Na o le Faatekinolosi: Misiona o Auaunaga
E I Ai Lava i Taimi Uma se Auala e Auauna Atu Ai
Ua valaauina i tatou e le Alii e auauna atu. Na te silafia i tatou ma o tatou gafatia.
Sa valaauina au e auauna atu o se faifeautalai ma tofia i le Misiona a Pasila Florianópolis. Sa fitu masina na ou i ai iina ma iu ai ina ou toe foi vave atu i le fale. Ina ua ou alu i le fale, sa ou faia se tatalo e talosaga atu ai i le Tama Faalelagi e aua nei faamaloloina au o se faifeautalai. Ina ua uma ona ou tatalo, sa ou lagonaina le Agaga o ta’u mai ia te au o le a lelei mea uma.
Faalagolago i La’u Tatalo
I lo’u vaiaso muamua i le fale, sa ou faatuatuaina ai ou lagona ina ua uma ona ou tatalo i le malaevaalele. Sa amata ona ou fesoasoani i le faleoloa o le malumalu. Ina ua ou maua le avanoa e feiloai ai ma la’u peresitene o le siteki, sa fiafia tele o ia e faalogo i la’u auaunaga ma fai mai o le a ia le faamaloloina au. Ona tofia lea o au e avea ma se faifeautalai o auaunaga i la’u misiona i le aiga, o le Misiona a Recife i Matuisasae.
E Faape’ī mo Au
O la’u misiona auauna atu e aofia ai tofiga eseese. I le aluga o le vaiaso ou te fesoasoani ai i le faleoloa o le malumalu, le ofisa o le malumalu, ma le potu tagamea. E i ai lava i taimi uma se mea e fai i le malumalu—e le mafai lava ona nonofo filemu faifeautalai iina.
I Aso Toonai ou te fesoasoani ai i le inisitituti. Sa ou auai i le vasega sauniuni mo faifeautalai a le inisitituti e faasoa atu mea sa ou aoaoina e uiga i le misiona—sa matuai manaia lava le lagona o le faasoa atu. Ou te fesoasoani foi e tufatufa atu meaai i tamaiti aoga pe a uma le vasega.
E faaopoopo atu i o’u tofiga patino, ou te faaaogaina a’u upega fesootai faaagafesootai e faasoa atu ai le talalelei. E i ai sa’u itulau na ou fatuina ina ua 17 ou tausaga o loo talanoa e uiga i le polokalama a le autalavou.
Fausiaina o Lona Malo
Ua valaauina i tatou e le Alii e auauna atu. Na te silafia i tatou ma o tatou gafatia. O misiona o auaunaga e musuia e le Alii, ma afai na tofia oe e auauna atu i se tasi, ua faia ona e manaomia e le Alii lau fesoasoani i le fausiaina o Lona malo.
E tusa lava pe ou te faanoanoa pe feagai ma faigata, ou te fiafia lava pe a ou faamaeaina masina taitasi o la’u misiona ma mafai ona ou toe mafaufau i le auala na ou tuputupu ae ai ma faamalosia ai i lena taimi. Ou te fiafia i la’u misiona. E musuia moni lava e le Alii.