Na o Tusiga Faaeletonika: O Tali mai se Aposetolo
E Mafai Faapefea Ona Ou Feagai ma se Lumanai Le Mautonu?
O atu, ma le olioli, tuu atu lou lima i le Aao o le Atua, ma tuu atu ia te Ia e taialaina ma le saogalemu oe i mea e le mailoa.
Mai se tautalaga amata a le Brigham Young University–Hawaii na tuuina atu i le aso 8 o Tesema, 2023.
Atonu e taitai atu oe i lou lumana’i i se mea e lē o iloa. Ae afai e te “tuu atu lou lima i le Aao o le Atua,” ou te iloa o Lana taitaiga “o le a sili atu ia te oe nai lo le malamalama ma sili atu ona saogalemu nai lo se auala ua iloa.”
O le a le uiga o le “tuu o lou lima i le Aao o le Atua?” E moni lava, o lona uiga o se sailiga faifai pea ina ia faalatalata atu i lo tatou Tama Faalelagi ma lo tatou Faaola, o Iesu Keriso, ma lagona le olioli o lo Laua alofa atoatoa. O lona uiga o le aioi atu ia malamalama o loo faatasi i La’ua ma i tatou i taimi uma, ia iloa Lo Laual faatasi mai e pei ona faamamaluina ai o tatou olaga, ma maua le olioli ma le lotofaafetai lea e tatau ona musuia ai lena mafutaga. O lona uiga o le “mafaufau faaselesitila.”
Au uo e, afai tatou te tauivi ia taitaiina ma le mama i tatou e le aao o le Atua ae le o se isi lava uunaiga, o le a faamalosia i tatou e fetaiai ma mea e le mailoa o lo tatou lumanai ma le faatuatua tumau ma le talitonuina tumau. Ou te tatalo o le a outou maua le olioli tele a o outou faia au laasaga e sosoo ai.
Faaaoga le Malamalama o le Talalelei
E faapefea la ona tatou oo iina? Ua faatumulia le talalelei a Iesu Keriso i le malamalama lea e mafai ma o le a fesoasoani ia i tatou i le mauaina o le aao o le Atua ma le filemu ma le olioli o loo Ia moomoo ia tatou maua.
O Iesu Keriso, lo tatou Faaola pele, o le punavai silisili lea o le malamalama i o tatou olaga. O Ia Lava na ia faamautinoa mai ia i tatou, “O A’u nei o le malamalama o le lalolagi: o le mulimuli mai ia te au, e le savali o ia i le pouliuli, a e ia te ia le malamalama o le ola.” O le malamalama o le ola! O Ia lava lena. O le mea lena ua Ia ofoina mai ia i tatou. Ona o Lona malamalama, e mafai moni ai lava ona tatou filifili le faamoemoe ma le olioli i le lotolotoi o afa fenumiai o le olaga. Afai ua e iloaina lenei mea, o le a e iloa le vavega o Lona malamalama lea e mafai ona ulu atu i soo se pogisa.
O le faaaogaina o lena sulu o le malamalama i o tatou olaga o lona uiga o le iloaina o le mea na faamatalaina e Peresitene Russell M. Nelson o le olioli o le salamo i aso taitasi. O le toe foi soo atu i le Atua i taimi uma tatou te o ese ai mai le ala e faasaolotoina ai i tatou mai noataga o le agasala ma le faanoanoa lea o le a taotaomia ai i tatou e le fili. E mafai ona tatou aoao e fiafia i le avanoa mo aso taitasi—e oo lava i le tumau—salamo ma faia ma le faafetai faamaoni.
O tusitusiga paia o se isi punavai taua o le malamalama i o tatou olaga. Po o fea lava tou te i ai i lau suesuega patino o tusitusiga paia, ou te uunaia outou ia faaauau pea ona saili ma aoao. E le tuai tele mo i tatou ona tatala o tatou loto i tusitusiga paia ma taialaina e lo latou malamalama.
I le avea ai ma se moli o le ava i se afa, o le malumaluo se punavai le maluelue o le malamalama ma o se faatusa o le saogalemu. O le aoaoga faavae e le masuia o tapuaiga i le malumalu ua maua ai le tumau faaauau pea i se lalolagi o le vevesi ma le le mautonu. Saili le Atua i Lona maota paia. “O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai.”
A o e “tuu atu lou lima i le Aao o le Atua,” a o e sailia Keriso, suesue ma le anoa i tusitusiga paia, ma osia feagaiga paia i totonu o le malumalu, o le malamalama o lena“aso atoatoa” o le a faasolosolo malie ona faateleina. Ioe, o le a avea oe ma se vaega o lena malamalama.
Auauna Atu i Isi
O le taitaiina o isi i le ala na taitaia ai e le Faaola, i le ala e finagalo o Ia tatou te taitai ai, o le auauna atu lea ia i latou. E masani lava o lena auaunaga e manaomia ai le ositaulaga ma le tuputupu ae mai ia i tatou. I taimi uma lava, o lena auaunaga o le a fesoasoani e faaleleia ma faapaiaina ai i tatou, suia ai o tatou loto ma mamanuina ai o tatou uiga ina ia avea atili e faapei o lo tatou Faaa’oa’o, o Iesu Keriso, le auauna silisili i auauna uma.
A o e alu atu i le mea e le mailoa, ma pipiimau i punavai mama o le upumoni ma le malamalama, ia avea le “O ai e mafai ona ou auauna atu i ai?” ma ou manatu taua. Manatua na apoapoai mai Keriso, “O lē sili ia te outou e fai lea ma a outou auauna.” I le silafaga a le Alii, o le maoae e le fuaina i mea ua tatou ausia patino ae o le alofa mama lea tatou te taulimaina ai Ana fanau.
E fia ni auala o le a outou taitoatasi ma “sii i luga lima o loo tautau i lalo?” Ou te talitonu i lou tomai e auauna atu ai i tagata. Ae o le mea e sili ona taua, e talitonu lou Tama oi le Lagi ia te oe. Na te silafia patino outou taitoatasi, ma o loo Ia aapa atu e tuuina atu Lona aao ia te outou ma taitai outou. O atu, ma le olioli, tuu atu lou lima i le Aao o le Atua, ma tuu atu ia te Ia e taialaina oe ma le saogalemu i mea e le mailoa.