E Mafai Ona Avea i Tatou Ma Ni Ō e ala ia Iesu Keriso

Vaavaaia Pea, saunia e Yongsung Kim, faaaloaloga a le HavenLight

I le avea ai ma se nuu o le Au Paia, tatou te alolofa ma talia e le tasi le isi. E fesoasoani lenei mea e fatu ai se nofoaga e lagonaina ai le avea ma ni ō i le Ekalesia, mo tagata uma.

O se mea masani le lagona i nisi taimi le pei o le le avea ma ni ō. A tupu lenei mea, ua saunia e le talalelei a Iesu Keriso se vaifofo: auaunaga.

“O le avea ma ni ō e le oo mai pe a tatou faatalitali mo lena mea, ae e oo mai a o tatou aapa atu e fesoasoani le tasi i le isi,” o le saunoaga lea a Elder D. Todd Christofferson o le Korama a Aposetolo e Toasefululua. O se vaega o mea tatou te naunau e fai a o tatou ulufale atu i le feagaiga o le papatisoga, ina ia faamafanafana ma alolofa le tasi i le isi ma tauave avega a le tasi ma le isi (tagai i le Mosaea 18:8–9).

O Iesu Keriso o le faataitaiga sili o lenei mea. Sa Ia tauave tiga, agasala, ma faanoanoaga o tagata uma (tagai i le Alema 7:11–13). O le osifeagaiga e mulimuli ia te Ia ma tausi Ana poloaiga, e mafai ai ona tatou toe nonofo faatasi ma Iesu Keriso ma le Tama Faalelagi i aiga e faavavau.

“O lea, o le aoaoga faavae autu o le avea ai ma ni ō, e tiu i le mea lenei—e mafai e i tatou taitoatasi ona faamautinoa atu: na maliu Iesu Keriso mo a’u; Na silafia e Ia ua ou agavaa mo Lona toto. E alofa o Ia ia te a’u ma e mafai ona faia ai le eseesega uma i lo’u olaga. A ou salamo, o le a faaliliuina a’u e Lona alofa tunoa. Ua tasi a’u ma Ia i le feagaiga o le talalelei; ou te auai i Lana Ekalesia ma le malo; ma ou te auai i Lona faamoemoe e aumaia le togiola i fanau uma a le Atua.

I le avea ai ma Au Paia, e mafai ona tatou fesoasoani i le tasi ma le isi ia lagona e pei ua tatou auai e ala i le alofa, auaunaga, ma mulimuli ia Iesu Keriso.