E Leai se Tasi e Malamalama ia te Au e Pei o le Faaola
O la’u malaga ma le kanesa ua aoaoina ai a’u i le tele o lesona tāua faaleagaga.
Ata na pueina e Barbara Leite
Na amata lava i se tiga o le ulu. Ina ua mavae sina taimi, sa faateleina le tiga o le ulu ma sa tupu i aso uma. O nisi taimi e mafua ai lo’u faasuati. Ona o lenei mea, na talosagaina ai e la’u fomai se faata faapitoa MRI.
O taunuuga o le MRI na faaalia ai sa i ai se patu lapoa e ta’ua o le germinoma i le vaega o neura ogatotonu o lo’u fai’ai. Ina ua matou faatoa iloaina le patu lapoa ia Oketopa 2023, matou te lei iloa pe sa i ai i se tulaga ogaoga (lea e avea ai ma kanesa) pe sa i ai i se tulaga le ogaoga tele.
Sa faia ni o’u taotoga eseese, ma na oo lava ina aveeseina atoa ai le patu. Sa ou toe foi i le fale ma sa foliga mai ua lelei mea uma, ae sa umi se taimi na faatali ai le oo mai o se tala i suesuega o fasiaano na fai. I ni nai vaiaso mulimuli ane, na toe foi mai ai lo’u ulu tiga, o lea na faia ai so’u fā’ata CT.
E Mafai e le Faaola Ona Saunia i Tatou mo Taimi Faigata
Ina ua matou mauaina taunuuga o le fā’ata CT, sa matou iloa ai i le lē itiiti ifo ma le 20 aso, na toe foi atoa mai le patu i lo’u faiai. Na faaalia i le suesu o fasiaano o le patu o le kanesa. Sa matuai fefefe lava o’u matua, ae sa ou tumau i le to’a. Ou te talitonu ua uma ona saunia ma faamalosia a’u e le Faaola.
O Vavega i Taimi o Faigata
Ina ua iloa o le patu o le kanesa, sa matou tuua ai ma o’u matua lo matou aai ma o atu i le falemai faapitoa o le kanesa o tamaiti i le laumua o le setete, o Curitiba. O le vaega muamua o lo’u togafitiga na alu ai le ono masina, i le va o taotoga ma togafitiga.
Sa toe faia se isi MRI ina ia mafai ai ona faatulaga le isi taotoga e sosoo ai. Na faamoemoe fomai e faapea, i le togafitiga o le kimo, ua tatau ona mimigi ai le patu ia pei o se fatu pi le telē.
Ae na faaalia i le MRI ua matuā leai lava se patu! Na faia e le Alii se vavega. Sa lei mafaufauina foi e fomai e i ai se avanoa mo lenei mea. Sa ou matua faafetai lava mo vavega sa ou oo i ai, ae sa faaauau pea ona faigata la’u malaga.
Faatautaia o le Tulaga Leiloa faatasi ma le Faaola
I le amataga o lenei tofotofoga, sa ou faanoanoa ona sa tele naua mea na aveesea atu ma a’u. Sa taofia lou toe alu i le aoga ma le lotu. Sa le toe iai se soka, ma sa ou le toe fesootai foi ma a’u uo. Sa le mafai foi ona ou auai i le seminare.
Ou te iloa o le Faaola, e ala i Lana Togiola, o le a suitulaga i mea ua aveesea atu ma a’u. Ou te le iloa pe faapefea, ou te le iloa po o afea, ae ou te talitonu o le a suitulaga Iesu Keriso i nei mea uma ua aveesea.
E leai se tasi e malamalama lelei ia te au e pei ona Ia malamalama ai. E malamalama lelei lava lo’u tinā ia te au, ae e le o le 100 pasene, e pei ona malamalama le Faaola ia te au. E ui lava ina sa ou faanoanoa i mea uma na aveesea mai ia te a’u ma mea uma na tutupu, ae sa faatasi le Faaola ma a’u i le taimi atoa.
Fo’iaina o Faigata e ala i Auaunaga
O se tasi o auala e faatoilalo ai faigata o le auauna atu lea i le Alii. O le auaunaga ua ou fesootai ai ma le Alii ma fesoasoani ia te au e faalogo ai i Lona siufofoga ma mulimuli ia te Ia.
O le tausaga ua te’a, sa faia ai se matou konafesi a le MMA, ma e ui lava sa le mafai ona ou auai patino, ae sa valaaulia a’u e le ulugalii na taitaia le polokalama e fai se vitio e faasoa atu ai la’u molimau.
I la’u vitio sa ou faasoa atu ai e uiga i le auala e tusa lava po o le a le mea o tupu i lo’u olaga, ua ia te au le manao e fai la’u vaega ma auauna atu i isi. Sa ou mauaina ni tusi se 571 mai le autalavou o e na matamata i la’u vitio ma sa faamalosiauina.
O le aiga o Gustavo o se punavai o le malosi ia te ia. Na te vaavaai atu i lona uso ma lona tuafafine matua, o i laua uma o ni faifeautalai ua foi mai.
Lesona na Aoaoina
O loo ou feagai pea ma luitau o lo’u soifua maloloina, ae o lenei aafiaga ua ou latalata atili ai i le Faaola ma aoaoina ai au i le tele o mea.
Ua ou aoao ia onosai ma faatalitali i le Alii pe a feagai ma talafou lē lelei, o ni aafiaga leaga, po o gasegase leaga. Ua ou aoao e maua le olioli i mea laiti ma faigofie. Ua ou aoao e vaai i le lalolagi i mata eseese, e suesue i tusitusiga paia, ma fesootai ma le Agaga Paia.
O se mea e fesoasoani ia te au faaleagaga o le i ai pea i tusitusiga paia. E oo lava foi i le taimi na ou faataotolia ai i le falemai, ina ua uma se taotoga po o le taimi o togafitiga, sa ou fesootai pea lava pea i tusitusiga paia po o lauga o le konafesi aoao. Afai e le mafai ona ou faitau, ou te fai atu i lo’u tina e faitau mai ia te a’u, pe ou te taina foi le leo mo a’u lava.
O lea la ua ou i ai i le vaega o togafitiga e faaaoga ai le leisa, ma a o faatalitali mo togafitiga, ou te faaaogaina le polokalama o le FamilySearch Get Involved. I le taimi o togafitiga i le leisa, ou te fiafia e mafaufau i mau mai le seminare. Pe a tatou filifili e faamuamua le Alii, e oo lava i taimi faigata, e faia ai le eseesega atoa. Ou te lagona o loo faatasi le Alii ma a’u auā ua ou latalata atu ia te Ia.
O Iesu Keriso o lo’u Faaola ma o la’u uo. Ou te iloa e silafia e Ia mea uma ou te lagonaina, sa lagonaina, ma o le a ou lagonaina. O le a faasa’oina mea uma e ala i le Faaola.