Na o le Faatekinolosi: Misiona o Auaunaga
O La’u Misiona o Auaunaga: Avea ma Aao o le Alii
Na ofoina mai e lo’u peresitene o le misiona ia te au se avanoa e le mafai ona ou teenaina: o le filifiliga e auauna atu i se misiona o auaunaga.
Sa ta’u mai ia te a’u i lo’u olaga atoa e tatau i alii talavou agavaa ona auauna atu i se misiona. Ae peitai, a o mavae atu taimi, sa ou iloaina o le talanoa atu i isi i le aso atoa i aso uma mo le lua tausaga o le a matuai faigata lava ia te au.
Auauna atu ma se Ataata
Ina ua atoa lo’u 18 tausaga, sa ta’u mai e lo’u epikopo ia te au o le auauna atu i se misiona o se tasi lea o mea e sili ona faigata e mafai ona ou faia, ae o se tasi foi o mea sili ona lelei e mafai ona ou oo i ai. Ina ua mavae le tele o mafaufauga ma tatalo, sa ou filifili e faia.
Sa tofia au e galue i Kalefonia, ISA. O le taimi lava na ou i ai ai iina, e ui lava i a’u taumafaiga uma, sa faigata ona ou faia se upu i soo se lesona. Sa fai mai lo’u peresitene o le misiona ou te amata i le ataata atu i isi. Sa foliga mai e faigofie tele lenei mea, ae o se mea ou te lei faia lava. A o amata ona ou taumafai, sa manaia le lagona o le ataata ma valaaulia le Agaga e ala i le fiafia.
O Se Avanoa Sa Le Mafai Ona Ou Teena
Ina ua mavae le ono masina, sa ou tauivi pea. Sa ou manao e fai le galuega a le Alii, ae o le talanoa atu i isi i le aso atoa sa foliga mai e le mafai ona ou faia.
Ina ua uma ona ou talanoa i o’u taitai, sa matou filifili ai ou te le o i ai i le nofoaga sili mo au. Ona ofo mai lea e lo’u peresitene o le misiona ia te au se avanoa e le mafai ona ou teenaina: o le filifiliga e auauna atu i se misiona o auaunaga. E aunoa ma le faamisi o se pao, sa vave ona ou fai atu ioe.
E ui lava i le le iloaina o mea uma o loo i o’u luma, ae sa ou iloaina o le a mafai lava ona ou auauna i lo’u Atua.
Auauna e pei Ona Faia e le Faaola.
I le taimi nei, i le avea ai ma se faifeautalai o auaunaga, o loo ou fesoasoani pea i isi ia o mai ia Keriso e ala i le auauna atu ma le agalelei alofa e pei o le Faaola. Ou te auauna atu i se nofoaga autu mo fesoasoaniga alofa, se faleteuoloa a le epikopo, le malumalu, ma ou te fesoasoani foi e aoao atu le faaili savali i se aoga maualuga.
A e aoao atu le talalelei, o loo e faasoa atu afioga a le Alii, ma a e auauna atu i isi, o oe lava o aao o le Alii. Po o le a lava le itu, o loo e valaauliaina pea isi e o mai ia Keriso ma auauna atu e ala i le mana o le Agaga Paia.