene Oaks na aafia ai e le gata i la’u misiona ae faapea foi lo’u olaga. Na suia ai la’u vaai. Nai lo le taulai atu i mea e le mafai ona ou puleaina, ua ou taulai atu nei i le aumaia o le lelei i le lalolagi i punaoa ma taleni ua ia te au. O le taulai atu i tomai ua tofusia ai i tatou uma, e mafai ai ona tatou suia le lalolagi ma i latou o loo siomia i tatou mo le lelei.