Na o le Faatekinolosi: Misiona o Auaunaga
E Le Foliga Tutusa ni Misiona se Lua
O le galuega lenei a le Alii—e tofu tagata uma ma se matafaioi tulaga ese i ai.
Sa ou auauna atu mo le valu masina o se faifeautalai aoao atu i Los Angeles, Kalefonia, a o lei siitia atu i lo’u aiga i se misiona o auaunaga i Iuta. E ui lava i le eseese o tofiga, ou te iloa o le valaauga e auauna atu i se misiona ma fesoasoani i isi ia o mai ia Keriso e tutusa lava.
E Faape’ī mo Au
E auauna atu faifeautalai uma i tofiga tulaga ese, o lea e leai ai ni faatulagaga se lua e foliga tutusa tonu lava. Ou te auauna atu i ni nofoaga o auaunaga eseese se fa i vaiaso taitasi.
Ou te auauna atu i se faleteuoloa a le epikopo e faatasi i le vaiaso. Ou te fesoasoani e teu ni oka o meaai mo aiga e manaomia le fesoasoani, ma ou te ofoina atu le faamafanafanaga i tagata uma e ulufale mai i faitotoa. Ou te volenitia foi i se falema’i e leai se totogi o se faamatalaupu ma se tagata e tomai faapitoa i le tausiga o gasegase. Ou te fesoasoani e siaki i totonu gasegase, faaliliu mo i latou e tautatala faaSipaniolo, ma aoao faiga faavae mai fomai maoae.
Pe a ou le i ai i le falemai, ou te faigaluega i le vaega o mekasini Mo Le Malosi o le Autalavou. Sa ou fiafia lava e faalogo e uiga i le autalavou. O a latou molimau e faamalosia ai la’u lava molimau! I faaiuga o vaiaso, ou te auauna atu o se tagata faigaluega i le malumalu.
O le mea tulaga ese e uiga i misiona o auaunaga, o le faatagaina lea o oe e faaaoga ou taimi avanoa i soo se mea e manaomia ai oe e le Alii. Ia te au lava ia, o nisi aso o lona uiga o le o faatasi ma faifeautalai e aoao se lesona, po o le volenitia atu i se fale e nonofo ai manu i le lotoifale. O isi aso, o lona uiga o le faaaluina o le taimi ma lo’u aiga po o le asiasi atu i se tasi e manaomia le lagolagosua.
Faamanuiaga mai le Misiona o Auaunaga
O la’u misiona ua taua tele ia te a’u. Ou te lei mafaufauina lava o le a ou maua le avanoa e auauna atu ai i le tele o auala—ae tusa lava po o aso uma. O o’u tofiga taitasi ua aumaia ai ia te au ma lo’u aiga le tele o faamanuiaga. Ou te faafetai ona ua mafai ona ou feiloai pea i tagata fou ma fausia ni faauoga fou.
Ou te iloa e tuu i tatou e le Atua i nofoaga e manaomia ai i tatou. Na te silafia i tatou taitoatasi i se auala tulaga ese ma tuuina mai ia i tatou avanoa e tuputupu ae ai i le auala e manaomia ai i tatou e Ia. O Lana galuega lenei—e tofu tagata uma ma se auala tulaga ese e faia ai.