Fesili ma Tali
“E faapefea ona ou faaavanoaina se taimi mo mea faaleagaga pe a tele naua isi manaoga i lo’u aso?”
“Ou te taumafai e faatulaga mea e tatau ona ou faia i faamatalaga i la’u telefoni feaveai. Ou te faamuamuaina i taimi uma le suesueina o au tusitusiga paia, ona ou faia lea o a’u meaaoga. Pe a ou suesue muamua i tusitusiga paia, ou te malamalama lelei i a’u meaaoga ma ou maua ai le filemu i lo’u aso.”
Adara L., 15, Mérida, Mekisiko
“O le taimi lava ou te ala ai i taeao, ou te faitauina ai a’u tusitusiga paia ma fai a’u tatalo. Ou te iloa lava e faigofie atu ona faitau ma tatalo i le taeao, nai lo le taumafai e tau faaofi i totonu o la’u faasologa pisi. Sa ou matauina pe a ou faia faapea, ou te maua le malosi sili atu e tetee atu ai i faaosoosoga ma maua ai se uiga lelei.”
Catelyn E., 17, Kalefonia, ISA
“Ia te a’u lava ia, ou te tauivi ma lenei mea, o lea ou te manatu ai e tatau ona e mafaufau moni i mea na faia e Iesu mo oe ona fai lea o se manatu e tuuto atu se vaega o lou aso ia te Ia. Pe a e mafaufau i mea ua Ia faia mo oe, e faigofie lava ona faaavanoa sina taimi mo le tatalo ma le suesueina o tusitusiga paia!”
Averi J., 14, Arisona, ISA
“E mafai ona ou faaavanoaina se taimi mo mea faaleagaga e ala i le faaitiitia o masini faaeletonika. O le faaitiitia o masini faaeletonika, o le a ou faaaogaina ai le taimi sa ou faamaumauina muamua mo ni mea e sili atu ona aoga mo le Alii. E mafai lava ona faataatia ese ia masini faaeletonika, e le pei o a tatou tusitusiga paia.”
Juliette J., 14, Texas, ISA
“O le ki mo a’u o le faia lea o mea faaleagaga ae ou te lei faia isi mea. E le faigofie i taimi uma, aemaise lava ona e leai se aso mulimuli mo le suesueina o tusitusiga paia e pei ona i ai mo meaaoga. Ae e pei lava o le sefuluai, ua ou iloa ai afai ou te tuuina atu muamua i le Alii lo’u taimi, ua lava foi lo’u taimi o totoe mo isi mea uma.”
Jacob N., 19, Iowa, ISA
Faaopoopoga Faaeletonika:
“O se mea na fesoasoani ia te a’u o le taulai atu lea i mea ou te faamuamua. E i ai lava i taimi uma mea taua e fai, ae e itiiti lava ni mea e taua tele ma e le mafai ai e gaoioiga faaleagaga ona faatuai mo sina taimi. Pe a ou faamuamua mea faaleagaga, ou te iloa ai e masani lava ona lava le taimi mo isi mea uma.”
Emmett C., 17, Iuta, ISA
“Afai o loo e tauivi moni lava ma le sailia o se taimi mo le Alii, atonu e te manao e mafaufau e aveese se mea mai lou olaga lea o loo taofia ai oe mai le lagonaina o le agaga ma taulai atu i le Atua. O se faataitaiga o lenei mea o ala o faasalalauga faaagafesootai. E fia le taimi o loo e faaaluina i le faasolosolo o ala o faasalalauga faaagafesootai? Afai e te aveesea le taimi e te faaaluina i luga o ala o faasalalauga faaagafesootai, atonu e te ofo i le tele o le taimi e mafai ona e maua e taulai atu ai i le Alii i lou aso.”
Kimber Leigh D., 17, Tennessee, ISA
“Ou te faitauina tusitusiga paia i luga o le pasi pe a ou maua sina taimi. A o ou sauni mo le aoga, ou te faalogologo foi i viiga a le Ekalesia ma lauga o le konafesi.”
Ema S., 13, Iuta, ISA
“O le mea e tasi e tatau ona e faia o le taumafai lea ia avea le suesueina o tusitusiga paia o se vaega o lau faatulagaga o aso taitasi. E mafai ona e faia lenei mea ae e te lei moe! E mafai ona e ala vave ina ia mafai ona e suesue ae e te lei alu i le aoga po o le seminare. E mafai ona e faalogologo i musika a le Ekalesia a o faia meaaoga po o isi mea o aso taitasi. E fesoasoani lenei mea ina ia e lagonaina ai le mana o le Atua e tusa lava pe o e faia isi mea. Ma le isi, e tatau ona e talosagaina se fesoasoani mai ou matua po o le epikopo. Manatua, o le a fesoasoani pea le Atua ia te oe e avea o ia ma se vaega o lou olaga pe afai e te tatalo atu ia te ia mo se fesoasoani ma se taitaiga.”
Colton N., 13, Iuta, ISA